Exodus 20 - সান্তালী বাইবেল

Gel Hukum

¹ Inạ tayom Isore menkeda,

² “E Israelko, ińge amren Probhu Isor do. Misor disạm khon golam oṛakʼ khon ińgeń oḍok ạguakatʼmea.

³ “Iń samaṅre eṭakʼ Isorko aloko tahentam ma.

⁴ “Sekʼwae lạgitʼ jãhãn muṭhạnko alom benao joṅa, baṅ do coṭ sermarenko reakʼ baṅ do otrenko reakʼ baṅ do ot latar dakʼrenko reakʼ.

⁵ Onako do alom ḍobokʼakʼa, ar sewa hõ alom sewawakʼa, ente iń Probhuge amren Isor do. Iń do ińakʼ paona bhoktiń khojkana. Okoeko kurudạń onkoakʼ kại reakʼ sạjại do onkoren hoponko ṭhen pe pon piṛhi hạbicʼ iń pańja halawako kana.

⁶ Menkhan okoe ińko dulạṛiń ar ińakʼ hukum lekako calakʼ, onko do hajar piṛhi hạbicʼ iń dayawakoa.

⁷ “Amren Probhu Isorakʼ ńutum ạuṛi pạthạuṛi do alom ńumtaea. Ente okoeye onkae Probhu Isor do uniye sạjạiyea.

⁸ “Jirạukʼ mãhã disạime jemon onam sonot.

⁹ Hapta reakʼ turui mãhãm khaṭaokʼa ar amakʼ jotowakʼem kạmiya,

¹⁰ menkhan eae din hilokʼ do amren Probhu Isor ńutumte mitʼṭecʼ jirạukʼ din kana. Enhilokʼ do, am ar amren hoponko ar hoponerako, amren guti ar kạ̃ṛmĩko, amren ḍaṅgrako, amren gadhako se eṭakʼ jãhãn janwarko se amakʼ ato se nagrahare girobasokʼ kan eṭakʼ jạtren hoṛko, okoe hõ cetʼge alope kạmiya.

¹¹ Probhu Isor do turui dinre serma ar ot ar jalapuri ar onare menakʼ jotowakʼe sirjạukeda, menkhan eae din hilokʼ doe jirạuena. Ona iạte Probhu Isor do ona dine bhoratʼa ar acʼ lạgitʼe begar dohokada.

¹² “Amren gogo ar baba ganaokinme. Enḍekhan Probhu Isore emam disạmre ḍher din jiwetʼem tahena.

¹³ “Alom khũna.

¹⁴ “Alom laṭghaṭa.

¹⁵ “Alom kombṛoya.

¹⁶ “Okoe upạrte hõ eṛe goha alom ema.

¹⁷ “Eṭakʼ hoṛakʼ oṛakʼ duạr, se bạhutae, se gutitae se kạ̃ṛmĩtae, se ḍaṅgratae se gadhatae ar jãhãnakʼ cetʼge alom lalocakʼa.”

Hoṛkoko botorokʼkan

¹⁸ Israelko do tinre bijli malkaokʼ ar buru khon dhũạ rakabokʼko ńelkeda ar huḍur ar sakwa reakʼ saḍeko ańjomkeda unre onko do sạṅgińre teṅgokate thar tharokʼko ehopʼena.

¹⁹ Onko do Moseko metadea, “Ale tulucʼ katha roṛme, ale dole ańjoma; menkhan Isor ale tulucʼe roṛle khan ale dole gujukʼa.”

²⁰ Unre Mose do hoṛkoe metatʼkoa, “Alope botorokʼa. Isor do biḍạureye paṛao ocoakatʼpea jemon apeakʼ monre botor tahente alope kại. Ar ona iạtege uni doe hecʼakana.”

²¹ Hoṛko do sạṅgińreko teṅgo tahẽyena ar Mose do Isor ṭhen ona dhund rimil secʼe rakapʼ calaoena.

Pinḍ reakʼ niạmko

²² Probhu Isor do Moseye metadea, “Am do Israelko noa katham lạiyakoa, ‘iń Probhu Isor do serma khon ape sãote okań roṛketʼ ona do apnarakʼ mẽtʼtegepe ńelkeda.

²³ Onate jãhãnakʼ benaokate sewawakʼ lạgitʼ iń sãote alope teṅgoea. Sona se rupạte ape lạgitʼ jãhãn Isorko alope benaojoṅa.

²⁴ Ape do iń lạgitʼ hasa reakʼ mitʼṭecʼ pinḍ benaope, ar ona cetanre jeredokʼ samaṅokʼakʼ dãṛẽ ar sulukren samaṅokʼakʼ ḍaṅgra, merom ar bheḍa samaṅkope. Ar okako ṭhạ̃ire ińakʼ ńutum disại lạgitʼ iń bondobos ona jaegare hecʼkate apeń bhorapea.

²⁵ Dhirite iń lạgitʼ jãhãn pinḍpe benaore ona dhiri do alope rokʼ-khodaoa. Ona cetanre hạtiạrpe epelle khan ona dope bhõnḍa.

²⁶ Ińakʼ pinḍ do nonkape benaoa jemon onare siṛhite rakabokʼ alo hoyokʼtape, ente siṛhite rakabokʼ jokhecʼ apeakʼ uluṅ do sodorokʼa.’ ”