Exodus 26 - সান্তালী বাইবেল

Ńapamokʼ tạmbu

¹ “Ńapamokʼ tạmbu do gel goṭecʼ orwal kicricʼtem benaoa. Ona orwalko do ũńakʼ mĩhĩ musnạ sutạmte ar nil, beguni ar jeṅgetʼ arakʼ sutạmte benao hoyokʼa. Ar gạkhuṛ kạrigol hotete onare Kerubkoakʼ chubim dohoya

² Orwal do jotoge inạ mitʼ jokhagem benao ocoya, jeleń do bargel irạl moka ar osar do pon moka.

³ Orwalko do mõṛẽ goṭecʼ mõṛẽ goṭecʼkate mitʼ sãotem joṛao mitʼ ocoya onate ona do barea orwal hoyokʼa.

⁴ Pạhilakʼ maraṅ orwal reakʼ mitʼ aṛe osar secʼ do nil sutạmte gạlikom benaoakʼa. Ar dosarakʼ orwalre hõ ṭhik onkagem benao ocoya.

⁵ Nonkate pạhil maraṅakʼ orwalre mõṛẽgel goṭecʼ gạli ar dosarakʼ orwalre hõ mõṛẽgel goṭecʼ gạlikom benao ocoya. Ona banar maraṅ orwal reakʼ gạliko do mohnḍa muhnḍhige tahena.

⁶ Ona tayom mõṛẽgel goṭecʼ sona reakʼ bạkupʼakʼko benaokate onako do gạliko talate gutukate ona banar maraṅ orwal gakʼkakʼ hoyokʼa. Ar onakin banar maraṅ orwalte mitʼṭecʼ ńapamokʼ tạmbuge hoyokʼa.

⁷ “Ńapamokʼ tạmbu reakʼ cetan reakʼ hĩs dapal esetʼkakʼ lạgitʼ meromakʼ upʼte gelmitʼ goṭecʼ orwal kicricʼkom benao ocoya.

⁸ Ona orwal kicricʼko do jotoge mitʼ jokha reakʼ hoyokʼa- jeleńte pegel moka ar osar do pon moka.

⁹ Onako khon mõṛẽ goṭecʼ orwal kicricʼ do mitʼ sãote joṛao mitʼkate maraṅ okocʼ orwal benao hoyokʼa. Ar sarecʼ turui goṭecʼ orwal kicricʼ do mitʼ sãote joṛao mitʼkate maraṅ okocʼ orwal benao hoyokʼa. Noa maraṅ orwal modre okaṭakʼ bạ̃ṛti tahen ona do tạmbu samaṅ secʼem lạṭum doṛhakakʼa.

¹⁰ Ar pạhilakʼ maraṅ orwal kicricʼ reakʼ osar secʼ reakʼ dhạrire mõṛẽgel goṭecʼ gạlikom benao ocowakʼa; ar dosarakʼ maraṅ orwal kicricʼre hõ ṭhik onkage gạlikom benao ocowakʼa.

¹¹ Ona tayom pitạl reakʼ mõṛẽgel goṭecʼ bạkupʼakʼ benaokate ona do gạlirem bạkupʼkakʼa ar ona banar orwal do gakʼkakʼ leka hoyokʼa. Onate banar orwal do mitʼṭecʼ dapalakʼ tạmbuge hoyokʼa.

¹² Ar pạhil maraṅakʼ orwal reakʼ okaṭakʼ do tayom secʼ adha ạdhi ṭạmkur tahen ona do onkage tahena.

¹³ Merom upʼ reakʼ orwalko do latar reakʼ kicricʼ khon banar secʼ mitʼ moka kate bạ̃ṛtikʼ iạte ona reakʼ banar secʼ ṭạmkurkate goṭa ńapamokʼ tạmbugeye umul esetʼkakʼa.

¹⁴ Ar ona cetan khon dapal esetʼkakʼ lạgitʼ arakʼ roṅ akatʼ bheḍawakʼ hartate mitʼṭecʼ dapalakʼ benao hoyokʼa, ar ona cetan reakʼ dapalakʼ do merom reakʼ hartate.

¹⁵ “Ńapamokʼ tạmbu lạgitʼ gabla kaṭte paṭakom benao ocoya.

¹⁶ Paṭako do gel moka jeleń ar osarte do mitʼ moka tala hoyokʼa.

¹⁷ Ar joto paṭakorege barea kate kuṭhạm benao ocoya. Sekʼwa tạmbu reakʼ joto paṭakoge inạ mitʼ jokhage benao hoyokʼa.

¹⁸ Dạkhin secʼ lạgitʼ do bargel paṭako benao hoyokʼa.

¹⁹ Ar onako paṭa reakʼ mimitʼ kuṭhạ latarre doṛomkakʼ lạgitʼ pongel goṭecʼ rupạ reakʼ ganḍoko benao hoyokʼa, ar mimitʼ paṭa lạgitʼ do bareakate, metakʼme mimitʼ kuṭhạ lạgitʼ do mitʼṭecʼkate ganḍom benao ocoya.

^20-21 Sekʼwa tạmbu reakʼ eṭakʼ secʼ lạgitʼ, metakʼme utạr secʼ lạgitʼ hõ bargel goṭecʼ paṭa ar mimitʼ paṭa lạgitʼ bareakate jotote pongel goṭecʼ rupạ reakʼ ganḍokom benao ocoya.

²² Ar tạmbu reakʼ pạchim secʼ lạgitʼ do arhõ turui goṭecʼ paṭa benao hoyokʼa,

²³ ar tayom secʼ reakʼ banar konac lạgitʼ arhõ barea paṭam benao ocoya.

²⁴ Noakin paṭa reakʼ banar konac reakʼ barea paṭa sãote mitʼkate latar khon cetan hạbicʼem joṛao mitʼkakʼa. Ar konac reakʼ banar paṭa ar aṛe reakʼ paṭate mitʼ sãote joṛaokakʼ hoyokʼa. Ar banar konacge mitʼ leka hoyokʼa.

²⁵ Nonkate kuḍạm secʼ irạl goṭecʼ paṭa hoyokʼa ar mimitʼ paṭako reakʼ latarre emakʼ lạgitʼ barea kate jotote gel turui goṭecʼ rupạ reakʼ ganḍom benao ocowakʼa.

^26-27 “Sekʼwa tạmbu reakʼ paṭako lạgitʼ gabla kaṭ reakʼ hurkạṛakʼ ḍaṅem benao ocoya. Noare mitʼ secʼ reakʼ paṭa lạgitʼ do mõṛẽ goṭecʼ ḍaṅ tahena ar eṭakʼ mõṛẽ goṭecʼ paṭa lạgitʼ mõṛẽ goṭecʼ hurkạṛakʼ, metakʼme pạchim reakʼ paṭa lạgitʼ.

²⁸ Cetan ar latar reakʼ hurkạṛko modre jeleńakʼ hurkạṛ do paṭa talate noa sa khon hanasa hạbicʼ parom tahena.

²⁹ Ar onako paṭa do sonatem tol ocoya ar hurkạṛ bolokʼ lạgitʼ sona reakʼ kạṛiko benao ocokate paṭarem lagao ocoya. Ar ona hurkạṛko do sonatem tol ocoya.

³⁰ “Noa buru cetanre am do ńapamokʼ tạmbu reakʼ oka nạmunam udukʼ ocoyen ṭhik onka lekagem benao ocoya.

³¹ “Nil, beguni ar jeṅgetʼ arakʼ sutạm ar ũńakʼ mĩhĩ musnạ sutạmte mitʼṭecʼ orwalem tińa.

³² Ona orwal do gabla kaṭ reakʼ ponea khunṭi sãote lagao akatʼ sona reakʼ hukem dohokakʼa. Ar khunṭiko do sonatem tol ocoya ar onako do rupạ reakʼ ganḍore teṅgo tahena.

³³ Orwal do cetan reakʼ mĩhĩ musnạ kicricʼre lagao akatʼ bạkupʼakʼ latarre jhulạu tahena. Ar noa orwal tayomrege gohawakʼ tạmbu do tahena. Orwal do sonot utạrakʼ ṭhạ̃i ar sonot ṭhạ̃i talareye begar dohokakʼa.

³⁴ Noa sonot utạrakʼ ṭhạ̃ire goha sinduk cetanre ona reakʼ daya duṛupʼakʼem dohokakʼa.

³⁵ Ar noa orwal bahrere sonot ṭhạ̃i reakʼ utạr aṛere am do ṭebilem dohoya ar ona reakʼ dạkhin secʼ do diuhe dohowakʼ tahena.

³⁶ “Tạmbu reakʼ duạr lạgitʼ hõ mitʼṭecʼ orwal benao hoyokʼa. Ona do nil, beguni, ar jeṅgetʼ arakʼ sutạm ar ũńakʼ mĩhĩ musnạ sutạmte noksawakʼge.

³⁷ Noa orwal lạgitʼ sona reakʼ ạṅkus ar babla kaṭ reakʼ mõṛẽ goṭecʼ khunṭim benao ocoya. Ar khunṭiko do sonatem tol ocoya. Ar khunṭiko bạisạu lạgitʼ do pitạl reakʼ ganḍokom benao ocowakʼa.