Exodus 35 - সান্তালী বাইবেল

Jirạukʼ mãhã reakʼ niạmko

¹ Mose do Israelren sanam manḍerrenko jarwaketʼkoteye metatʼkoa, “Probhu Isor do noako dohoy reakʼe hukum akada.

² Hapta reakʼ turui dinpe khaṭaokʼa menkhan eaeakʼ din do ape lạgitʼ mitʼṭecʼ begarakʼ din hoyokʼa, Probhu Isor ńutumte jirạukʼ dinge. Enhilokʼ okoeye kạmi uni doe gocʼ ocokʼa.

³ Jirạukʼ mãhãre apeakʼ oṛakʼre seṅgel alope jola.”

Sonot tạmbu lạgitʼ samaṅokʼakʼko

^4-5 Mose do Israelkoe metatʼkoa, “Probhu Isore hukum akada apeakʼ menakʼtape khon uni ńutumte samaṅokʼakʼ ạguipe. Ar okoe apnarakʼ kusite emokʼe menetʼkan uni do Probhu Isor lạgitʼ noa jiniskoe ạguiyma: Sona, rupạ ar pitạl;

⁶ nil, beguni ar jeṅgetʼ arakʼ sutạm, mĩhĩ musnạ sutạm; merom upʼ;

⁷ arakʼ roṅte roṅakatʼ bheḍawakʼ harta, merom harta ar gabla kaṭ;

⁸ diuhe jol lạgitʼ sunum; ojogokʼakʼ sunum ar jut so lạgitʼ mosolako;

⁹ ehpod ar koṛam aḍokʼakʼ cetanre bạisạu lạgitʼ boidurjo mạnik ar eṭakʼ damanakʼ dhiriko.

Ńapamokʼ tạmbu reakʼ jinisko

¹⁰ “Ape talaren gạkhuṛ kạrigolko hecʼkate Probhu Isor okae hukumakatʼ onako benaoma.

¹¹ Sekʼwa tạmbu ar ona cetan reakʼ dapalakʼko; ona reakʼ bạkupʼakʼko, paṭako, hurkạṛakʼko, khunṭiko ar ganḍoko;

¹² sinduk ar ona reakʼ ḍaṅkin, daya duṛupʼakʼ ar onakin ekʼsetʼakʼ orwal;

¹³ mej ar ona reakʼ banar daṅ ar ona reakʼ sanam asbabko ar Probhu Isorakʼ samaṅokʼakʼ piṭhạ;

¹⁴ diuhe lạgitʼ dohowakʼ ar ona reakʼ jinisko, ona reakʼ mạliko ar diuhe jered lạgitʼ sunum;

¹⁵ dhudhup pinḍ ar ona reakʼ ḍaṅkin; ojogokʼakʼ sunum ar jut so reakʼ dhup; sekʼwa tạmbu duạr reakʼ orwal;

¹⁶ jeredokʼ samaṅokʼakʼ lạgitʼ pinḍ, ar ona lạgitʼ pitạl reakʼ jhạńjri, ar onakin reakʼ ḍaṅkin ar asbabko; ạbukokʼ hanḍha ar ona doṛomkakʼ reakʼ ganḍoko;

¹⁷ khunṭiko ar ona reakʼ ganḍoko, bakher raca reakʼ orwalko ar bakher raca duạr lạgitʼ ekʼsetʼ orwalko;

¹⁸ sekʼwa tạmbu reakʼ gońjko ar bakher raca reakʼ gońjko ar ona reakʼ baberko;

¹⁹ sonot ṭhạ̃ire sekʼwa kạmi lạgitʼ kicricʼko, metakʼme naeke Aron lạgitʼ benaoakʼ sonot kicricʼko ar uniren hoponkin lạgitʼ naeke lekate sapʼdapʼ kạmi lạgitʼ kicricʼko.”

Hoṛko akoakʼ danko ạguyetʼkan

²⁰ Inạ tayom Israelko do Mose samaṅ khonko ruạṛ calaoena.

²¹ Ar mone uskurketʼko apnarakʼ kusite Probhu Isor ńutumte sekʼwa tạmbu bekʼnao ar uniyakʼ kạmi lạgitʼ ar naekeakʼ sonot kicricʼko lạgitʼ jạruṛokʼakʼ lekate jotowakʼko ạgukeda.

²² Herel hoṛ ar maejiuko talare okoe do monre uskurko ńamketʼ onko hõ mũ reakʼ mạ̃kṛiko, pagrako, chachap mundạmko, hạsliko ar sona reakʼ nana parkan gohonako ạgukeda. Ar okoe Probhu Isor ńutumte sona ạgu moneyade uni do sonae ạgukeda.

²³ Ar okoe ṭhen nil roṅakʼ, beguni, jeṅgetʼ arakʼ sutạm ar mĩhĩ musnạ sutạm se merom upʼ, arakʼ roṅ akatʼ bheḍawakʼ upʼ se merom hartako tahẽkan onko hõ onako ạgukeda.

²⁴ Okoe ṭhen rupạ ar pitạlko tahẽkan onko hõ Probhu Isor emae lạgitʼko ạgukeda. Sekʼwa tạmbu reakʼ kạmire jạruṛokʼakʼ nonkan gabla kaṭ okoekoakʼ tahẽkana onko hõ onako ạgukeda.

²⁵ Okoe maejiu do sutạm takoe reakʼ kạmire gạkhuṛko tahẽkan onko do nil, beguni ar arakʼ roṅakʼ sutạm ar mĩhĩ musnạ sutạmte apnarakʼ titeko takoekeda.

²⁶ Ar tinạkʼ do ontorre uskurko ńamketʼ ar sutạm takoe reakʼ kạmiko baḍaekan tahẽkan onko maejiuko hõ meromakʼ upʼko takokeda.

²⁷ Ephod ar koṛam aḍokʼakʼ cetanre bạisạu lạgitʼ mukhiyạko do boidurjo mạnik ar eṭakʼ damanakʼ dhiriko ạgukeda.

²⁸ Diuhe jered lạgitʼ sunum ar ojokʼ bahalokʼ reakʼ sunum ar jut sowakʼ dhup benao lạgitʼ mosolako ar jạitun sunum hõko ạgukeda.

²⁹ Probhu Isor do Mose hotete cetʼe cekae lạgidokʼkan tahẽkan ona kạmi lạgitʼ Israelren maejiuko ar herelko talare okoe uskurko ńamketʼ onko do daṛeakʼ bhor Probhu Isor lạgitʼko ạgukeda.

Besalel ar Oholiab

^30-31 Inạ tayom Mose do Israelkoe metatʼkoa, “Probhu Isor do Jihudạ khũṭren Hur goṛomtetʼ koṛa, metakʼme Uriạ hopon Besalele bachaoana ar acʼakʼ Jiuteye perecʼkedete uni do ạkilte, bidiạte ar sanam lekan kạmi reakʼ daṛeye emadea.

³² Jemon uni do acʼakʼ kusi leka sona, rupạ ar pitạlte napae napae nokshakoe benao daṛeakʼ,

³³ ar damanakʼ dhiriko hõe getʼ daṛeakʼte onae rokʼ bạisạu daṛeakʼ ar kaṭ reakʼ eṭakʼ mońj kạmiko hõe kạmi daṛeakʼ,

³⁴ ona chaḍa Probhu Isor do eṭakʼko hõ noako kạmi cetʼako reakʼ daṛe Besalel ar Dan khũṭren Ahisamakren hopon Oholiab tạkine ematʼkinạ.

³⁵ Probhu Isor do nana parkan ti reakʼ kạmi nil, beguni ar jeṅgetʼ arakʼ sutạm ar mĩhĩ musnạ sutạmte tiń ar galaṅakʼ noksa benao reakʼ ektiạri hõe ematʼkoa. Jemon onko do akoakʼ kusi leka nana parkan nokshako benao daṛeakʼa.