Exodus 31 - সান্তালী বাইবেল

Besalel ar Oholiab

¹ Ona tayom Probhu Isor do Moseye metadea,

² “Ńelme, iń do Jihudạ gusṭiren Uriren hopon Besalel iń bachao akawana. Uri do Hurren hopone tahẽkana.

³ Iń do Besalelge ińren Jiuteń perecʼ akadea. Uni do ạkilte, bujte, bidiạte ar sanam lekan kạrigol kạmi reakʼ daṛeń emakawadea.

⁴ Onate uni do acʼakʼ mon khon hudiskate sona, rupạ ar pitạl cetanre mońj mońj noksakoe benao daṛeakʼa,

⁵ ar damanakʼ dhiriko ged ar onare rokʼ bạisạu ar kaṭ reakʼ eṭakʼ sanam lekan kạmiko hõe kạmi daṛeakʼa.

⁶ Ona chaḍa uni goṛowae lạgitʼ iń do Dan gusṭiren Ahisamak hopon Oholiab hõń bachao akawana. Ar okoe gạkhuṛ kạrigolko noako kạmi onko hõ nonkan ạkiliń emakawatʼkoa jemon amiń emakawatʼme hukum leka onko hõ sanamakʼko kạmi daṛeakʼ. Noako jinis do hoyokʼkana:

⁷ Ńapamokʼ tạmbu, goha sinduk ar ona cetan reakʼ ḍhakna, tạmbu reakʼ sanam asbabko,

⁸ ṭebil ar ona sãoteakʼ jinisko, khạṭi sona reakʼ diuhe dohowakʼ ar ona reakʼ jinisko, dhudhup pinḍ,

^9-10 jeredokʼ samaṅokʼakʼ pinḍ ar ona reakʼ thạri-bạṭiko, bhajanko ar ona reakʼ ganḍoko ar naekeakʼ kạmi lạgitʼ Aronakʼ sonot kicricʼ ar uniren hoponko lạgitʼ kicricʼko.

¹¹ Ojokʼ bahalokʼ lạgitʼ sunum ar sonot ṭhạ̃ire lạgitʼ jut so dhupko. Ar amiń hukum akawatʼme leka onko do jemon onako benao daṛeakʼ.”

Jirạukʼ mãhã reaṅ

^12-13 Ona tayom Probhu Isor do Mose Israelko niạ katha galmaraoako lạgitʼe metadea, “Ape do ińakʼ jirạukʼ mãhãpe manaoa. Noa jirạukʼ mãhã do piṛhike piṛhi ape ar iń talare nonkan mitʼṭecʼ cinhạ hoyokʼa onatepe bujhạu daṛeakʼa, ińkangeạń Probhu Isor do ar ińge iń ńutumteń begar dohoakatʼpea.

¹⁴ “Jirạukʼ mãhã manaope, ente ape lạgitʼ noa din do iń ńutumteń begar dohoakada. Ar jãhãe noa din bae manao enḍekhan uni doe gocʼ ocokʼa; ar jãhãe niạ dinreye kạmi enḍekhan uni do acʼakʼ jạtrenko khone meṭao giḍi ocokʼa.

¹⁵ Ape do hapta reakʼ turui dinpe khaṭaokʼa menkhan eaeakʼ din do jirạukʼ dinge, ona do Probhu Isor ńutumte mitʼṭecʼ begar akan din kana. Ar jãhãe ona dinreye kạmi enḍekhan uni doe gocʼ ocokʼa.

¹⁶ Israelko do mitʼṭecʼ jaejugakʼ bondobos lekate niạ jirạukʼ mãhã do piṛhike piṛhiko palona.

¹⁷ Niạ din do iń ar Israelko talare jaejug lạgitʼ mitʼṭecʼ cinhạ kana, ente iń do turui dinre serma ar ot iń sirjạu akada ar eae din hilokʼre do cetʼ hõ bạń kạmileda.”

¹⁸ Sinại buru cetanre Mose ṭhen niạko kathae roṛ mucạtʼketʼ khan Probhu Isor do goha reakʼ barea dhiri cạktiye emadea. Isor do noakin dhiri cạktire acʼakʼ kạṭupʼte hukume olleda.