Exodus 19 - সান্তালী বাইবেল

Sinại buru ṭhen Israelko

¹ Misor disạm khon oḍok hecʼen tayom tesar cando Israelko do Sinại hahaṅkarreko seṭerena.

² Onko do Rephidim bạgikate Sinại buru samaṅre Sinại hahaṅkarreko ḍerayena.

³ Mose do burute Isor ṭhene rakapʼena. Ona jokhecʼ Probhu Isor do buru cetan khon hohoadeteye menkeda, “Am do Jakob bõsren Israelkom metakoa,

⁴ Onko do apnar mẽtʼtegeko ńelakada, misrikoń cetʼleka letʼkoa mente. Pajhạṛ cẽṛẽ cetʼleka phạ̃kṛạ̃kʼteye idiko onkage iń do Israelko iń ṭheniń ạgu akatʼkoa.

⁵ Onate ińakʼ kathako dohoy ar ińakʼ bondobos lekako calakʼ enḍekhan dhạrtiren sanam jạtrenko khon onkoge ińren bises sompottiko hoyokʼa, ente dhạrtiren sanam hoṛge ińakʼ ạidạrire menakʼkoa.

⁶ Ińren hoṛko hotetege ińren naekekoakʼ rajosṭi do hoyokʼa ar noko jạtrenkoge iń ńutumteń begar akatʼko jạtrenko hoyokʼa. Noa katha do Israelkom baḍae ocokoa.”

⁷ Unre Mose do pheḍkate Israelkoren murubbiko mitʼ ṭhene hoho jarwaketʼkoa ar Probhu Isor okako kathae metade tahẽkan ona jotogeye lạiyatʼkoa.

⁸ Noa katha ańjomkate hoṛko do mitʼ domteko menkeda, “Probhu Isor okaṭakʼe menakatʼ ale do jotogele onkaea.” Ar hoṛko okako menketʼ Mose do ona Probhu Isore baḍae ocokedea.

⁹ Niạ tayom Probhu Isor do Moseye metadea, “Am sãote tinre kathań roṛa unre jemon hoṛko onako ańjom daṛeakʼ onate iń do mitʼṭen rimil tala khon ape ṭheniń hijukʼa. Enḍekhan hoṛko do jao ghuṛi am cetanre purạ biswạsko dohoya.” Ar hoṛko okako menketʼ Mose do ona Probhu Isore lạiyadea.

^10-11 Probhu Isor do Mose arhõe metadea, “Teheń ar gapa niạ bar din do hoṛko ṭhen senkate onkom saphakoa. Onko do jemon akoakʼ kicricʼ hõko saphaetako ar tesar hilokʼ lạgitʼ sapṛao akanko tahen, ente tesar hilokʼ iń Probhu Isor do sanam hoṛko samaṅre sinại burureń pheḍ hijukʼa.

¹² Hoṛko lạgitʼ buru goṭa beṛhaete am do mitʼṭecʼ simạnam ṭhik dohokakʼa arem sontorkoa, jemon buru cetante aloko rakabokʼ se buruhõ aloko joṭed. Ar okoe ona burui joṭeda uni do khạṭigeye gocʼ ocokʼa.

¹³ Ar uniyakʼ hoṛmore ti tul baṅkate dhirite tiń goje hoyokʼa ar baṅkhan ạ̃pạ̃ṛite tuń goje hoyokʼa. Manwa se ḍaṅgra uni do jiwetʼ baṅ dohoye hoyokʼa. Eken sakwa oroṅ tayom onko do buru ṭhenko hecʼ daṛeakʼa.”

¹⁴ Inạ tayom Mose do buru khon pheḍ hecʼkate hoṛkoe sapha ocoketʼkoa ar hoṛko hõ akoakʼ kicricʼko saphaketʼtakoa.

¹⁵ Ona tayom Mose do onkoe metatʼkoa, “Tesar hilokʼ lạgitʼ sapṛaokʼpe. Ar niạ oktre okoe hõ aperen bạhu tulucʼ do alope giticʼmidokʼa.”

¹⁶ Ado tesar hilokʼ setakʼ jokhecʼ huḍur ar bijli malkaokʼ ehopʼena ar buru cetanre mitʼṭecʼ hende rimil ńelena. Ona chaḍa ạḍi murukte sakwa saḍeyena. Noako ńel ar ańjomte ḍeraren sanam hoṛ doko thar tharaoena.

¹⁷ Unre Isor samaṅre senokʼ lạgitʼ Mose do ḍera khon hoṛkoe oḍok idiketʼkoa. Ar hoṛko do buru ṭhen senkateko teṅgoyena.

¹⁸ Ona tayom Sinại buru do dhũạte esetʼena, ente Probhu Isor do burure seṅgel tala khone pheḍ hecʼena. Bhaṭa khon cetʼleka dhũạ rakabokʼ ṭhik onkage rakabokʼ ehopʼena goṭa buru do dal dalaoena.

¹⁹ Ar sakwa reakʼ saḍe do arhõ murukte saḍekʼ ehopʼena. Unre Mose do Isor sãote kathae roṛkeda ar Isor hõ ãṭ aṛaṅteye roṛ ruạṛadea.

²⁰ Probhu Isor do Sinại buru coṭreye pheḍ hecʼente Moseye hohoadea ar Mose do buru coṭteye rakapʼena.

²¹ Probhu Isor do Moseye metadea, “Am do latarte senkate hoṛkom sontorkoa jemon Probhu Isor ńele lạgitʼ simạna aloko parom. Arko onka lekhan ḍher hoṛgeko gujukʼa.

²² Ar Probhu Isor ṭhenko sorokʼkan naekeko hõko saphakʼma. Ar bako saphakʼ khan Probhu Isor do kajak sạjạiye emakoa.”

²³ Mose do Probhu Isore roṛ ruạṛadea, “Menkhan hoṛko do Sinại buru cetante bako hecʼ daṛeakʼa. Amge coṅ ale mam sontor akatʼle, jemon buru beṛhaete simạnakoń bandhaote am lạgitʼ iń begar dohokakʼ.”

²⁴ Unre Probhu Isor do Moseye metadea, “Am do latarte pheḍokʼme. Ona tayom am ar Aron do arhõ cetante rakapʼ hijukʼ ben. Menkhan naekeko ar hoṛko do simạna paromkate iń ṭhen jemon aloko rakapʼ hijukʼ. Arko hijukʼ khan iń do ạḍi bạṛicʼ iń sạjạikoa.”

²⁵ Noa katha ańjomkate Mose do latarteye pheḍ hecʼente hoṛko sanamakʼe baḍae ocoketʼkoa.