Exodus 28 - সান্তালী বাইবেল

Naeke reakʼ kicricʼko

¹ “Am do Israelko mod khon amren boeha Aron ar uniren hoponko Nadab, Abihu, Eliasar ar Ithamor am ṭhenem hoho ạgukoa. Onko do naeke lekate ińko dewa sewawạńạ.

² Manot ar sajaokʼ lạgitʼ am do amren dadam Aron lạgitʼ sonot kicricʼem benao ocoaea.

³ Ar okoe gạkhuṛ kạrigolko akel emokʼicʼ jiuteń perecʼ akatʼko, onkom metakoa jemon onko do Aron lạgitʼ kicricʼko benaote naeke lekate iń sewawạń lạgitʼe begar doho ocokʼ.

⁴ Uniyakʼ noa kicricʼre jemon koṛam aḍokʼakʼ, ephod, oyon aṅgrop, onol bonol kicricʼ kuṭrạ, dạhṛi ar ḍanḍare paṭheteakʼ tahen. Ar amren dadam Aron ar uniren hoponko hõ jemon naeke lekate ińko sewawạń onate onko lạgitʼ sonot kicricʼkom benao ocoya.

⁵ Ar kicricʼ benao kạmire onko do jemon sona, nil, beguni ar jeṅgetʼ arakʼ sutạm ar mĩhĩ musni sutạmko beohar ma.

Ephod

⁶ “Ephod do sona, nil, beguni ar jeṅgetʼ arakʼ sutạm ar uńakʼ mĩhĩ musnạ sutạmtem benao ocokoa. Noa do mitʼṭen gạkhuṛ kạrigolakʼ ti reakʼ kạmige baṛe hoyokʼma.

⁷ Ephod do tarenre tol dohokakʼ lạgitʼ barea phitạ benao ocokate ephod reakʼ banar konacrem tol joṛao ocokoa.

⁸ Ar ephod sãote joṛao akatʼ ḍanḍa reakʼ cõhõk bedhaoakʼ hõ ephod lekage sonate, nil, beguni ar jeṅgetʼ arakʼ sutạm ar uńakʼ mĩhĩ musnạ sutạmtem benao ocokoa.

⁹ Am do barea boidorjomoni dhirite ona cetanre Israelren hoponkoakʼ ńutumem galaṅ ocoya.

¹⁰ Onkoakʼ janam lekage turui goṭecʼ ńutum do mitʼṭecʼ dhirire ar sarecʼ turui goṭecʼ ńutum do eṭakʼ dhirirem rokʼ caṛhao ocokoa.

^11-12 Kạrigolko damanakʼ dhirire cetʼlekako rokʼ caṛhao arko mohor chapakʼ ṭhik onkage onakin dhiri cetanre Israelren hoponkoakʼ ńutumem rokʼ caṛhao ocoytakoa. Banar boidorjomoni dhirige sona reakʼ jhạńjri cetanre bạisạukate taren reakʼ phitạ sãotem tol doho ocokoa. Noa banar dhiri do Probhu Isor samaṅre Israelkoe udukʼkoa. Ar Probhu Isor jemon onko secʼe beṅged onate Aron do Probhu Isor samaṅre noa ńutumko acʼakʼ banar taren cetanreye ladekakʼa.

^13-14 Sonate benaoakʼ ona paṭetʼ galaṅakʼ sãote barea sikṛim joṛao ocokoa. Ar sikṛi do khạṭi sona reakʼ baber leka uńkatem benao ocokoa.

Koṛam reakʼ aḍokʼakʼ

¹⁵ “Ińakʼ hukum baḍae lạgitʼ koṛam aḍokʼakʼem benao ocoya. Noa do mitʼṭen gạkhuṛ kạrigolakʼ ti reakʼ kạmige baṛe hoyokʼma. Ephod leka noa hõ sonate, nil, beguni ar jeṅgetʼ arakʼ sutạm ar uńakʼ mĩhĩ musnạ sutạmtem benao ocoya.

¹⁶ Noa do jeleńte mitʼ bitạ ar osarte mitʼ bitạ mitʼṭecʼ ponon konac lạṭum mitʼakatʼ kicricʼge tahena.

¹⁷ Noa cetanre pon sạrte damanakʼ dhirikom bạisạu ocoya. Pạhil sạrre do cuni, podmorag ar morokot;

¹⁸ dosarakʼ sạrre do pitmoni, nilkanto ar hirạ;

¹⁹ tesarakʼ sạrre do peroj, tamro, ar koṭahela,

²⁰ ar ponakʼ sạrre do gomedok, boidurjo ar surjokanto moni. Ar mạnik dhiriko do galaṅ paṭetʼ akatʼ sona cetanrege bạisạu dohoy hoyokʼa.

²¹ Israelren gelbar goṭen hoponko lạgitʼ jotote gelbar goṭecʼ mạnik dhiriko tahena. Ar ona reakʼ mimitʼ goṭecʼre gelbar khũṭren mitʼṭecʼkate ńutum do rokʼ caṛhao hoyokʼa, mohor chapakʼ lekage.

²² “Noa koṛam aḍokʼakʼ lạgitʼ khạṭi sona do baber leka uńkate barea sikṛim benao ocoya.

²³ Ar sona reakʼ barea kạṛi benao ocokate koṛam aḍokʼakʼ cetan reakʼ banar konacrem lagao ocoya,

²⁴ ar banar sikṛige ona banar kạṛi sãotem gakʼkakʼa.

²⁵ Ephod reakʼ samaṅ secʼ taren reakʼ phitạ cetanre sona reakʼ oka jhạńjri tahen ona jhạńjri sãote sikṛi reakʼ eṭakʼ aṛerem aṭkaokakʼa.

²⁶ Ona chaḍa arhõ barea sona reakʼ kạṛi benao ocokate koṛam aḍokʼakʼ reakʼ eṭakʼ konacrem lagao ocoya. Noa banar do ephod ṭhen koṛam aḍokʼakʼ latarre tahena.

²⁷ Ona chaḍa arhõ barea sona reakʼ kạṛim benao ocoya ar ephod reakʼ taren phitạ sojhe latar secʼ ephod reakʼ ḍanḍa poṭi cetan reakʼ silại sãotem joṛaokakʼa.

²⁸ Ona tayom koṛam aḍokʼakʼ latarre oka kạṛi tahen ona sãote ḍanḍa poṭi reakʼ kạṛi do nil babertem tol ocokoa. Onate koṛam aḍokʼakʼ do ephod cetan khon baṅ ocogokʼa.

²⁹ “Sonot ṭhạ̃ite bolokʼ jokhecʼ Aron do ińakʼ hukum baḍae lạgitʼ noa koṛam aḍokʼakʼ cetanre olakan Israel hoponkoakʼ ńutum do koṛamreye lade joṅa. Noa koṛam aḍokʼakʼ do jao okte Probhu Isor samaṅre tahena.

³⁰ Koṛam aḍokʼakʼ reakʼ bhãj bhitrire uni do Urim ar Thumimem dohoya. Onate Aron do tinre Probhu Isor samaṅreye hạjirokʼa unre uniyakʼ koṛamre onakin tahena. Ar onate Aron do Probhu Isor samaṅre jao okte Israel hoponkoakʼ bicạrko acʼakʼ koṛamreye asen baṛaea.

Naeke reakʼ eṭakʼ kicricʼko

³¹ “Ephod latarre okaṭakʼ jeleń aṅgrop tahen ona do goṭage nil sutạmte benao hoyokʼa.

³² Ar bohokʼ bolokʼ lạgitʼ ona talare do jhicʼge tahena. Ar ona khạli jaega jemon alo oṛejokʼ onate ona reakʼ beṛhaete teńakʼ hoyokʼa.

³³ Nil, beguni ar jeṅgetʼ arakʼ sutạmte ḍạlim jo benaokate noa aṅgrop latarre ḍombeko beṛhaetem ṭamkurkakʼa. Ar onako talare sona reakʼ ghạnṭikom lagao ocokoa.

³⁴ Ar latar reakʼ ańcarre do mitʼṭecʼkate ḍạlim jo ar mitʼṭecʼkate ghạnṭiye sapʼ dohokakʼa.

³⁵ Probhu Isor sewawae jokhecʼ Aron do noa kicricʼgeye horoga. Uni do tinre sonot ṭhạ̃i samaṅreye calakʼa ar unre onḍe khone oḍok hijukʼa unre noa ghạnṭiko reakʼ saḍe ańjomokʼa ar onate uni do jiwi rukhiyạkʼtaea.

³⁶ “Mitʼṭecʼ khạṭi sona reakʼ pat benaokate ona cetanre mohor chap akatʼ leka noa kathakom rokʼ caṛhaoa, ‘Probhu Isor ńutumte begarakʼ mente.’

³⁷ Ona bata do dạhṛi samaṅ secʼre tahena ar ona do nil baberte tol tahena.

³⁸ Noa do Aronakʼ cạndire tahena. Ar Israelko oka jinis samaṅ lạgitʼko ạgui ona reakʼ sanam dos bojha do Aronge gogokʼ hoyokʼtaea. Probhu Isor jemon onkoe ataṅko onate Aronakʼ cạndi cetanre noa sona reakʼ pat do jao okte tahena.

³⁹ “Naekeakʼ bhitri aṅgrop do mĩhĩ musnạ kicricʼte benao hoyokʼa ar dạhṛi hõ ona mitʼ sutạmtege benao hoyokʼa. Ḍanḍa totolakʼ hõ mitʼṭecʼ noksa akatʼ jinisge tahena.

⁴⁰ “Manot ar sajaokʼ lekate am do Aronren hoponko hõ kicricʼko, ḍanḍa totolakʼko ar bohokʼ reakʼ dạṛhim benao ocoakoa.

⁴¹ Amren dadam Aron ar uniren hoponko noam horokʼakote sunumtem ojokʼkoa ar naeke hudạrem bahalkoa. Probhu Isor ńutumte onkom begar dohokoa jemon onko do naeke lekate ińko dewa sewawạń.

⁴² Ḍanḍa khon bulu hạbicʼ dapalokʼ lạgitʼ mĩhĩ musnạ kicricʼ reakʼ huḍiń penkom benao ocoakoa.

⁴³ Aron ar uniren hoponko tinre ńapamokʼ tạmbureko bolokʼa se sonot ṭhạ̃i reakʼ pinḍre sewa kạmi lạgitʼko laha idikʼa unre onko do noa kạṭicʼ penko horoga. Nonkate onko do bin dusạnko tahena ar bako gujukʼa. Aron ar uniren bõsko lạgitʼ noage mitʼṭecʼ niạm leka tahẽyena.