Exodus 29 - সান্তালী বাইবেল

Isor ńutumte Naekeko begar dohoko

¹ “Naeke lekate jemon ińko sewawạń onate iń ńutumte onkom begar dohokoa. Am do mitʼṭen ḍaṅgra ar barea bheḍam hataokinạ. Onkoakʼ hoṛmore jemon jãhãn khũt alo tahen.

² Ona tayom mĩhĩ moeda reakʼ piṭhạko, sunum ojokʼakʼ piṭhạko ar thapṛa piṭhạkom benaoa. Noako reakʼ okaṭakʼre hõ khạmi do alom mesalakʼa.

³ Ar mitʼṭecʼ ḍạlicʼre onakom sajaoa ar uni ḍaṅgra ar bheḍakin sãote ḍạlicʼ hõ iń samaṅrem dohoya.

⁴ Ona tayom Aron ar uniren hoponko do ńapamokʼ tạmbu reakʼ duạr ṭhenem idikoa ar dakʼtem ạbuk saphakoa.

⁵ Tayomte ona bises kicricʼkoante Aron do bhitri reakʼ aṅgrop, ephod latarre horokʼ lạgitʼ jeleń aṅgrop, ephod ar koṛam-ḍhalwam horokʼaea. Ar gạkhuṛ tite benaoakʼ ḍanḍa reakʼ ḍombe sãote ephodem tolaea.

⁶ Ona tayom bohokʼ reakʼ dạhṛitem dạhṛiyea ar ona cetanre sona reakʼ sonot mukuṭem horokʼaea.

⁷ Ar ona tayom do ojokʼ bahale reakʼ sunum bohokʼrem dulaea arem ojokʼ bahalea.

^8-9 Uniren hoponko hõm ạgukoa ar kicricʼem horokʼakoa. Aron ar uniren hoponko hõ ḍanḍa totolakʼtem paṭhekoa. Ona tayom bohokʼ dạhṛitem dạhṛikoa. Nonkate Aron ar uniren hoponko do naeke hudạrem bahalkoa. Noa naeke hudạ do hok lekate jaejug hạbicʼ onkoakʼ bõsrege tahẽ akae tahena.

¹⁰ “Ar uni ḍaṅgra do ńapamokʼ tạmbu samaṅrem ạguyea, ar Aron ar uniren hoponko do uni ḍaṅgrawakʼ bohokʼre akoakʼ tiko dohoytakoa.

¹¹ Ona tayom ńapamokʼ tạmbu reakʼ duạr ṭhen Probhu samaṅre ḍaṅgram magea.

¹² Ar thoṛa mãyãmem hataoa ar kạṭupʼte pinḍ reakʼ dereńkom ojokʼakʼa ar sarecʼ mãyãm do pinḍ aṛerem dulkakʼa.

¹³ Ona tayom lacʼ poṭae dapal akatʼ itil ar im cetan reakʼ gantharko ar banar kunḍi ar onakinre menakʼ itil sudhạm hataoa ar onako do pinḍ cetanrem atar giḍikakʼa.

¹⁴ Menkhan uni ḍaṅgrawakʼ jel, harta ar gubriko do Israelkoakʼ ḍera barhete idikatem atar giḍikakʼa. Noa do kại ńutumte mitʼṭecʼ samaṅokʼakʼ kana.

¹⁵ “Ona tayom unkin bheḍakin modre mitʼṭenem ạguyea. Aron ar uniren hoponko do uni bheḍawakʼ bohokʼre akoakʼ tiko dohoytakoa.

¹⁶ Inạ tayom uni bheḍam mageya ar uniyakʼ mãyãm hataokate pinḍ beṛhaetem irciwakʼa.

¹⁷ Uni bheḍa do phạṛi phạṛim getʼ kuṭrạyea, ar uniyakʼ jaṅga ar lacʼ bhitri reakʼ hĩsko ạrupʼ saphakate bohokʼ cetanrem dohoya.

¹⁸ Inạ tayom do pinḍ cetanrem atar giḍikaea. Noa do Probhu Isor ńutumte mitʼṭecʼ jeredokʼ samaṅokʼakʼge, metakʼme Probhu Isor ńutumte seṅgelre mitʼṭecʼ samaṅokʼakʼge, one ona reakʼ jut so do uniye kusiyakʼ kan.

¹⁹ “Ar uni eṭagicʼ bheḍa hõm hataoea ar Aron ar uniren hoponko do uniyakʼ bohokʼ cetanre akoakʼ tiko dohoytakoa.

²⁰ Ar bheḍam mageya ar uniyakʼ thoṛa mãyãm hataokate Aron ar uniren hoponkoakʼ jojom lutur reakʼ gonḍare, jojom ti ar jaṅgạkin reakʼ buḍhạ kạṭupʼrem jotʼakoa. Ona chaḍa sarecʼ mãyãm do pinḍ beṛhaetem irciyakʼa.

²¹ Ona tayom ojokʼ bahalokʼakʼ thoṛa sunum ar pinḍ khon thoṛa mãyãm hataokate Aron ar uniren hoponkoakʼ kicricʼrem irciya. Onate kicricʼ sudhạ uni ar uniren hopon do iń ńutumteko begar ocokʼa.

²² “Ona tayom uni bheḍawakʼ itil, canḍbol reakʼ itil, lacʼ poṭa cetan reakʼ itil, im cetan reakʼ ganthar ar banar kunḍi ar onakinre menakʼ itil ar phạṛi akatʼ jojom bulu hõm hataoa. Nui do sid emokʼren mitʼṭen bheḍage.

²³ Ona tayom Probhu Isor samaṅre dohoakan bin khạmiyanakʼ piṭhạ ḍạlicʼ khon mitʼṭecʼ piṭhạ, mitʼṭecʼ sunum piṭhạ, ar mitʼṭecʼ thapṛa piṭhạm hataoa.

²⁴ Noako do Aron ar uniren hoponko tirem calakoa ar dolao samaṅokʼakʼ lekate Probhu Isor samaṅrem dolaoa.

²⁵ Ona tayom onkoakʼ ti khon hatao ruạṛkate pinḍ cetanre jeredokʼ samaṅokʼakʼ sãotem atar giḍikakʼa. Noa do Probhu Isor ńutumte seṅgelre mitʼṭecʼ samaṅokʼakʼge one ona reakʼ jut so do uniye kusiyakʼ kan.

²⁶ Aron naeke hudạre ojokʼ bahale reakʼ porobren nui bheḍawakʼ koṛam reakʼ hĩs hataokate dolao samaṅokʼakʼ lekate Probhu Isor samaṅre onam dolaoa. Ar noa do amakʼ bakhrage hoyokʼa.

²⁷ “Aron ar uniren hoponkoakʼ naeke hudạ bahal porobren sid emokʼren bheḍawakʼ khon hataoakʼ dolao samaṅokʼakʼ jel ar samaṅ akatʼ bulu reakʼ jel do Probhu Isor ńutumtem begar dohokakʼa.

²⁸ Nonkate Israelkoakʼ samaṅokʼakʼ sulukren sanam samaṅokʼakʼ niạko hĩs do jaoge Aron ar uniren hoponko em ocokʼa. Niạ hĩskoge Probhu Isor ńutumte Israelkoakʼ sandes do hoyokʼa.

²⁹ “Aronakʼ sonot kicricʼko do uniren hoponkoko ńama. Noa kicricʼ horokʼkatege onko do naeke hudạreko ojokʼ bahal ocokʼa.

³⁰ Aron tayom uniren okoeṭakʼ hopon do naeke lekate ńapamokʼ tạmbure sonot ṭhạ̃ire sewae lạgitʼe bolokʼa uni do eae din hạbicʼ inạ kicricʼge horokʼ akae hoyokʼtaea.

³¹ “Ar am do sid emokʼren nui bheḍawakʼ jel hataokate mitʼṭecʼ sonot ṭhạ̃irem teke isina.

³² Aron ar uniren hoponko do ńapamokʼ tạmbu reakʼ duạr ṭhen ḍạlicʼre doho akan piṭhạ sãote ona jelko joma.

³³ Naeke kạmire bahalko lạgitʼ ar iń ńutumte begar dohoko lạgitʼ oka samaṅokʼakʼ jomakʼ puruchun lạgitʼ beoharokʼ ona do Aron ar uniren hoponko jojom hoyokʼtakoa. Eṭakʼ hoṛ ona do bako jom daṛeakʼa, ente ona do sonotakʼ jomakʼ kana.

³⁴ Sid emokʼ reakʼ bheḍawakʼ jel se piṭhạ setakʼ hạbicʼ sarecʼ tahen khan ona do atar giḍikakʼ hoyokʼa. Okoehõ jemon aloko jom, ente ona do sonotakʼ jomakʼ kana.

³⁵ “Aron ar uniren hoponko cetanre okakoń hukumatʼme am do ona jotowakʼgem onkaea. Noa sid emokʼ porob do eae din hạbicʼem hoeocoya.

³⁶ Kại ńutumte puruchunokʼ lạgitʼ eae din hạbicʼ am do dinạmge mitʼṭenkate damkomem samaṅea. Kại ńutumte puruchunokʼ porob hotete pinḍem saphaea ar sunum dulkate iń ńutumte onam begar dohokakʼa.

³⁷ Pinḍ sapha ocoy lạgitʼ eae din hạbicʼ din hilokʼ puruchun porob hotete ona do iń ńutumtem begar dohoya. Ar onate pinḍ do sonot utạrokʼa. Onare jãhãnakʼge jagokʼ ona do iń ńutumte begar dohokʼa.

Din hilokʼ reakʼ Samaṅokʼakʼko

³⁸ “Ona tayom khon ona pinḍ cetanre dinạm hilokʼ bareakate bheḍa hopon samaṅ kin hoyokʼa; unkinakʼ umer do mitʼ bochor hoyokʼ jạṛurạ.

³⁹ Mitʼṭen do setakʼ jokhecʼ ar eṭagicʼ do ńuhumokʼ jokhecʼ samaṅkin hoyokʼa.

⁴⁰ Pạhil bheḍa sãote do mitʼ keji irạl sae gram mĩhĩ holoṅ ar koṭecʼ roḍocʼakʼ mitʼ liṭar jạitun sunum sãote mesalkate samaṅ hoyokʼa. Ona chaḍa coḍor lạgitʼ mitʼ liṭar darkha rasa hõ samaṅ hoyokʼa.

⁴¹ Ńuhumokʼ jokhecʼ okoeṭakʼ bheḍam samaṅe uni sãote setakʼ oktere lekage anaj ar coḍor samaṅokʼakʼ hõ samaṅ hoyokʼa. Noa do Probhu Isor ńutumte seṅgelre samaṅokʼakʼ kana one ona reakʼ jut so uni doe kusiyakʼ kan.

⁴² “Piṛhike piṛhi hạbicʼ ńapamokʼ tạmbu reakʼ duạr ṭhen Probhu Isorakʼ, metakʼme iń samaṅre noa jeredokʼ samaṅokʼakʼ do jaoge samaṅ hoyokʼa. Ar iń do onḍege ape sãoteń ńapamokʼa ar am tulucʼ iń galmaraoa.

⁴³ Israelko sãote onḍegeń ńapamokʼa ar ińakʼ ṭhonok do ona ṭhạ̃iye begar dohokakʼa.

⁴⁴ “Ńapamokʼ tạmbu ar pinḍ do iń ńutumteń begar dohokakʼa ar naeke lekate iń sewawạń lạgitʼ Aron ar uniren hoponko hõ iń ńutumteń begar dohokoa.

⁴⁵ Iń do Israelren Isor hoekate onko talareń girobasokʼa.

⁴⁶ Ar unreko baḍae daṛeakʼa, iń kangeạń onkoren Probhu Isor do. Iń do onko talareń tahen lạgitʼte Misor disạm khoniń oḍokʼ ạgu akatʼkoa. Ar iń Probhuge onkoren Isor kạnạń.