Exodus 32 - সান্তালী বাইবেল

Sonaren mĩhũ hopon

¹ Mose do buru khon pheḍ hijukʼe bilometʼkana menteko ńelketʼ khan hoṛko do Aron beṛhaete jarwayenteko metadea, “Hor udukʼ abon lạgitʼ am do debotako benao abonme ente Misor disạm khon okoeye oḍok ạguketʼ bon, uni Moseyakʼ cetʼ hoyakana ona do babon baḍae kana.”

² Aron do roṛ ruạṛatʼkoteye metatʼkoa, “Aperen bạhuko ar aperen hoponko ar hoponerakoakʼ lutur reakʼ sona pagrako totʼkate iń ṭhen ạguipe.”

³ Onko do jotoge akoakʼ lutur reakʼ pagra totʼkate Aronko emadea.

⁴ Aron do onkoakʼ ona saj bajkoe galao ocoketʼte chańcreye dulketʼa ar mitʼṭen mĩhũ muṭhạne benaokedea. Ona ńelte Israelko doko menkeda, “E boehako, aperen debotako do nuirege menakʼkoa. Misor disạm khon noko debotage ape doko oḍok ạguakatʼpea.”

⁵ Niạ ńelte Aron do uni mĩhũ samaṅre mitʼṭecʼ pinḍe benaokeda ar noae lại jạhirkeda, “Gapa do Probhu Isor ńutumte porob hoyokʼa.”

⁶ Ar dosar hilokʼ hoṛko do ạḍi setakʼre beretʼkate jeredokʼ samaṅokʼakʼ ar sulukren samaṅokʼakʼ porobko porobena. Ar ona tayom do jojomko duṛupʼena ar enecʼ-khilḍukʼ lạgitʼko beretʼena.

⁷ Onate Probhu Isor do Moseye metadea, “Am do latarte pheḍ calakʼme. Amren hoṛko okoe do Misor disạm khonem oḍok ạguakatʼko onko doko kharap caba akana.

⁸ Onko do ińakʼ hukum khon pharakteko senakana. Onko do ako lạgitʼ mitʼṭen mĩhũ muṭhạnko benao akawana. Ar otre ombakʼkate uniko ḍobokʼae kana ar uni ńutumte janwar dãṛẽko samaṅetʼkoa arko meneda, ‘E boehako, nuirege aboren debota do menakʼkoa. Noko debotage Misor disạm khonko oḍok ạguakatʼ bona.’ ”

⁹ Probhu Isor do Mose arhõe metadea, “Noko hoṛ doń baḍae akatʼko tahengea. Noko do keṭecʼ hoṭokʼan jạt kanako.

¹⁰ Am do alom tạkicʼ daramińạ. Onko upạrte ińakʼ edre do seṅgel leka jolokʼ kantińạ. Iń do onkoń jarkhar cabakoa. Ar ona tayom do am hotete mitʼṭecʼ maraṅ jạtiń hoyocokoa.”

¹¹ Unre Mose do acʼren Probhu Isor ṭhen nehõrenteye menkeda, “E Probhu Isor, amakʼ daṛeanakʼ ti tiạrkate okoe do amakʼ maraṅ daṛete Misor disạm khonem oḍok ạguakatʼko onko amren hoṛko cetanre cedakʼ nunạkʼ dom edrekʼ kana?

¹² Ar Misorrenko do niạ katha roṛ reakʼ cedakʼ ạtko ńama, dhạrti khon meṭaoko lạgitʼ am do noa buru ṭoṭha talarem oḍok ạgu akatʼkoa? Amakʼ noa botoranakʼ edre do thirtam. Dayakʼme, amren hoṛko cetanre noa muhin do alom ạguiya.

¹³ Amren guti Abraham, Isạhak ar Israelakʼ katha hudisme. Amakʼ ńutumte kiriạkatem metatʼko tahẽkana, onkoren bõs do sermaren ipilko lekam saṅgekoa ar amakʼ gokʼakʼ disạm do jaejug reakʼ ạidạri lekate onkoren hoponkom danakoa.”

¹⁴ Niạ katha ańjomkate Probhu Isor do daya hecʼadea. Uniren hoṛko cetanre oka muhin ạgui reakʼ kathae menletʼ ona do ar bae ạguleda.

¹⁵ Ona tayom Mose do goha reakʼ banar cạkti dhiriwante buru khone pheḍ hecʼena. Ona dhiri cạktikin reakʼ dene banarsage ol tahẽkana.

¹⁶ Onare Isorakʼ titeakʼ kạmi tahẽkana, ar ona cetanre rokʼ caṛhao akatʼ olhõ uniyakʼge tahẽkana.

¹⁷ Josuạ do hoṛkoakʼ andoṛ ańjomkate Moseye metadea, “Ḍera khon lạṛhại reakʼ sabad ańjom hijukʼ kana.”

¹⁸ Moseye roṛ ruạṛkeda, “Lạṛhạire jitạu reakʼ hoho andoṛ do baṅkana, ar lạṛhạire bhagaoen reakʼ kạumạu reakʼ andoṛ hõ baṅkana. Iń okaṭakʼ iń ańjometʼkan ona do sereń reakʼ aṛaṅkana.”

¹⁹ Ona tayom Mose do ḍera sore senen khan uni mĩhũ ar hoṛko enejokʼkane ńelketʼkoa. Ona ńelte Mose do edreteye seṅgelena ar ti reakʼ dhiri cạkti kine tawakʼkeda. Onate ona dhiri cạktikin do buru latarte ńurente rạputʼena.

²⁰ Ar onkoko benao akade uni mĩhũ do seṅgelreye khadlekadea. Ar uniye gejerkedete dakʼreye giḍikeda ar Israelko ona dakʼe ńu ocoketʼkoa.

²¹ Ar Arone metadea, “Onko do cetʼko cekaletʼtamte, nonkan bạṛicʼ kại secʼem ạyurketʼkoa?”

²² Arone roṛ ruạṛkeda, “Alom edrekʼa, am dom baḍaegea noko hoṛ do bạṛicʼreko jobe akana.

²³ Onko do hecʼkateko metadińạ, ‘hor udukʼ idi abon lạgitʼ mitʼṭen debota benao abonme, ente uni Mose, okoe do Misor disạm khone oḍok ạguakatʼ bon uniyakʼ cetʼ hoyakana ona do babon baḍaekana.’

²⁴ Ar niạ katha ańjomkate onkoń metatʼkoa, okoekoakʼ sona pagra menakʼtape onko do ona totʼkate iń ṭhen ạguiype. Ar onko do ińko ạguạdiń khan seṅgelre onań galao ocokeda ar sonaren mĩhũye oḍok hecʼena.”

²⁵ Mose do hoṛko bhiṅgṛạu akana menteye ńelketʼkoa. Uni doe bujhạukeda Arongeye bhiṅgṛạu ocoakatʼkoa ar onate bạiri ṭhen cigạri ocokʼ lek ko hoyakana.

²⁶ Mose do ḍerate bolokʼ horre teṅgoyenteye menkeda, “Probhu Isor secʼ okoe menakʼpe ape do iń ṭhen hijukʼpe.” Onate Liwi gusṭiren sanamkoge uni ṭhenko jarwayena.

²⁷ Unre uni do onkoe metatʼkoa, “Israelren Probhu Isore meneda, ‘ape mimitʼko apan ạpin ḍanḍare tarwaṛe rebedpe, ar ḍera reakʼ sanam ṭhạ̃ire senkate jãhãege samaṅrepe ńamko onkope gocʼkoa, baṅ doe boeha kan, baṅ doe gatekan, baṅ doe aḍepaseren hoṛkan.’ ”

²⁸ Liwiko do Moseyakʼ hukum lekageko kạmikeda. Onate enhilokʼ do pe hajar hoṛko gocʼ ocoyena.

²⁹ Ona tayom Moseye menkeda, “Teheńge Probhu Isor ńutumte begar dohokʼpe, ente apan ạpin hoponko ar boehako upạrte teṅgokʼ hõ bape pạclena. Ona iạte teheń ape do Probhu Isorakʼ bhorpe ńamkeda.”

³⁰ Dosar hilokʼ Mose do hoṛkoe metatʼkoa, “Ape do ạḍipe kại akada. Menkhan ńit Probhu Isor ṭhen iń rakapʼ calakʼ kana. Hoedaṛeakʼ apeakʼ puruchun reakʼ mitʼṭecʼ bondobos iń hoeocoya.”

³¹ Mose do Probhu Isor ṭhen ruạṛ senkateye menkeda, “Hae, hae Probhu Isor! Noko hoṛ do ḍhergeko ghạṭ akada. Onko do ako lạgitʼ sonaren debotako benao akawana.

³² Menkhan ńitokʼ do ma dayakate onkoakʼ ghạṭko ikạ katakom, ar bam onkawako khan amakʼ puthi khon ińakʼ ńutum baṛe meṭao giḍikakʼme.”

³³ Probhu Isor do Moseye metadea, “Okoe iń upạrteko kại akatʼ eken onkoakʼ ńutumge ińakʼ puthi khoniń meṭao giḍikatakoa.

³⁴ Ańjomme, iń okaṭakʼ jaega reakʼ kathań roṛakatʼ ńitokʼ am do senkate hoṛko onḍe idikom. Ińren goḍet do hore udukʼ idiapea. Ar tinre sạjại reakʼ okte hijukʼa unre onkoń sạjạikoa.”

³⁵ Arone benao akade mĩhũ iạte hoṛko okako cekaketʼ onate Probhu Isor do onko cetanre maraṅ okocʼ muhine kolkeda.