Exodus 17 - সান্তালী বাইবেল

Dhiri khon dakʼ oḍokokʼkan

¹ Ado Probhu Isorakʼ hukumleka Israelko do Sin hahaṅkar ṭoṭha khonko uṭhạuente mitʼ jaega khon armitʼ jaegate calakʼ calakʼte mucạtʼre Rephidimreko ḍerayena. Menkhan onḍe do ńũi reakʼ dakʼ baṅ tahẽkana.

² Onate onko do Mose tulucʼ jhogṛayenteko metadea, “Ńũi lạgitʼ dakʼ emaleme.” Moseye metatʼkoa, “Iń tulucʼ do cedakʼpe jhogṛakʼ kana, ar Probhu Isor do cedakʼpe biḍạu aṭkarede kana?”

³ Menkhan hoṛko do dakʼ tetaṅ iạte Mose upạrteko karacʼ kurucʼena arko menkeda, “Dakʼ reakʼ ṭonṭate jemon nonḍele gujukʼ ona lạgitʼge cetʼ ale ar aleren hoponko ar hoponerako ar aleren ạsul janwarko Misor khonem ạguakatʼlea?”

⁴ Noa katha ańjomkate Mose do Probhu Isor ṭhen rakʼketʼteye menkeda, “Iń do noko hoṛko iạte cetʼ iń cekaea? Ar thoṛa khange onko do dhiriteko tińińa.”

⁵ Unre Probhu Isor do Moseye metadea, Israelkoren adom murubbiko soṅgekate hoṛko lahate calakʼpe. Ar oka ṭheṅgate nil gaḍa reakʼ dakʼem dalletʼ ona hataokate laha idikʼme.

⁶ Ona tayom iń do Horeb buru ṭhen am samaṅre mitʼṭecʼ dhiri cetanreń teṅgona. Am do ona dhirim dala ar onate hoṛko lạgitʼ onḍe khon dakʼ oḍokokʼa.” Ar Mose do Israelkoren murubbiko samaṅreye onkakeda.

⁷ Hoṛko noa Rephidimreko jhogṛalente ar noako roṛletʼte, “Probhu Isor do abo sãore menaea, se baṅa?” Ona iạte Mose do noa jaega reakʼ ńutum Masa (metakʼme “biḍạu”) ar Meriba (metakʼme “jhogṛae”) dohokeda.

Amalekiko sãote lạṛhại

⁸ Niạ oktere Amalekikoren palṭonko do Israelko tulucʼ lạṛhại lạgitʼ Rephidimreko jarwayena.

⁹ Unre Mose do Josuại metadea, “Am do aboren hoṛko bachaokate Amalekiko upạrte lạṛhại calakʼme. Ar iń do gapage Isorakʼ ona ṭheṅga hataokate buru muthnireń teṅgona.”

¹⁰ Josuạ do Mose okalekae metade tahẽkan onkageye kạmikeda. Uni do Amalekiko upạrte lạṛhại lạgitʼe oḍok senena. Ar Mose, Aron ar Hur do ona buru muthniteko rakapʼena.

¹¹ Ar lạṛhại jokhecʼ Mose do tin hạbicʼ acʼakʼ tiye tul dohokakʼkan tahẽkan unhạbicʼ Israelkoko jitạukʼkan tahẽkana; Arhõ tinre tiye pheḍetʼtae tahẽkana unre do Amalekikoko jitạukʼkan tahẽkana.

¹² Nonkate Moseyakʼ ti do laṅga idiyentaea. Unre unkin do mitʼṭecʼ dhirikin ạgukeda, ar Mose do ona cetanreye duṛupʼena. Ar Aron ar Hur do banar secʼ khon uniyakʼ tikin tul akatʼtae tahẽkana. Onate siń cando ạuriye hạsurokʼ dhạbicʼ uniyakʼ tikin do onkage taheyena.

¹³ Onate Josuạ do Amlekiko lạṛhạiteye bhagaoketʼkoa.

¹⁴ Ona tayom Probhu Isor do Moseye metadea, “Noa lạṛhại reakʼ katha disạ dohoy lạgitʼ mitʼṭecʼ puthire ol dohokakʼme ar Josuạ metaeme, iń do dhạrti khon Amalekikoakʼ ńutumiń mohor meṭaotakoa.”

¹⁵ Tayomte Mose do mitʼṭecʼ pinḍ benaokate ona reakʼ ńutum do Jehowa-nisiye (metakʼme “Probhu Isorge ińakʼ jhạnḍi”) dohokeda.

¹⁶ Moseye menkeda, “Probhu Isorakʼ siṅghạson upạrte ti rakapʼ hoyakana, ona iạte piṛhike piṛhi Probhu Isor do Amalekiko birudreye tahena.”