Exodus 25 - সান্তালী বাইবেল

Isorakʼ tạmbu lạgitʼ dan

¹ Probhu Isor do Moseye metadea,

² “Israelko jemon iń lạgitʼ bhokti-sandesko ạgui. Ar apnarakʼ sanate jãhãege jãhãnakʼko ạgui khan ona hõm ataṅtakoa.

³ Onko do jemon noako sandesko ạguima: Sona, rupạ ar pitạl;

⁴ Nil, beguni ar arakʼ roṅakʼ sutạm ar mĩhĩ musnạ sutạm; merom upʼ;

⁵ arakʼ roṅte roṅakatʼ bheḍawakʼ harta ar merom harta; gabla kaṭ;

⁶ marsal jol lạgitʼ jạitun reakʼ sunum; ojokʼ bahalokʼ reakʼ sunum, dhup ar jut so mosolako;

⁷ ephod ar koṛam aḍokʼakʼ cetanre bạisạu lạgitʼ boidorjo mạnik dhiri ar eṭakʼ damanakʼ dhiriko.

⁸ Israelko hotete iń tahen lạgitʼ mitʼṭecʼ sonot ṭhạ̃irem benaoa. Onate iń do onko talareń girobasokʼa.

⁹ Oka nạmuna udukʼamiń menetʼkan ona lekage am do noa sewa tạmbu ar sanam asbabkom benao ocoya.

Bondobos reakʼ tạmbu

¹⁰ “Gabla kaṭte onko do mitʼṭecʼ sindukko benaoma. Ona reakʼ jeleń do bar moka tala, ar usul ar osar do mitʼ moka tala hoyokʼma.

¹¹ Ona reakʼ bhitri ar bahre do khạṭi sonatem tola ar ona reakʼ beṛhaete do sona reakʼ noksatem noksaea.

¹² Ar chańchre dulkate ponea sona reakʼ kạṛi tearkate ona ponea kuṭhạ reakʼ banarsa aṛe bareakatem lagaoakʼa.

¹³ Ona tayom gabla kaṭ reakʼ barea ḍaṅem benao ocoya ar ona do sonatem tola.

¹⁴ Ar sinduk gokʼ idi lạgitʼ ona banar kạṛi talate ona ḍaṅkinem gutu dohokakʼa.

¹⁵ Ar onakin ḍaṅ do sinduk reakʼ kạṛirege gutu dohokakʼ hoyokʼa; onakin do baṅ bocʼ dohoy hoyokʼa.

¹⁶ Ona goha sunduk do amiń emama ar am do noa sindukre onam dohokakʼa.

¹⁷ “Khạṭi sonate ona sinduk lạgitʼ mitʼṭecʼ daya duṛupʼakʼem benao ocoya, onare do kại puruchunokʼa. Noa daya duṛupʼakʼ reakʼ jeleń do bar moka tala ar osar do mitʼ moka tala.

¹⁸ Ona daya duṛupʼakʼre sonaren barea Kerubem benaokinạ.

¹⁹ Unkin Kerub do sinduk reakʼ banar sa aṛerekin tahena. Ar Kerubkin do daya duṛupʼakʼre nonka benaokin hoyokʼa jemon unkin do mitʼṭecʼ jinisrege kin benaokʼ.

²⁰ Unkinakʼ phạ̃kṛạ̃kʼ do cetan secʼ lap lapa akae tahena ar unkinakʼ umul latarre sinduk reakʼ daya duṛupʼakʼ do tahena. Kerubkin do samna sạmnikin teṅgo tahena ar unkinakʼ mẽtʼãhã do daya duṛupʼakʼ samaṅre tahena.

²¹ Noa daya duṛupʼakʼ do sinduk cetanrem dohoya ar oka goha olakʼiń emam ona do sinduk bhitrirem dohokakʼa.

²² Ar iń do goha sinduk reakʼ daya duṛupʼakʼ cetanre Kerubkin talare am sãote ńapamkate Israelko lạgitʼ ińakʼ sanam hukumiń emama.

Samaṅokʼakʼ tạmbu lạgitʼ ṭebil

²³ “Am do gabla kaṭte bar moka jeleń, mitʼ moka osar ar mitʼ moka tala usul mitʼṭecʼ ṭebilem benao ocoya.

²⁴ Ona do khạṭi sonatem tol ocoya ar beṛhaete do sona reakʼ gunsikom benao ocowakʼa.

²⁵ Ar ṭebil reakʼ beṛhaete pon kạṭupʼ usul batam lagaoa, ar ona cetanre hõ sona reakʼ gunsikom benao ocowakʼa.

²⁶ Ar ṭebil reakʼ pon konare ponea kuṭhạ cetanre sona reakʼ ponea kaṛi tearkatem lagao ocoya.

²⁷ Ona kạṛi do ṭebil beṛhaete ona usul bata pheḍre tahena jemon ṭebil gokʼ idiyre ona talate ḍaṅkin bolo daṛeakʼ.

²⁸ Onakin ḍaṅ do gabla kaṭ reakʼ tearkate sonatem tol ocoya ar onate ṭebil do gokʼ idiy hoyokʼa.

²⁹ Ṭebil lạgitʼ thạriko, kạ̃ṛchuko, loṭako, bạṭiko one onakote coḍorokʼ onako jotoge khạṭi sonatem benao ocoya.

³⁰ Ar ṭebilre do iń ńutumte samaṅakʼ piṭhạm dohokakʼa, ar jaoge jemon ona do onḍege tahena.

Diuhe dohowakʼ

³¹ “Khạṭi Sonate mitʼṭecʼ diuhe reakʼ dohowakʼem benao ocoya. Ona reakʼ latar hĩs ar ona khon rakapʼ akan ḍạnḍiko hõ sona reakʼtem benao ocoya. Ar baha leka bạṭiko, ḍombeko ar bahako do diuhe dohowakʼ khon oḍok hijukʼa ar ona joto do benao mitʼge tahena.

³² Diuhe dohowakʼ reakʼ banar aṛete pepe goṭecʼkate jotote turui goṭecʼ ḍạrem benao ocoya.

³³ Baha ar ḍombe sudhạ badam bahaleka ńelokʼ pea bạṭi do pạhil ḍạr reakʼ tala talate tahena. Ar ona tayom reakʼ ḍạrre hõ onkage pea bạṭi tahena. Ar diuhe dohowakʼ khon oḍok hecʼakan turui goṭecʼ ḍạrko hõ inạ mitʼ lekage hoyokʼa.

³⁴ Diuhe dohowakʼ reakʼ ḍạnḍi tala talate hõ baha ar ḍombe sudhạ badam baha leka ńelokʼ ponea bạṭim dohoya.

³⁵ Diuhe dohowakʼ khon oḍok hecʼakan turui goṭecʼ ḍạr talare pạhilte barea okare milạu akan ona reakʼ latarre mitʼṭecʼ ḍombe, ar dosarakʼ barea latarre ar mitʼṭecʼ ḍombe ar tesarakʼ barea latarre ar mitʼṭecʼ ḍombem dohoya.

³⁶ Ḍombe ar ḍạr do jotoge diuhe dohowakʼ khon oḍok hijukʼa ar joto do mitʼṭecʼ jinisge hoyokʼa.

³⁷ Ona tayom khạṭi sonate eae goṭecʼ mạli benaokate diuhe dohowakʼre nonka dohoy hoyokʼa jemon mạliko jeretʼlere samaṅ senakʼ jaega do marsalokʼ.

³⁸ Ar sultạ sapha dohoy lạgitʼ cimṭạ ar sultạ reakʼ torocʼ dohoy lạgitʼ jinisko hõ khạṭi sonate benao hoyokʼa.

³⁹ Diuhe dohowakʼko benao lạgitʼ jotote pegel keji khạṭi sona jạruṛokʼa.

⁴⁰ Noa buru cetanre okako nạmunań udukʼatʼme ṭhik onka lekage jotowakʼem benao ocoya.