Exodus 33 - সান্তালী বাইবেল

¹ Ona tayom Probhu Isor do Moseye metadea, “Amren okoe hoṛko Misor disom khonem oḍok ạguakatʼko onko salakʼ niạ ṭhạ̃i bạgikate ińiń gokʼakawatʼpe disạmte calakʼpe. Iń do Abraham, Isạhak ar Jakob ṭhen noa disạm reakʼgeń kiriạlena, onkoren bõskoń emakoa mente.

² Iń do ape laha lahate mitʼṭen serma goḍet iń kolea ar uni do ona disạm khon Kananrenko, Amorirenko, Hittirenko, Pherisirenko, Hiwirenko ar Jebusirenkoe laga ńirkoa.

³ Onḍe do toa, dumur rasa ar cetʼ jãhãnakʼ reakʼ okulạnge bạnukʼa. Menkhan keṭecʼ hoṭokʼan jạtkantepe iń do ape sãote bạń calakʼa, ariń senlen khan horregeń marao utạrpea.”

⁴ Niạ muhin reakʼ katha ańjomkate hoṛko do rarakʼko ehopʼena. Ar akoakʼ cetʼ abhrange bako horokʼleda,

⁵ ente Probhu Iso do Moseye metade tahẽkana, “Israelkom metakoa, onko do, mitʼṭecʼ keṭecʼ hoṭokʼan jạtren kanako mente. Onate mitʼ ghạṛi hõ onko sãoteń tahen, enḍekhan onko doń marao utạrkoa. Ar ńit onkoakʼ hoṛmore okako abhran menakʼ onako totʼ giḍikakʼma. Ar ona tayom iń hudisa onkore cetʼ iń cekaea mente.”

⁶ Onate Israelko do Horeb burure akoakʼ abhranko totʼ giḍikada; ar tishõ onako do bako horokʼleda.

Ńapamokʼ reakʼ tạmbu

⁷ Mose do Israelkoakʼ ḍera bahre sạṅgiń ńokʼre tạmbui ṭaṅgaoetʼkan tahẽkana ar ona do “Ńapamokʼ tạmbui metakʼkan tahẽkana.” Ar Probhu Isor ṭhen jãhãege jãhãnakʼe khoj enḍekhan uni do ńapamokʼ tạmbu ṭhene senokʼkan tahẽkana.

⁸ Mose tinre ńapamokʼ tạmbuteye bolokʼkan tahẽkana unre hoṛko do apan ạpin tạmbu reakʼ duạr samaṅreko teṅgokʼkan tahẽkana ar uni tạmbure ạuriye bolokʼ hạbicʼ uni secʼko beṅgetʼkakʼ kan tahẽkana.

⁹ Mose ona tạmbure bolo tayom rimil khunṭi do pheḍ hijukʼkan tahẽkana ar Probhu Isor tin hạbicʼ Mose tulucʼe galmaraoetʼ tahẽkan unhạbicʼ ona do duạr ṭhenge tahenkan tahẽkana.

¹⁰ Ar hoṛko tinre noa khunṭi tạmbu ṭhenko ńeletʼ tahẽkana unre joto hoṛ apan ạpin tạmbu reakʼ duạr ṭhen otre ombakʼkate Probhu Isorko sewawaekan tahẽkana.

¹¹ Manwa cetʼleka gate sãote samna sạmni kathako roṛ ṭhik onkage Probhu Isor hõ Mose tulucʼe galmaraoetʼ tahẽkana. Ar noa tayom Mose do Israelkoakʼ ḍerateye ruạṛ senokʼkan tahẽkana menkhan Nunren hopon Josuạ do ńapamokʼ tạmbu khon bae oḍokokʼkan tahẽkana. Ente Josuạ ńutuman nui juạn koṛa do Moseren gokʼṛoyicʼe tahẽkana.

Mose ṭhen Probhu Isorakʼ gokʼakʼ

¹² Mose do Probhu Isore metadea, “Am do noko hoṛko idikom metadiń tahẽkana, menkhan iń tulucʼ okoeyem kolea ona do bam lạiyạń kana. Am dom men akada ińren lekageń baḍaeakatʼmea ar ińre amakʼ daya hõ menakʼa.

¹³ Amakʼ dayań ńamakatʼ khan tobe do amakʼ hor baṛe udukʼạńme jemoniń baḍae daṛeakʼ am samaṅre dayań ńama mente. Disạime, noko jạtrenko do amren kangeako.”

¹⁴ Probhu Isore roṛ ruạṛketʼa, “Ińge am sãoteń calakʼa ar amiń jirạu ocomea.”

¹⁵ Mose do uniye metadea, “Iń sãote bam calakʼ khan nonḍe khon do alom kolkalea.

¹⁶ Ale sãote bam senlen khan cekatele baḍaea, amakʼ daya do iń ar amren hoṛko cetanre menakʼa mente? Iń ar amren hoṛko dhạrtiren eṭakʼ hoṛko khonle begarge ona do cekatele bujhạu daṛekea?”

¹⁷ Unre Probhu Isor do Moseye metadea, “Am okam menketʼ onageń onkaea, ente ińakʼ daya do am cetanre menakʼa ar am do ińren mentegeń baḍae akatʼmea.”

¹⁸ Moseye menkeda, “Enḍekhan amakʼ ṭhonok baṛe ńel ocoyińme.”

¹⁹ Probhu Isore menkeda, “Iń do ińakʼ sanam ṭhonokiń udukʼama. Ar am samaṅre ińakʼ ‘Probhu Isor’ ńutumiń lại jạhira. Ińakʼ sanaleka okoeyiń dayawae unigeń dayawaea, ar okoe hoṛ iń mãyãwae, unigeń mãyãwaea.

²⁰ Menkhan am do ińakʼ mẽtʼãhã bam ńel daṛeakʼa, ente iń ńel tayom do okoe hõ jiwetʼ ohoko tahẽdaṛelena.”

²¹ Ona tayom Probhu Isore menkeda, “Iń ṭhen niạ ṭhạ̃i secʼ beṅgetʼkate ńelme. Ar ona huṭupʼ dhiri cetanre senkate teṅgokʼme.

²² Ińakʼ ṭhonok tinre am samaṅte parom calakʼa unre am do buru reakʼ paṛakʼreń oko dohokama ar iń ạuriń parom calakʼ hạbicʼ ińakʼ titeń aḍ esetʼkama.

²³ Ona tayom ińakʼ tiyiń ocokʼle khan am do ińakʼ tayom secʼem ńela, menkhan ińakʼ mẽtʼãhã do baṅ ńelokʼa. ”