Exodus 21 - সান্তালী বাইবেল

Israelren guti ar kạ̃ṛmĩkoakʼ ạidạri

¹ Ona tayom Probhu Isor do Moseye metadea, “Ińakʼ noako niạm do Israelkom samaṅakoa.

² “Golam lekate jãhãe Ibri hoṛpe kirińle khan, uni do turui bochor ape tabereye kạmiya, menkhan eae bochorre uni ṭhen khon jãhãnakʼ cetʼge alope hataoa uni do sạdhintepe sen ocoaya.

³ Uni do eskarge ape ṭhene tahẽlen khan eskargeye calakʼa, menkhan acʼren bạhui ạgu daralede khan uniren bạhu hõ uni sãote calao ocoae hoyokʼa.

⁴ Ar uni guti acʼren kisạ̃ṛgeye bạhuae khan ar uniren gidrạko janamlentae khan enḍekhan uniren bạhu ar gidrạko do kisạ̃ṛrengeko hoyokʼa; ar uni do eskargeye oḍok calakʼa.

⁵ Menkhan uni guti saphateye lại, uni do acʼren kisạ̃ṛ, ar acʼren bạhu ar gidrạkoe dulạṛetʼkoa, ar onko bạgiyako reakʼ jãhãn monsubạ bạnukʼtaea,

⁶ enḍekhan uniren kisạ̃ṛ do Isor ṭhene ạguyea. Ar ona tayom do duạr se duạr ganade ṭhen idikate sạlạkte luture pạṭi bhugạgtaea. Onate uni do goṭa jion acʼren kisạ̃ṛ ṭhen golam akane tahena.

⁷ “Jãhãege acʼren hoponera golamini lekateye ạkhrińle khan, enḍekhan uni kuṛi do golamkoko oḍok calakʼ leka do bae oḍok calakʼa.

⁸ Kisạ̃ṛtae uniye bebạsutae khan, one uni hataoe lạgitʼe niṭlede, enḍekhan uni kuṛi do dam sodkate chaḍaokʼ reakʼ hoke emaea; eṭakʼ jạtrenko ṭhen ạkhrińe reakʼ ektiạri do bạnukʼtaea, uni tulucʼ bepạtiạre kạmi akatʼte.

⁹ Menkhan kisạ̃ṛ do acʼren hopon lạgitʼ kusite uniye idiakade khan tobe do acʼren hoponera leka joto ạidạri emae hoyokʼtaea.

¹⁰ Kisạ̃ṛ do kạ̃ṛmĩye baplaye tayom eṭakʼ jãhãeye baplalekore hõ enhõ uni kạ̃ṛmĩyakʼ jom-ńũ ar kicricʼ khạnḍwạkʼ reakʼ khoroc do emokʼ hoyokʼtaea ar juri-pạri reakʼ hok hõ emae hoyokʼtaea.

¹¹ Onako pea bae purạu daṛeatae khan uni kuṛi do emnetegeye oḍok calao daṛeakʼa jãhãn ṭaka poesa baṅ emokʼ hoyokʼtaea.

Kumãyã kạmi reakʼ sạjại

¹² “Jãhãege mitʼṭen hoṛe dale ar ona iạte uni hoṛe gocʼlen khan tobe uni dadalicʼ hoṛ hõ khạṭigeye gocʼ ocokʼa.

¹³ Menkhan goje reakʼ monsubạ baṅ tahentae menkhan Isorge uniye soprot akade khan tobe uni do nonkan mitʼṭecʼ ṭhạ̃iteye ńir bańcao daṛeakʼa one okaṭakʼ thạ̃i do ape lạgitʼ iń niṭ dohoakatʼ.

¹⁴ Jãhãege laha khon hudis goṭakate mitʼhoṛe goje ar pinḍ ṭhen senkate asraye hatao, enḍekhan uni hoṛ do onḍe khon sapʼ ạgukate goje hoyokʼa.

¹⁵ “Jãhãege acʼren eṅgat se apate dalkin uni do khạṭigeye gocʼ ocokʼa.

¹⁶ “Jãhãege mitʼṭen hoṛ kombṛokateye ạkhrińe se uni tireye ńamokʼ, enḍekhan uni hõ khạṭigeye gocʼ ocokʼa.

¹⁷ “Jãhãege acʼren eṅgat se apate sarapae uni hõ khạṭigeye gocʼ ocokʼa.

^18-19 “Bar hoṛkin lạṛhại jokhecʼ mitʼ hoṛ do eṭagicʼ dhiriteye tińe se titeye ghusiye, ar onate uni hoṛ bae gocʼlenre hõe kạhilokʼ ar tayomte bes ńokʼkate ṭheṅga tirupʼkateye dãṛã baṛae, tobe khan dadalicʼ do gujukʼ sạjại bae ńama; menkhan ghạl ocoyicʼakʼ kạmi reakʼ kạmhại iạte dadalicʼ do khuṭi purun emokʼ hoyokʼtaea ar uni hõ ran bese lagaoea.

²⁰ “Jãhãege acʼren guti se kạ̃ṛmĩ ṭheṅgateye dale ar onate uniye gocʼlen khan tobe do uni dadalicʼ hõ sạjạiye hoyokʼa.

²¹ Menkhan uni dal ocoyicʼ mitʼ se bar din jiwetʼe tahen enḍekhan dadalicʼ do bae sạjại ocokʼa, ente uni do acʼren ṭaka poesa kanae.

²² “Lạṛhại jokhecʼ jãhãege bhạrti hoṛmowan maejiue dale ar uniyakʼ hoṛmoren gidrại nosṭokʼ ar uni bhạrti hoṛmowan maejiuakʼ jãhãnakʼ baṅ cekakʼ tobe khan maejiuren jãwãeyakʼ dạbi leka bikʼcạrko okako goṭae onkage uni dadalicʼ doe ḍanḍom ocokʼa.

²³ Menkhan ghoṭna hõe bạṛicʼlen khan tobe do nonka sạjạiye hoyokʼa. Jiwi hala hạli jiwi,

²⁴ mẽtʼ hala hạli mẽtʼ, ḍaṭa hala hạli ḍaṭa, ti hala hạli ti, jaṅga hala hạli jaṅga;

²⁵ lo hala hạli lo, ghao hala hạli ghao, ghạl hala hạli ghạl.

²⁶ “Jãhãege acʼren guti se kạ̃ṛmĩ mẽtʼe dale ar onate uniyakʼ mẽtʼ bạṛijokʼtae enḍekhan uniyakʼ mẽtʼ khạtire uni guti se kạ̃ṛmĩ do sạdhine oḍok calao daṛeakʼa.

²⁷ Jãhãege acʼren guti se kạ̃ṛmĩyakʼ ḍaṭae dal ńurhạitae enḍekhan uni guti se kạ̃ṛmĩ hõ onkage sạdhine sen daṛeakʼa.

²⁸ “Mitʼṭen ḍaṅgra jãhãe herel hopon se maejiue rokʼle khan ar onate uniye gocʼlen khan tobe uni ḍaṅgra do dhirite tiń goje hoyokʼa. Ar uni ḍaṅgrawakʼ jel do celege bako joma ar ḍaṅgraren kisạ̃ṛ hõ jãhãnakʼ sạjại baṅ hoyokʼtaea.

²⁹ Menkhan rorokʼ ḍaṅgra kan khane ar ḍaṅgraren kisạ̃ṛ sontorkaere hõ bae tole ar uni ḍaṅgra jãhãe herel hopon se maejiue rokʼ goje, tobe khan uni ḍaṅgra do dhirite tiń goje hoyokʼa ar uniren kisạ̃ṛ hõ goje hoyokʼa.

³⁰ Menkhan kisạ̃ṛ ṭhen khon jãhãe khuti purune dạbiy khan tobe ona khuti purun emkate kisạ̃ṛ do acʼakʼ jiwiye rukhiyạ daṛeataea.

³¹ Uni ḍaṅgra jodi jãhãe koṛa hopon se kuṛi hopone rokʼ goje enḍekhan uni cetanre hõ inạ niạmge tahena.

³² Uni dạṅgra do jãhãe guti se kạ̃ṛmĩye rokʼ goje enḍekhan uni ḍaṅgraren kisạ̃ṛ do uni guti se kạ̃ṛmĩren kisạ̃ṛ pe sae gram rupạ emae hoyokʼtaea, ar uni ḍaṅgra do dhiriteye tiń gocʼ ocokʼa.

³³ “Jãhãe kisạ̃ṛ acʼakʼ jumire menakʼ kuń oṭakʼgeye bạgi oṭokakʼ ar ona kuńre jãhãn ḍaṅgra se gadhae ńurlen khan,

³⁴ enḍekhan jumiren kisạ̃ṛ do ona reakʼ khuti purun ḍaṅgra se gadharen kisạ̃ṛ emae hoyokʼtaea; tobe gocʼ janwar do acʼrengeye hoyokʼa.

³⁵ “Mitʼ hoṛren ḍaṅgra do eṭakʼ hoṛren ḍaṅgrae rokʼ gocʼle khan unkin do jiwetʼ ḍaṅgrakin ạkhrińea ar ṭaka kin hạṭińa ar gocʼ ḍaṅgra hõ kin hạṭińea.

³⁶ Menkhan laha khon uni ḍaṅgrae rorokʼ khan ar kisạ̃ṛ uni ḍaṅgra bae tol dohokae enḍekhan uni kisạ̃ṛ do ḍaṅgra bodolte ḍaṅgra emokʼ hoyokʼtaea ar gocʼ ḍaṅgra do acʼrene hoyokʼa.