Exodus 18 - সান্তালী বাইবেল

Mose sãote Jethrowakʼ ńapamokʼ

¹ Isor do acʼren hoṛ Israelko ar Mose lạgitʼ okae ceka akatʼ ona jotowakʼge Moseren hońhartetʼ Midionren naeke Jethrowakʼ luturre senakan tahẽkana. Ar Mose okalekate Misor disạm khon Israelkoe oḍok ạguketʼko ona hõe ańjomkeda.

^2-3 Mose do acʼren bạhu Sipora Misor disạm khone kolledea, ar Jethro hõ uni ar uniren banar hopon acʼ ṭhene doholetʼkinạ. Moseye menleda, “Iń do eṭakʼ disạmre porjạt iń hoyakana;” Ona iạte acʼren maraṅicʼ hopon do Gersone ńutumkedea.

⁴ Ar eṭakʼicʼ hopon do Eliasere ńutumledea (metakʼme “Isorge ińren gokʼṛoyicʼ ”) ente uniye menleda, “Iń babaren Isorgeye goṛo akawạdińạ. Ar unige lạṛhạire Pharaoakʼ ti khone bańcao akadińạ.”

⁵ Isorakʼ buru ṭhen Mose oka hahaṅkarre tạmbu ṭaṅgaokateye ḍeralen onḍege uniren bạhu ar hoponkin soṅgekate hońhartetʼ Jethro doe seṭerena.

⁶ Noa lahare uni do Moseye roṛ gotʼade tahẽkana, “Ạliń do abenren hõńharben Jethro kana liń. Abenren bạhu ar abenren hoponkin soṅgekate aben ṭhen liń hijukʼkana.”

⁷ Khobor ańjomkate Mose do acʼren hońhartetʼ sãote ńapamokʼ lạgitʼe oḍok hecʼena. Uni do hońhartetʼe ḍobokʼadea are cokʼadea. Ar boge judạkin kuliyante tạmbu bhitriteye aderkedea.

⁸ Probhu Isor do Israelko secʼ tahẽkate Pharao ar Misriko cetanre okae cekaketʼ ona jotowakʼ hońhartetʼe baḍae ocokedea. Ar calakʼ horre akoakʼ kosṭo reakʼ katha ar Isor cetʼlekae bańcaoketʼko ona hõe baḍae ocokedea.

^9-10 Misrikoakʼ ti khon Israelko bańcaoko lạgitʼ Probhu Isor okae bhạlạiyketʼko onate Jethro do rạskạteye menkeda, “Bhạgangeae Probhu Isor do, one okoe Pharao ar Misrikoakʼ ti khon apeye bańcao akatʼpe! Noko hoṛko do unige misrikoakʼ ti khone bańcao akatʼkoa.

¹¹ Onate ńit iń bujhạ daṛeakʼ kana, joto debotako khon Probhu Isorgeye maraṅa, ente debotako okako reaṅ Israelko upạrteko gorobokʼkan tahẽkan onako babotre Probhu Isorgeye maraṅa.”

¹² Inạ tayom Jethro do Isor ńutumte jeredokʼ samaṅokʼakʼ ar eṭakʼ dãṛẽko lạgitʼ janwarkoe ạguketʼkoa. Ar ona tayom Aron ar Israelren sanam murubbiko do Isor samaṅre Moseren hońhartetʼ sãote jojomko duṛupʼena.

Jethrowakʼ sopolha

¹³ Dosar hilokʼ Mose do hoṛko bicạrkatako lạgitʼe duṛupʼena. Ar hoṛko do setakʼ khon ạyupʼ hạbicʼ Mose samaṅre teṅgo akanko tahẽyena.

¹⁴ Hoṛko sãote Mose nonkae ńelkede khan acʼren hońhartetʼe menkeda, “Aben do hoṛko sãote noa do cetʼ ben ceka kana? Aben do cedakʼ eskar doben bicạreda, ar cedakʼ hoṛko do setakʼ khon ạyupʼ hạbicʼ aben beṛhaeteko teṅgo akana?”

¹⁵ Mose do hońhartetʼe roṛ ruạṛadea, “Isorakʼ sana baḍae lạgitʼge hoṛko do ạliń ṭhenko hijukʼ kana.

¹⁶ Ar jãhãn jhogṛa jhạṭi rakapʼ lenkhange onko do ạliń ṭhenko hijukʼa ar ạliń doliń bicạr chinḍạu katako kana, ar Isorakʼ niạm ar hukumko liń bujhạu akokana.”

¹⁷ Unre Moseren hońhartetʼe menkeda, “Aben okaben cekayetʼ ona ạḍi baben bhageyeda.

¹⁸ Onate aben ar abenren hoṛko khạṭigeko laṅga cabakʼa. Kạmi do nunạkʼ hamalgea, aben eskarte ona do baben daṛeakʼa.

¹⁹ Ńitokʼ ạlińakʼ mitʼṭecʼ solha ańjom ben, onate Isor hõ aben sãoteye tahena. Aben do bickom Isor ṭhen hoṛkoren bachaoicʼ lekate hoṛkoakʼ jhogṛa jhạṭi do Isor samaṅre idiyben.

²⁰ Ona tayom do sanam niạm ar hukumko reaṅ ben husiạrkoa. Ona chaḍa cetʼleka calakʼ hoyokʼa ar cetʼkoko kạmiya ona hõ ben bujhạuakoa.

²¹ Ona tayom sanam hoṛko tala khon nonkan lekman hoṛ ben bachaokoa okoe do Isorko batorae ar sạriyakʼreko tahenkan ar behokakʼko hirkhạwakʼ kan. Onkoge aben do mukhiyạ lekate ben bahalkoa, adom do hajarko cetanre, adom do saeko cetanre, adomko do mõṛẽgelko cetanre ar adomko do gelko cetanre.

²² Noko do jao ghuṛi hoṛkoakʼko bicạrtakoa. Ar noko do huḍińakʼko reakʼko bicạra ar maraṅakʼ bicạrko do aben ṭhenko ạguiya. Nonkate abenakʼ kạmi do rawalokʼtabena ente onko hõ thoṛa bojhako gokʼ goṛowabena.

²³ Isorakʼ hukum ńamkate ben nonkae khan enḍekhan noa kạmi hõ rawalokʼ tabena ar hoṛko hõ sulukte apan ạpin ṭhạ̃iteko ruạṛ daṛeakʼa.”

²⁴ Mose do acʼren hońhartetʼakʼ solhae ańjomketʼtaea ar uni okae metade onageye kạmikeda.

²⁵ Uni do sanam Israelko tala khon lekman hoṛkoe bachaoketʼkote mukhiyạko lekateye bahalketʼkoa- adomko do hajarko cetanre, adomko do saeko cetanre, adomko do mõṛẽgelko cetanre ar adomko do gelko cetanre.

²⁶ Onko do jao ghuṛi hoṛkoakʼko bicạretʼkan tahẽkana. Ar muskilakʼ bicạrko do Mose ṭhenko ạguyetʼ tahẽkana, menkhan huḍińakʼ bicạrko do akogeko bicạr chinḍạuetʼtako tahẽkana.

²⁷ Tayomte Mose do acʼren hońhortetʼe bidạkadea ar uni do acʼakʼ disạmteye ruạṛ calaoena.