Exodus 3 - সান্তালী বাইবেল

Isor do Moseye hohoaekan

¹ Mitʼ din Mose do acʼren hońhartetʼ Jethro, metakʼme Ruelren bhiḍi-meromkoe gupiyetʼko tahẽkana. Jethro do Midiankoren mitʼṭen naekeye tahẽkana. Mose do hahaṅkar hanasate bhiḍi-meromko gupi gupite Isorakʼ Horeb buruteye seṭerketʼkoa.

² Onḍe Probhu Isorren mitʼṭen goḍet do jạnum jhạuạre jolokʼkan seṅgelre uni ṭhene ńel ocoyena. Mose doe ńelkeda, ona jạnum jhạuạre seṅgel do jolokʼkangea menkhan baṅ lokʼkana.

³ Noa ńelte mone moneteye menkeda, “Iń do mitʼ aṛere senkate noa hahaṛa reakʼ iń ńela, cedakʼ bhala ona jhạuạ do baṅ lokʼ kana?”

⁴ Mose do ona jạnum jhạuạ ńel lạgitʼe sen sorokʼkan tahẽkanre Probhu Isor do ona jạnum jhạuạ tala khone menkeda, “E Mose, E Mose.” Moseye menkeda, “Minạńgea.”

⁵ Probhu Isore menkeda, “Ar alom sorokʼa. Amakʼ jaṅga reakʼ panahe bojtam. Ente am do sonot ṭhạ̃irem teṅgo akana.

⁶ Iń do am babaren Isor kạnạń; ar iń kangeạń Abraham, Isahak ar Jakobren Isor do.” Unre Mose do acʼakʼ mẽtʼãhãe betʼketʼtaea, ente Isor secʼ beṅgetʼ doe botorena.

⁷ Probhu Isore menkeda, “Misor disạmre ińren hoṛko cetanre oka santao hoyokʼkan ona doń ńelakada. Misorren sordarkoakʼ santao iạte Israelkoakʼ rakʼ do iń ṭhen seṭerakana. Onkoakʼ duk saset reakʼ katha hõń baḍae akada.

⁸ Misorrenkoakʼ ti khon onko rukhiyạko lạgitʼ iń doń pheḍ hecʼakana. Iń do ona disạm khoniń oḍok ạgukoa ar Kananrenko, Hittirenko, Amorirenko, Pherisirenko, Hiwirenko ar Jebusirenkoakʼ disạmteń idikoa. Ona disạm do maraṅgea ar mońjgea; onḍe do toa ar dumur rasa reakʼ jãhãn okulạnge bạnukʼa.

⁹ Israelkoakʼ rakʼjoṅ do ńitokʼ iń ṭhen seṭer akana. Misorrenko ṭhen cetʼlekako santao ocokʼkan ona doń ńelakada.

¹⁰ Onate am do ńitge calakʼme. Iń do Pharao ṭheniń koletʼmea. Ar senkate am do ińren hoṛko, metakʼme Israelko Misor khonem oḍok ạgukoa.”

¹¹ Menkhan Mose do Isore metadea, “Iń do nonkan celegeń baṅkana, one Pharao ṭhen senkate Misor khon Israelkoń oḍok ạgu daṛeako.”

¹² Isore menkeda, “Ińge am sãoteń tahena. Am do Misor khon hoṛkom oḍok ạgukoa ar ape do noa burure ińpe sewawạńạ. Ar ińiń koletʼme noage uni ṭhen amakʼ cinhạ do hoyokʼa.”

¹³ Unre Mose do Isore metadea, “Menkhan tinre Israelkoń metakoa onkoren hapṛamkoren Isorge iń doe kolakadińa, unre hoedaṛeakʼa onko do ińko kuliyińạ, ‘cetʼ kana uniyakʼ ńutum do?’ Unre iń do cetʼ iń roṛ ruạṛakoa?”

¹⁴ Isor do Moseye metadea, “Menayicʼ doń iń kangea ‘Iń kangeạń uni do. Am do Israelkom metakoa, ‘Iń kangeạń’ ar ińge onko ṭheniń kol akatʼmea.

¹⁵ Am do arhõm metakoa, onkoren hapṛam Abraham, Isahak ar Jakobren Probhu Isorge onko ṭhene kol akatʼmea. Ińakʼ ńutum do jaejugicʼ Probhuge. Onko do piṛhike piṛhi ińakʼ noa ńutumgeko disạitińạ.

¹⁶ Am do senkate Israelkoren murubbiko jarwakatem metakoa, onkoren hapṛam Abraham, Isahak ar Jakobren Probhu Isorge am ṭhene ńel ocoakana are menakada, ‘ape cetanre’ar Misorre cetʼ hoyokʼkan ona doń ńelakada.

¹⁷ Ona iạteń meneda, Misor reakʼ santao khoniń oḍok idipea ar Kananrenko, Hittirenko, Amorirenko, Pherisirenko, Hiwirenko ar Jebusirenkoakʼ disạmteń idipea. Onḍe do toa, dumur rasa ar jãhãn cetʼ reakʼ reṅgecʼge bạnukʼa.’

¹⁸ “Israelkoren murubbiko do amakʼ kathako ańjomtama. Am ar onko do Misor raj ṭhen senkatepe mena, ‘Ibrikoren Probhu Isor do ale ṭhene ńel ocoakana are menakada. Dayakate sen ocoaleme, jemon ale do hahaṅkar talate pe din reakʼ horle senokʼte aleren Probhu Isor dãṛẽle samaṅ daṛeae.’

¹⁹ Ińiń baḍaea kajak tiye aṭkarlere hõ Misorren raj do ape bae aṛakʼpea.

²⁰ Onate iń do unire ińakʼ daṛeń uduga ar hahaṛa kạmiko hotete Misoriń ńẽda ar onate Pharao doe sen ocoapea.

²¹ Israelko cetanre Misorrenkoakʼ monre nonkan mitʼṭecʼ dayań janam ocoya jemon Misor khon oḍokokʼ jokhecʼ eken ti alope oḍok hijukʼ.

²² Sanam Ibri maejiuko do ạdepasere menakʼko Misorren maejiuko ṭhen khon sona, rupạ ar kicricʼkope koetoda. Ona tayom onako hataokate aperen hopon ar hoponerakope horokʼakoa. Nonkate Israelko do Misorrenkoakʼ jinisko ạidạri joṅa.”