Exodus 24 - সান্তালী বাইবেল

Mose hotete Isorakʼ bondobos

¹ Tayomte Probhu Isor do Moseye metadea, “Aron, Nadab, Abihu ar Israelkoren eaegel murubbiko soṅgekate am do iń ṭhen rakapʼ hijukʼme. Ar rakapʼ hijukʼ jokhecʼ sạńgińre tahen khonge taberate ińpe sewawạńạ.

² Menkhan am do eskarge iń ṭhenem rakapʼ hijukʼa, ar eṭakʼko do aloko hijukʼma. Noko chaḍa eṭakʼ Israel hoponko jemon am sãote aloko rakapʼ hijukʼ.”

³ Mose do ruạṛkate Probhu Isorakʼ katha tinre hoṛko ṭhene lạikeda ar uniyakʼ sanam ạnkoe sodorkeda unre hoṛko do mitʼ domteko menkeda, “Probhu Isor cetʼ cetʼkoe menakatʼ ale do ona jotole manaoa.”

⁴ Ar Mose do Probhu Isor okako kathae menletʼ onako jotowakʼe ol dohokeda. Dosar hilokʼ Mose do ạḍi setakʼre buru latarre mitʼṭecʼ pinḍe benaokeda ar Israelkoren gelbar khũṭ reakʼ katha disạkate gelbar goṭecʼ khunṭiye benaokeda.

⁵ Ona tayom uni do mitʼbar Israel juạnkoe kolketʼkoa ar onko do Probhu Isor ńutumte jeredokʼ samaṅokʼ reakʼko porobena ar sulukren samaṅokʼakʼ lekate aema ḍaṅgrako dãṛẽketʼkoa.

⁶ Mose do samaṅ akatʼkoakʼ mãyãm khon adha hataokate bhajanreye dohokeda ar adha do ona pinḍ cetanreye chiṭiạukeda.

⁷ Ona tayom uni do bondobos olakʼ puthi hataokate hoṛkoe paṛhao ańjomatʼkoa. Unre hoṛko doko roṛ ruạṛadea, “Ale dole bataoa ar Probhu Isor okakoe menakatʼ ona jotowakʼle palona.”

⁸ Noa katha ańjomkate Mose do hoṛko cetanre mãyãm chiṭiạukateye menkeda, “Noa do ona bondobos reakʼ mãyãm kana, one oka do Probhu Isor ape lạgitʼ noako katha lekageye niṭ dohoakatʼ.”

^9-10 Noa tayom Mose, Aron, Nadab ar Israelkoren eae gel murubbiko do buru coṭte rakapʼ senkate Israelren Isorko ńelkedea. Uniyakʼ jaṅga talka do sapha rimilre Nilkanto monite bạisạu akatʼ leka tahẽkana.

¹¹ Israelkoren noko mukhiyạko do Isorko ńelkedere hõ bako gocʼlena. Onko do uniko ńelkedea arko jom ńũkeda.

¹² Ona tayom Probhu Isor do Moseye metadea, “Am do buru cetanre iń ṭhen rakapʼ hijukʼme ar thoṛa okte hạbicʼ iń ṭhen tahenme. Iń do hoṛko cetʼako lạgitʼ dhiri cạktireń olakatʼ ạn-ạri ar hukumkoń emama.”

¹³ Noa katha ańjomkate Mose do acʼren gokʼṛoyicʼ Josuại soṅgekedea are mohnḍayena. Ar ona tayom uni do Isorakʼ buruteye rakapʼena.

¹⁴ Uni do murubbikoe men oṭowatʼkoa, “Ạliń ạuri liń ruạṛ hijukʼ hạbicʼ ape do nonḍege tạṅgi hataṛpe. Aron ar Hur do ape sãotekin tahẽyena. Hoṛko jhogṛa emanlenre jemon unkin ṭhenko calakʼ.”

¹⁵ Mose buruteye rakapʼ calakʼ jokhecʼ buru do rimilte esetʼena,

¹⁶ Ar Sinại burure Probhu Isorakʼ ṭhonok sodorena. Turui din hạbicʼ buru do rimilte danaṅge tahẽyena. Ona tayom eae din hilokʼre ona rimil tala khon Probhu Isor do Moseye hohoadea.

¹⁷ Israelkoakʼ mẽtʼre Probhu Isorakʼ ṭhonok do jolokʼ seṅgel leka buru reakʼ cuṛạre ńelena.

¹⁸ Ar Mose do rakapʼ rakapʼte ona rimil bhitriteye boloyena. Uni do pongel siń ar pongel ńindạ ona bururegeye tahẽyena.