Exodus 22 - সান্তালী বাইবেল

Sompotti rukhiyại reaṅ

¹ “Jãhãe hoṛ ḍaṅgra se bhiḍi kombṛo ạgukate dãṛẽye samaṅe seye ạkhrińe, enḍekhan uni do mitʼṭen ḍaṅgra bodolte mõṛẽ goṭen ḍaṅgra ar mitʼṭen bhiḍi bodolte ponea bhiḍi em ruạṛkakʼ hoyokʼtaea.

² “Kombṛo do jãhãnakʼ kombṛoe lạgitʼ oṛakʼ bolokʼ jokhecʼe sapʼ ocokʼ are ghạlkateye gocʼlen khan, enḍekhan okoeyakʼ dalte uniye gocʼen uni do khũn iạte dạyi bae tahena.

³ Menkhan siń cando rakapʼ tayom ona hoylen khan enḍekhan uni do ona khũn lạgitʼ dayiye hoyokʼa. “Kombṛo do kombṛo akatʼ jinis lạgitʼ khạṭige khuti purun emokʼ hoyokʼtaea, menkhan uniyakʼ jãhãnakʼ baṅ tahentae khan enḍekhan unige ạkhrińkate ona ṭaka ạdạitae hoyokʼa.

⁴ Kombṛo akade ḍaṅgra, gadha se bhiḍi jodi kombṛoyicʼ ṭhen jiwetʼgeye ńamokʼ enḍekhan kombṛoyicʼ do onko mitʼṭen bodolte bareakate ruạṛkae hoyokʼtaea.

⁵ “Jãhãege uniren ḍaṅgra se bhiḍi jãhãn ṭạnḍire se darkha khetre ạtiń idikateye aṛakʼ gotʼkae ar uni ḍaṅgra se bhiḍi do eṭakʼ hoṛakʼ khetre bolokate phosole jom, enḍekhan uni hoṛ do apnarakʼ khet se darkha reakʼ joto khon bhage phosolte khuti purun emae hoyokʼtaea.

⁶ “Jãhãn jaega khon seṅgel hecʼkate jạnum jhạuạre lagaokʼ ar tayomte pasnaokʼte puńji dohoakatʼ se ṭạnḍire jarwa akatʼ anaj se goṭa khetge lokʼ, enḍekhan seṅgel okoeye lagaoletʼ unige ona reakʼ khuti purun emokʼ hoyokʼtaea.

⁷ Jãhãege ṭaka poesa se jinisko dohoy lạgitʼ jãhãeye emae ar uniyakʼ oṛakʼ khon ona kombṛokʼ enḍekhan kombṛoe sapʼlenre uni kombṛo do ona reakʼ pongel doboṛ ruạṛkakʼ hoyokʼtaea.

⁸ Menkhan kombṛo bae sapʼ tiyogokʼ enḍekhan oṛakʼren kisạ̃ṛge onae hatao akada se baṅ ona baḍae lạgitʼ uni do Isor ṭhen hạjirokʼ hoyokʼtaea.

⁹ Eṭakʼ hoṛakʼ dokholre menakʼko nonkan ḍaṅgra se gadha se bheḍa se hoṛmo reakʼ kicricʼ se eṭakʼ jãhãnakʼ atʼ akan jinis ńelte jãhãegeye men ona do acʼakʼ kana, enḍekhan miṭmaṭ lạgitʼ banar secʼrenge Isor ṭhen hạjirokʼ hoyokʼtạkina. Ar Isor okoe do dusi menteye ṭarhaoe uni do eṭakʼicʼ ona reakʼ doboṛe ruạṛkataea.

¹⁰ “Jãhãe hoṛ acʼren gadha se dạṅgra, bheḍa se jãhãn janwar jãhãe ṭhen dohoye lạgitʼe emae ar uniye gujukʼ se aghate ńam seye recʼ ocokʼ ar okoe hõ noa bako ńellede,

¹¹ enḍekhan uni hoṛ ona bae ceka akatʼ ona do Probhu Isor samaṅre kiriạkate ona babotre miṭ maṭkakʼ hoyokʼtaea. Uni janwarren mạlik do ona manao hoyokʼtaea ar jãhãn khuti purun bae dạbi daṛeakʼa.

¹² Menkhan uni hoṛ ṭhen khone kombṛo len khan enḍekhan uni do khuti purun emokʼ hoyokʼtaea.

¹³ Ar bir janwar uniye cirạ akade khan ona sạbud lạgitʼ uniyakʼ kaṭra kuṭrạ hạṭińkoge ạgukate udug hoyokʼtaea. Ar onate uni do khuti purun baṅ emokʼ hoyokʼtaea.

¹⁴ “Jãhãe ṭhen khon koe ạguyicʼ janwar do mạlik baṅ tahenreye ghạllen khan seye gocʼlen khan enḍekhan okoeye ạgulede uni do ona reakʼ khuti purun emokʼ hoyokʼtaea.

¹⁵ Menkhan mạlik samaṅrege onka hoylen khan enḍekhan khuti purun do baṅ lagaoea. Ar ṭakate uni janware bhaṛa ạgu ocoakan khan enḍekhan ona ṭakage uniyakʼ khuti purun do hoyokʼa.

Somajre dạyikko reakʼ

¹⁶ “Jãhãe hoṛ sãote bapla reakʼ katha baṅ hoyakantae nonkan kuạ̃ri kuṛi bulạu idikate jãhãeye laṭghaṭ khan, enḍekhan uni hoṛ do gonoṅ emokʼ lagaoaea ar kuạ̃ri kuṛi do uniren bạhuye hoyokʼtaea.

¹⁷ Kuṛiren apattetʼ uni hoṛre bae rạjikʼ khan enhõ uni do bapla gonoṅ emokʼ hoyokʼtaea.

¹⁸ “Jãhãe gunidar maejiu do jiwetʼ alope dohokoa.

¹⁹ “Jãhãn janwar sãote jãhãegeye laṭghaṭ enḍekhan uni do gojete hõ goje hoyokʼa.

²⁰ “Probhu Isor chaḍa jãhãege jãhãe debota ṭhen jãhãnakʼe samaṅ enḍekhan uni hõ goje hoyokʼa.

²¹ “Bidisiạ hoṛ sãote bạṛicʼ alope beohara se alope santaoea, ente Misor disạmre ape hõ bidisiạpe tahẽkana.

²² “Jãhãe rạnḍi maejiu se jãhãe ṭũạr amarko alope kosṭokoa.

²³ Arpe onkae khan ar iń ṭhen uniye rakʼle khan khạṭige iń do uniyakʼ rakʼjoṅ iń luturakʼa.

²⁴ Unre ińakʼ edre do jalajalaokʼa ar ape do lạṛhạirepe gujukʼa. Onate aperen bạhu doko rạnḍikʼtapea ar gidrạ doko ṭũạrokʼa.

²⁵ “Ińren jãhãe reṅgecʼ hoṛ ṭaka dharem emae enḍekhan mahajonko leka uni ṭhen khon sud alom hataotaea.

²⁶ Jãhãeakʼ oyon kicricʼ bondhokem dohoakatʼ khan siń cando hạsurokʼ laharege ona do ruạṛkatae hoyokʼa,

²⁷ ente uniyakʼ oyokʼ kicricʼ do ona motogetaea. Ar baṅ khan cetʼte uni doe oyokʼa? Ar ona lạgitʼ iń ṭhene rakʼle khan uniyakʼ rakʼ iń ańjomtaea, ente ińakʼ ontor do dayate perecʼgetińa.

²⁸ “Isor do alope nindạuea se aperen disạm cakʼlaoyicʼ hõ alope sarapaea.

²⁹ “Apeakʼ phosol ar darkha rasa khon okaṭakʼ emokʼ reakʼ ona emokʼ do alope biloma. Aperen pạhil koṛa hopon do iń imạń hoyokʼtapea.

³⁰ Aperen ḍaṅgra ar bheḍako hõ onkage lagaoapea. Ar eae din hạbicʼ onkoren hoponko do eṅgat ṭhenko tahena, ar ona tayom irạl mãhã hilokʼ do iń ṭhen emokʼ hoyokʼtapea.

³¹ “Ape do ińren begar akan hoṛ kanape. Onate nonkan jãhãn janwarakʼ jel alope joma one okoe do kaṭaha janwar ṭhene gocʼ ocoakan; ona do setape emakoa.