Exodus 2 - সান্তালী বাইবেল

Moseyakʼ janam

¹ Niạko oktere Lewi gusṭiren mitʼṭen hoṛ do inạ mitʼ gusṭirenge mitʼṭen kuṛiye baplakedea.

² Ar kuṛi doe bhạrti hoṛmoyena ar mitʼṭen koṛa gidrại hoyentaea. Gidrạ do ńelokʼte ạḍi napaegeye tahẽkana. Ona iạte uniren eṅgattetʼ do pe cando hạbicʼ acʼ ṭhene oko dohokedea.

³ Menkhan tinre ar bae oko doho daṛeadea unre uni do pạṭiol ghãste mitʼṭecʼ piṭạri benaokate onare jaṭaṅ hasa ar alkatrae potaoada ar onare uni gidrại giticʼkedete nil gaḍa reakʼ pạṭiol gajaṛreye doho oṭokada.

⁴ Ar gidrạwakʼ cetʼ hoyokʼa mente ona ńel lạgitʼ uniren ạjittetʼ do onḍe khon thoṛa sạṅgiń ńokʼreye teṅgo akan tahẽkana.

⁵ Thoṛa ghạṛicʼ khange Pharaoren hoponera do ḍạbrạkʼ lạgitʼ gaḍateye hecʼena. Ar unre uniren kạ̃ṛmĩko do gaḍa aṛe aṛeteko dãṛã baṛaekan tahẽkana. Unre uni do pạṭiol gajaṛre mitʼṭecʼ pạṭạriye ńelńamketʼ khan acʼ ṭhen ạguiy lạgitʼ mitʼṭen kạ̃ṛmĩye kolkadea.

⁶ Uni do onae oṭakʼketʼ khan ạḍiye hahaṛayena ar mitʼṭen koṛa gidrạ onare rarakʼkane ńelkedea. Onate raj hoponera do uni gidrạ cetanre ạḍi mãyã hecʼadea. Uniye menkeda, “Nui do Ibrikoren gidrạ kanae.”

⁷ Unre gidrạren ạjittetʼ do hecʼkate Pharaoren hoponerae metadea, “Iń do cetʼ am lạgitʼ mitʼṭen Ibri maejiu iń hohoạguama, jemon nui gidrại nunu harawam?”

⁸ Uni doe menkeda, “Hẽ, Do calakʼme.” Unre kuṛi do senkate gidrạren eṅgattetʼgeye hoho ạgukedea.

⁹ Pharaoren hoponera do uniye metadea, “Nui gidrạ idikate nunu harawạńme. Noa lạgitʼ iń do betoniń emama.” Unre uni maejiu do gidrại idikedea are nunu harakedea.

¹⁰ Gidrạ thoṛae harayen khan maejiu do Pharaoren hoponera ṭhene idikedea, ar uni do acʼren gidrạ lekae ataṅkedea. Uniye menkeda, “Nui do dakʼ khoniń owar rakapʼ akadea.” Ar onate uniyakʼ ńutum do Moseye dohoketʼtaea.

Mose Midiạn disạmteye dạṛetʼkan

¹¹ Mose doe sẽṛãyen khan mitʼdin uni do acʼ jạtrenko sãote ńapamokʼ lạgitʼe oḍokena ar hamal gokʼ bhạriạ kạmiye ńelketʼkoa. Uni do arhõe ńelkeda, Misorren mitʼṭen hoṛ do Ibrikoren mitʼ hoṛe dale kana.

¹² Unre uni do beṛhaete koyokʼ baṛakate okoehõ bae ńel ńamletʼkoa. Khan uni Misri hoṛe gocʼkedea ar gitilreye topakadea.

¹³ Dosar hilokʼ uni do arhõ bahreteye oḍok senena ar barea Ibri hoṛ lạṛhạikane ńelketʼkinạ. Unre uni do dusiyicʼe metadea, “Cedakʼ amren boeha dom dale kana?”

¹⁴ Uni hoṛe menkeda, “Okoe baṅ ạliń talare mukhiyạ ar bicạricʼe dohoakatʼme? Uni Misri hoṛ leka cetʼ iń hõ gojeńem khojkana?” Noa katha ańjomkate Mose doe botorena. Uni doe hudiskeda, khạṭige noa katha do sodor akana.

¹⁵ Pharao noa kathae ańjomketʼ khan Mose goje lạgitʼe kurumuṭukeda. Menkhan Mose do Pharao ṭhen khone dạṛketʼte Midiạn disạmteye calaoena. Ar onḍe senkate uni do mitʼṭecʼ kuń aṛereye duṛupʼena.

¹⁶ Onḍenicʼ Midiạn naekeren do eae goṭen hoponerako tahẽkantaea. Onko do apattetʼren bhiḍiko dakʼ ńũako lạgitʼ dakʼ lo rakapʼkate gamlareko dul perecʼetʼ tahẽkana.

¹⁷ Menkhan adom gukʼpiko do hecʼkate kuń ṭhen khon onko kuṛikoko laga ńirketʼkoa. Noa ńelte Mose doe beretʼena ar onkoe goṛowatʼkoa ar onkoren bhiḍiko hõ dakʼe ńũwatʼkoa.

¹⁸ Ado onko kuṛiko akoren apattetʼ ṭhenko ruạṛen khan uni doe kuliketʼkoa, “Teheń do cekate unạkʼ usạrape ruạṛ hecʼena?”

¹⁹ Onkoko menkeda, “Mitʼṭen misri hoṛ do gupikoakʼ ti khone rukhiyạketʼlea. Eken ona do baṅ, uni do dakʼe loketʼte aleren bhiḍiko hõe ńũ ocoketʼkoa.”

²⁰ Uni do acʼren hoponerakoe kuliketʼkoa, “Uni hoṛ do okare menaea? Ar cedakʼpe bạgi oṭoadea? Do hohoaepe ar thoṛa jom ocoyepe.”

²¹ Mose do uni naeke ṭhen tahen lạgitʼe rạjiyena ar naeke do Mose tulucʼ acʼren hoponera Silpại baplakadea.

²² Silpạren mitʼṭen koṛa gidrại hoyen khan Mose do uniyakʼ ńutum Gerseme dohoketʼtaea, ente uni doe menkeda, “Iń do upriạ hoṛiń hoyakana.”

²³ Ḍher din tayom Misorren raj doe gocʼena. Ar Israelko do golam khaṭao iạte ạḍi ala jhalareko paṛao akan tahẽkana. Noa khon chaḍao ńam lạgitʼ onkoakʼ rakʼ do Isor ṭhen seṭerena.

²⁴ Isor do onkoakʼ rakʼe ańjomketʼtakote Abraham, Isahak ar Jakob lạgitʼ okaṭakʼ bondobose doholetʼ ona kathae disạkeda.

²⁵ Uni do Israelko secʼe beṅgetʼkeda ar onkoe moneyatʼkoa.