Exodus 34 - সান্তালী বাইবেল

Dosarakʼ dhiri cạkti

¹ Inạ tayom Probhu Isor do Moseye metadea, “Pạhilakʼ dhiri cạktikin leka arhõ benaome. Ar amakʼ rạputʼakʼ dhiri cạktikinre okako katha ol tahẽkan niạ nãwã dhiri cạktikinre hõ onkageń olama.

² Am do gapa setakʼre sapṛaokate sinại burute rakapʼ hijukʼme. Iń do onḍe buru muthnire am samaṅreń hạjirokʼa.

³ Ar am sãote okoehõ jemon aloko tahen se okoehõ burure aloko ńelokʼ, ar buru samaṅre dạṅgrako, bhiḍiko ar meromko hõ jemon aloko ạtiń.”

⁴ Mose do unre pạhilakʼ dhiri cạktikin leka arhõ barea dhiri cạktiye benaokeda ar Probhu Isorakʼ hukum leka ạḍi setakʼre sinại buruteye rakapʼ calaoena. Ar dhiri cạktikine sapʼ torakeda.

⁵ Probhu Isor do rimil khunṭi khon pheḍ hecʼkate Mose ṭhene teṅgoyena ar acʼakʼ “Probhu Isor ” ńutume lại jạhirketʼtea.

⁶ Uni do Mose samaṅteye sen paromena ar noae lại jạhirkeda, “Probhu, Probhu, uni do daya ar mãyãte perecʼicʼ Isor kanae. Uni do usạrate bae edre hodokʼa. Menkhan daya ar sạriyakʼteye kisạ̃ṛgea.

⁷ Uniyakʼ asambheṛ daya do hajar piṛhi hạbicʼ tahenkana. Uni do behokakʼ, hul ar kạikoe ikạyetʼ kana, menkhan dusiyicʼ doe sạjạiyedea. Uni do apatakʼ ghạṭko onkoren hoponko ṭhen pe pon piṛhi hạbicʼe pańja halayetʼ kana.”

Bondobos arokʼ reakʼ

^8-9 Niạ katha ańjomkate Mose do otre ombakʼkate sewawadeteye menkeda, “E Probhu Isor, ińre amakʼ daya menakʼ khan ale sãote dela calakʼme. Noko hoṛ doko keṭecʼ hoṭokʼan kanrehõ enhõ am do aleakʼ behokakʼ ar kạiko ikại taleme ar amren hoṛko mentege ataṅleme.”

¹⁰ Khan Probhu Isor doe roṛ ruạṛkeda, “Iń do mitʼṭecʼ bondobos iń dohoakada. Amren sanam hoṛko samaṅre nonkan hahaṛawakʼkoń kạmiya ona do niạ lahare dhạrtiren cele jạtrenko samaṅre baṅ hoyakana. Ar okoe hoṛko samaṅrem girobasokʼkan onkoko ńela, iń Probhu Isor do ape lạgitʼ okań cekae lạgidokʼkan ona do manwakoakʼ monre botor ar bhuktigeye janam ocoya.

¹¹ Teheń okań hukumape onape manaoa. Ar iń do Amorirenko, Kananrenko, Hittirenko, Pherisirenko, Hiwirenko, Jebusirenko ape samaṅ khoniń laga ńirkoa.

¹² Sontorokʼpe! Oka disạmpe bolo lạgidokʼkan ona disạmren hoṛko sãote cetʼge alope bondobosa; arpe onkae khan onko do ape talare jhampa lekako hoyokʼa.

¹³ Onkoakʼ pinḍkope rạputʼ giḍikatakoa, onkoakʼ pujạ reakʼ dhirikope gejertakoa ar onkoko pujạwako Asera khunṭiko hõpe rạputʼ giḍikatakoa.

¹⁴ Cele debotage alope sewawakoa, ente Probhu Isorakʼ ńutum do ãṭicʼ Isor; uni do mitʼṭen ãṭ Isor kanae.

¹⁵ “Okoe ona disạmreko tahenkan onko sãote cetʼge alope bondobosa, ente onko tinre besapha monte akoren debotako ṭhen apnartetʼko emokʼa ar onko ńutumte janwarko dãṛẽkoa unre apeko neotapea ar ape tulucʼ boṅga ṭhen samaṅakʼ reakʼ jelko joma.

¹⁶ Ona chaḍa onkoren kuṛiko sãote tinre aperen hoponkope baplakoa unre onkoren kuṛiko do akoren boṅgako otoṅ ocokoa arko laṭghaṭa ar aperen hoponko hõ onareko bulạukʼa.

¹⁷ “Ape do dul boṅgako alope benao joṅa.

¹⁸ “Menkhan bin khạmiyanakʼ piṭhạ porob porobokʼpe. Iń cetʼ lekań hukum akatʼpe onkage eae din hạbicʼ bin khạmiyanakʼ piṭhạpe joma. Abib cando reakʼ niṭ akan oktere ape do noape porobokʼa, ente ona candoge Misor disạm khonpe oḍokʼ hecʼlena.

¹⁹ “Kukhiren mitʼke mitʼ pạhil hoponko do ińren kanako. Aperen sanam janwar palkoren mitʼke mitʼ pạhil ạnḍiạ hoponko hõ ińren kanako.

²⁰ Menkhan gadharen pạhil ạnḍiạ hopon do mitʼṭen bheḍa hoponte bodol chaḍaoe hoyokʼa. Ar uni hopon bae chaḍaokʼ enḍekhan uni do hoṭokʼ rạpudtae hoyokʼa. Ar aperen mitʼke mitʼ pạhil hoponko hõ chaḍaoko hoyokʼtapea. “Porob jokhecʼ okoehõ iń ṭhen eken ti do alope hijukʼa.

²¹ “Ape do hapta reakʼ turui dinpe khaṭaokʼa menkhan eae mãhã hilokʼ do jirạukʼpe. Casokʼ jokhecʼ ar phosol samṭao oktere hõ onkaepe.

²² Guhum samṭao jokhecʼ pạhil getʼakʼ guhumte eae hapta reakʼpe porobokʼa ar cas abad reakʼ mucạtʼ cando do phosol samṭao porobpe porobokʼa.

²³ Sanam herel hoṛ do bochorre pe dhao Probhu Isor samaṅrepe hạjirokʼa. Ente uni kangeae Israelkoren Isor do.

²⁴ Disạm talaren sanam jạtrenko do ape samaṅ khoniń laga ńirkoa ar apeakʼ disạm reakʼ simạnakoń baṛhao ocoytapea. Bochorre pe dhaokate tinre aperen Probhu Isor samaṅrepe hạjirokʼa unre okoehõ apeakʼ jaega jumi cetanre laloc alope dohoya.

²⁵ “Ape do iń ńutumte tinre janwarakʼ mãyãmpe samaṅa unre ona sãote khạmi mesal akatʼ jãhãnakʼge alope samaṅa. Bańcao porob reakʼ samaṅokʼakʼ jãhãnakʼge setakʼ hạbicʼ do alope sarecʼ dohokakʼa.

²⁶ Apeakʼ khet baṛge khon rakapʼakʼ pạhil phosol reakʼ bhage utạrakʼ hĩs do Probhu Isorakʼ oṛakʼtepe ạguiya. “Merom hoponakʼ jel do uniren eṅgatakʼ toa sãote alope isina.”

²⁷ Ona tayom Probhu Iso do Moseye metadea, “Niạko katha ol dohokakʼme ente noako katha lekage am ar Israelko lạgitʼ bondobosiń dohoakada.”

²⁸ Sinại burure Mose do Probhu Isor ṭhen pongel siń ar pongel ńindại tahẽkana. Ar inạ oktere uni do piṭhạ se dakʼ cetʼge bae jom-ńũleda. Probhu Isor do dhiri cạktikin cetanre acʼakʼ bondobos reakʼ kathako arhõe olkeda, ar onage gel hukum do hoyena.

Mose Sinại buru khone pheḍokʼkan

²⁹ Mose do goha dhiri cạktikin banar tire hataokate tinre buru khone pheḍ hecʼena unre bae bujhạu daṛeada, Probhu Isor tulucʼ galmarao iạte uniyakʼ mẽtʼãhã do malkao akantaea mente.

³⁰ Aron ar sanam Israelko do Moseyakʼ noa malkaokʼkan mẽtʼãhã ńelte uni ṭhen sorokʼko botorena.

³¹ Menkhan onkoe hohoatʼko khan Aron ar Israel mukhiyạko do uni ṭhenko hecʼena. Ar Mose do onko sãoteye galmaraokeda.

³² Ar inạ tayom do Israelren sanam hoṛko uni ṭhenko hecʼena ar sinại burure Probhu Isore emen sanamakʼ hukume baḍae ocoketʼkoa.

³³ Mose do hoṛko sãote katha roṛe mucạtʼketʼ khan acʼakʼ mẽtʼãhã do kicricʼteye betʼ esetʼketʼtaea.

³⁴ Menkhan ona tayom jãhãtinrege Probhu Isor sãote galmarao lạgitʼ uni samaṅreye calakʼkan tahẽkan unre uni do acʼakʼ mẽtʼãhã reakʼ kicricʼe ocokʼetʼ tahẽkana. Probhu Isor samaṅ khon ạuriye oḍok hijukʼ hạbicʼ uniyakʼ mẽtʼãhã do oṭakʼge tahenkan tahẽkana. Ar okako hukume ńametʼ tahẽkan onḍe khon oḍok hecʼkate Israelkoe baḍae ocoyetʼko tahẽkana.

³⁵ Ar hoṛko ńeletʼ tahẽkana, Moseyakʼ mẽtʼãhã do malkao akana. Mose do arhõ acʼakʼ mẽtʼãhãe esetʼkakʼkan tahẽkana ar Probhu Isor sãote galmaro lạgitʼ ạuriye calakʼ hạbicʼ uniyakʼ mẽtʼãhã do poṭom esetʼge tahenkan tahẽkana.