Exodus 30 - সান্তালী বাইবেল

Dhudhup reakʼ pinḍ

¹ “Dhup jered lạgitʼ am do gabla kaṭte mitʼṭecʼ pinḍem benaoa.

² Ona reakʼ jeleń do mitʼ moka, osar do mitʼ moka ar usul do bar moka. Dereń sudhạ goṭa pinḍ do mitʼṭen jinisge hoyokʼa.

³ Pinḍ reakʼ chat ar bhit reakʼ beṛhaete ar dereńko do sonatem tol ocoya ar ona beṛhaete do sona reakʼ noksam benao ocowakʼa.

⁴ Pinḍ banarsa aṛe noksa latarre bareakate sona reakʼ kạṛim benao ocowakʼa jemon ona bhitrite ḍaṅkin gutukate gokʼ idikʼ.

⁵ Ona ḍaṅkin do gabla kaṭ reakʼem benao ocoya ar sonatem tolkakʼa.

⁶ Goha tạmbu ṭhen, metakʼme gohawakʼ cetanre menakʼ daya duṛupʼakʼ ṭhen oka orwal tahen ona samaṅre noa pinḍem dohokakʼa; ar iń do onḍege am sãoteń ńapamokʼa.

⁷ “Dinạm hilokʼ setakʼre diuhe reakʼ mạlikoe jutre Aron do pinḍ cetanre jut so reakʼ dhupe jereda.

⁸ Ar ńuhumokʼ jokhecʼ diuhe jol oktere uni do arhõ ona dhupe jereda. Onate aperen bõsko do piṛhike piṛhi Probhu Isor samaṅre jaoge dhup jered hoyokʼtakoa.

⁹ Ar niạ pinḍ cetanre eṭakʼ jãhãn dhup do alom jereda se jãhãn jeredokʼ samaṅokʼakʼ se anaj samaṅokʼakʼ se coḍor samaṅokʼakʼ hõ alom samaṅa.

¹⁰ Puruchun lạgitʼ kại ńutumte samaṅokʼakʼ mãyãm do pinḍ reakʼ dereńkorem ojokʼakʼa ar Aron do bochorre mitʼ dhao pinḍe saphaea. Ar nonkate maraṅ naeke do piṛhike piṛhi bochorre mitʼ dhao noa kạmi hoyokʼtaea. Noa do Probhu Isor ńutumte sonot utạrakʼ pinḍ kana.”

Jiwi reakʼ dam

¹¹ Ona tayom Probhu Isor do Moseye metadea,

¹² “Israelren hoṛkoakʼ lekha baḍae lạgitʼ tinre hoṛ-lekha hoyokʼa unre mitʼke mitʼ hoṛ do rupạte jiwi reakʼ dam Probhu Isor emae hoyokʼtakoa. Onate hoṛ lekha khạtirte oka muhinre paṛaokʼ reakʼ katha ona do onkore baṅ hijukʼa.

¹³ Lekha akan hoṛkoakʼ dolte calakʼ ạurire mimitʼ hoṛ do gel gram ojon reakʼ dhorom sekel reakʼ adha sekelkate emokʼ hoyokʼtakoa. Ar niạ adha sekel do Probhu Isorakʼge hoyokʼa.

¹⁴ Okoe lekha akan dolteye bolokʼ, metakʼme okoeyakʼ umer do bargel bochor se ona khon bạ̃ṛti, uni do noa Probhu Isor emae hoyokʼtaea.

¹⁵ Jiwi reakʼ dam lekate Probhu Isor noa emae jokhecʼ kisạ̃ṛko hõ adha sekel khon bạ̃ṛti emokʼ baṅ lagaoakoa, ar reṅgecʼko hõ inạ khon kom do baṅ emokʼ hoyokʼtakoa.

¹⁶ Israelko ṭhen khon jiwi-dam reakʼ rupạ hataokate ona do ńapamokʼ tạmbu reakʼ kạmire beoharokʼa. Noa jiwi-dam oka do apeakʼ jiwi bodolte emokʼ hoyokʼ ona do Probhu Isor samaṅre Israelkoakʼ mitʼṭecʼ dikʼsạwakʼge hoyokʼtakoa.”

Ti-jaṅga ạbukokʼ reakʼ hanḍha

¹⁷ Ona tayom Probhu Isor do Moseye metadea,

¹⁸ “Ti-jaṅga ạbukokʼ lạgitʼ pitạl reakʼ mitʼṭecʼ hanḍha ar ona doṛomkakʼ lạgitʼ pitạl reakʼ mitʼṭecʼ ganḍom benao ocoya. Ńapamokʼ tạmbu ar pinḍ reakʼ adha ṭhạ̃ire onam doṛom ocokoa ar onare dakʼem dohoya.

¹⁹ Ona dakʼte Aron ar uniren hoponko do ti-jaṅgako ạbukokʼa.

^20-21 Ar jemon aloko gujukʼ ona iạte ńapamokʼ tạmbure bolokʼ lahare onko do ona dakʼte ti jaṅgako ạbuk saphakʼa. Onko do Probhu Isor ńutumte seṅgelteakʼ jeredokʼ samaṅokʼakʼre uni sewawae lạgitʼ pinḍ ṭhen calakʼ lahare hõ ti jaṅgako ạbuk saphakʼa jemon aloko gujukʼ. Nonkage Aron ar uniren hoponko lạgitʼ noa do piṛhike piṛhi jaejugakʼ mitʼṭecʼ niạmge hoyokʼa.”

Ojokʼ bahalokʼ reakʼ sunum

²² Ona tayom Probhu Isor do Moseye metadea,

²³ “Am do soros sorosakʼ jut so mosolako, metakʼme mõṛẽ keji gondhoros, bar keji tala jut so darcini, bar keji tala boc,

²⁴ ar mõṛẽ keji kidạmem hataoa. Ona chaḍa jạitun sunum hõ pe liṭar talam hataoa.

²⁵ Jut so jinis tear leka am do noako jut so mosola mitʼ sãote mesalkate ojokʼ bahalokʼ lạgitʼ sunumem benaoa. Ar noage sonot ojokʼakʼ sunum do hoyokʼa.

²⁶ Noa ojokʼakʼ sunumte am do ńapamokʼ tạmbu, goha sinduk,

²⁷ ṭebil ar ona cetan reakʼ jinisko, diuhe dohowakʼ ar ona reakʼ sapapʼakʼ, dhup-pinḍ,

²⁸ jeredokʼ samaṅokʼakʼ pinḍ ar ona reakʼ sanam bhajanko ar ganḍo sudhạ hanḍha hõ iń ńutumtem begar dohokakʼa.

²⁹ Onate onako do sonot utạrakʼ jinis hoyokʼa. Onare okaṭakʼ jagokʼ onage iń ńutumte begar hoyokʼa.

³⁰ “Aron ar uniren hoponko naeke hoekate jemon ińko sapʼsorạń onate onkom ojokʼ bahalkoa ar iń ńutumtem begar dohokoa.

³¹ Am do Israelkom baḍae ocokoa je, piṛhike piṛhi onkoakʼ sonot ojokʼakʼ sunum do noage hoyokʼa.

³² Disạmren hoṛkoakʼ hoṛmore ona sunum jemon alo ojogokʼ ar onako mosolate noa niạm lekate sunum hõ jemon aloko tearma. Noa sunum do sonotakʼ kana; onate onko hõ ona leka bujhạu hoyokʼtakoa.

³³ Ar jãhãege nonkan jut so mosolae tear se naeke chaḍa ar jãhãeakʼ hoṛmore ojogokʼ enḍekhan uni do acʼakʼ jạtrenko khone meṭao ocokʼa.”

Jut so mosolako

^34-35 Ona tayom Probhu Isor do Moseye metadea, “Am do jut so mosola, metakʼme goglu, nothi, kunduru ar Lobanem hataoa. Am do noako reakʼ soman somanem hataoa arem sipi mesala ar jut so dhupem benaoa. Ar okoe jut so jinisko tear onko hotete noam kạmi ocoya. Onare buluṅ hõm emakʼa; noare jãhãn bhejalakʼ alo tahenma ona do sonotakʼge hoyokʼma.

³⁶ Noa reakʼ thoṛa hataokate onam gunḍạea ar ńapamokʼ tạmbure goha-paṭa samaṅrem dohoya. Ar iń do onḍe am sãoteń ńapamokʼa. Ar noa dhup do sonot utạrakʼ jinis mentem bujhạua.

³⁷ Okoehõ noa niạm lekate apnar beohar lạgitʼ niạko mosolate jãhãn dhup aloko benao joṅ ma. Ente noa do Probhu Isor ńutumte begar dohoakana ar onape disạ dohokakʼa.

³⁸ Jut so jinis lekate beohar lạgitʼ jãhãe onae benao joṅ enḍekhan uni do acʼakʼ jạtrenko khone meṭao ocokʼa.”