Exodus 16 - সান্তালী বাইবেল

Manna ar gunḍri cẽṛẽko

¹ Israelko do Elim khon arhõ uṭhạuente calakʼko ehopʼena. Misor disạm khonko oḍok hecʼen tayom dosar cando reakʼ gelmõṛẽ din hilokʼ onko do Sin reakʼ hahaṅkar ṭoṭhareko seṭerena. Noa jaega do Elim ar Sinại buru talare tahẽkana.

² Sin hahaṅkar ṭoṭhare Israelkoren goṭa dolrenkoge Mose ar Aron upạrteko karacʼ kurucʼena ar aema kathako roṛkeda.

³ Onkoko menkeda, “Misor disạmre Probhu Isorakʼ tire cedakʼ baṅ bale gocʼ ocolen. Onḍe do jel reakʼ ṭukucʼ samaṅre dohokate lacʼ bikʼ piṭhạ ar jel le jometʼ tahẽkana. Aben do begor jomte gocʼ ocole lạgitʼ noa hahaṅkarte ben ạguakatʼlea.”

⁴ Unre Probhu Isor do Moseye metadea, “Iń do serma khon jạṛi dakʼ leka jomakʼ iń ńur ocoya. Ar hoṛko do dinạm hilokʼ bahrete senkate enhilokʼ reakʼ jomakʼko halaṅ joṅa. Ar ińakʼ hukum lekako senokʼa se baṅ ona reaṅ iń biḍạukoa.

⁵ Hapta reakʼ turuiyakʼ dinre jemon din hilokʼ reakʼ dobṛa halaṅkate jomakʼko benaojoṅ.”

^6-7 Unre Mose ar Aron do sanam Israelkin metatʼkoa, “Probhu Isor upạrte okako kathape menakatʼ uni do onae ańjomakatʼte teheń ạyupʼgepe baḍae daṛeakʼa, Probhu Isorge Misor disạm khone oḍok ạguakatʼpea ar uniyakʼ ṭhonok do gapa setakʼ khangepe ńela. Ar ạliń doliń celekante, ạliń upạrte nunạkʼ kathape roṛeda?”

⁸ Mose do arhõe menkeda, “Ạyupʼ jokhecʼ Probhu Isor do tinre jele emapea ar setakʼre piṭhạ unrepe bujhạu daṛeakʼa, Probhu Isorge Misor disạm khone oḍok ạguakatʼpea. Uni upạrte tinạkʼ kathape roṛakatʼ uni do jotogeye ańjom akada. Ar ạliń doliń celekana? Noako katha do ạliń upạrte do baṅ, menkhan Probhu Isor upạrtegepe roṛakada.”

⁹ Ona tayom Mose do sanam Israelko samaṅre Aron noa katha roṛ lạgitʼe metadea, “Probhu Isor do acʼ upạrte apeakʼ aema kathae ańjomakada, ar onate uni samaṅre calakʼpe.”

¹⁰ Aron do tinre Israelko sãote kathae roroṛkan tahẽkana unre onko do hahaṅkar secʼko beṅgetʼketʼ khan, onḍe rimilre Probhu Isorakʼ ṭhonokko ńelkeda.

¹¹ Unre Probhu Isor do Moseye metadea,

¹² “Israelko iń upạrte okako kathako roṛakatʼ ona doń ańjom akada. Onko do noa katha lạiyakome, ạyupʼ jokhecʼ onko do jelko joma ar setakʼ do lacʼ bikʼ piṭhạko joma. Ar nonkateko baḍae daṛeakʼa, onkoren Probhu Isor doń ińkangea mente.”

¹³ Ado ạyupʼ jokhecʼ ạḍi utạr gunḍri cẽṛẽko rakapʼ hecʼente onkoakʼ ḍera ṭhạ̃iko perecʼ cabakeda. Ar setakʼ do ḍera beṛhaete sisir ńurakan tahẽkana.

¹⁴ Ar tinre ona sisir hawetʼena unre otre hako cũyạ̃kʼ leka ńelena. Ona do ńelokʼte rataṅ leka ńur akan tahẽkana.

¹⁵ Ona ńelte Israelko do ako akoreko mepenena, “Onako do cetʼ kana?” Ar cetʼkana mente ona do bako baḍae daṛeada. Unre Mose do onkoe metatʼkoa, “Noa do ona piṭhạ kana oka do Probhu Isor jom lạgitʼe emakatʼpe.

¹⁶ Probhu Isor do noa hukume emakatʼpea, mimitʼko jemon gharońj reakʼ jạruṛokʼ lekako halaṅ joṅ. Tạmburen mimitʼko lạgitʼ mitʼ Omor kate (bar liṭar gan) jemonko halaṅ joṅ.”

¹⁷ Ar Israelko doko onkakeda. Adomko do ḍherko halaṅkeda, ar adomko do thoṛako halaṅkeda.

¹⁸ Menkhan Omor reakʼ ojonte onako soṅketʼ khan okoe ḍherko halaṅketʼ onko do baṅ bạ̃ṛtilentakoa ar okoe thoṛako halaṅketʼ onko hõ baṅ komaolentakoa. Mimitʼkoge gharońj reakʼ jạruṛokʼ lekako halaṅkeda.

¹⁹ Ona tayom Mose do onkoe metatʼkoa, “Setakʼ lạgitʼ do alope sarecʼ dohokakʼa.”

²⁰ Menkhan adomko do Moseyakʼ katha bako ańjomletʼte setakʼ lạgitʼ thoṛako dohokada. Onate ona doko tejokeda ar soyena. Noa ńelte Mose do onko cetanre ạḍiye edreyena.

²¹ Ar hoṛko do din hilokʼ setakʼre gharońj reakʼ jạruṛokʼ lekako halaṅ joṅkan tahẽkana. Menkhan setoṅ sạrdi idikʼ sãote onako do lekʼkan tahẽkana.

²² Hapta reakʼ turui din hilokʼ onko do dobṛakate, metakʼme bar Omorkate mimitʼko lạgitʼko halaṅkeda, ar Israelkoren mukhiyạko do ona katha Moseko lạiyadea.

²³ Unre Mose do onkoe metatʼkoa, “Noa do Probhu Isorakʼ katha kangea. Gapa do jirạukʼ mãhã kana, ar Probhu Isor kangeae sonot jirạukʼ mãhã do. Onate tinạkʼpe rapakʼ daṛeakʼ ar tinạkʼpe teke daṛeakʼ ona do onkaepe; ar sarecʼakʼ do dosar hilokʼ lạgitʼ dohokakʼpe.”

²⁴ Moseyakʼ hukum lekage onko do setakʼ lạgitʼ sarecʼakʼ hạṭiń doko dohokada. Ar enhilokʼ ona do baṅ so lena, ar tejo hõ bako tejoleda.

²⁵ Mose do unreye menkeda, “Teheń do onakoge jompe ente teheń do Probhu Isore niṭakatʼ jirạukʼ mãhã kana. Teheń ape do onako ṭạnḍire bape ńel ńama.

²⁶ Ape do hapta reakʼ turui din onape halaṅa menkhan eaeyakʼ dinre do bape ńama, ente ona din do jirạukʼ din kana.”

²⁷ Enhõ eae din hilokʼ thoṛa hoṛ do ona halaṅ lạgitʼ bahreteko senena, menkhan cetʼge bako ńamleda.

²⁸ Unre Probhu Isor do Moseye metadea, “Ar tinạkʼ din ape do ińakʼ hukum ar ińakʼ solhako bape manaoa?

²⁹ Ńelpe, ape lạgitʼ jirạukʼ mãhã reakʼ noa bondobos do Probhu Isorgeye dohoakada. Onate turui mãhã hilokʼ uni do bar din reakʼ jomakʼe jogao ape kana. Ar eae mãhã hilokʼ do okoe hõ oṛakʼ bahrete alope oḍokokʼa, bhitrirege tahenpe.”

³⁰ Onatege hoṛko do eae hilokʼko jirạuena.

³¹ Israelkoakʼ ona jomakʼ do Mannako metakʼkan tahẽkana (metakʼme “Onako do cetʼ kana?”). Noako do ńelokʼte dhạniạ jaṅ leka ponḍge tahẽkana; ar ona reakʼ sebel do dumur rasa piṭhạ leka.

³² Tayomte Moseye menkeda, “Probhu Isore hukum akada aperen bõsko lạgitʼ mitʼ Omorkate Manna pe rakapʼ dohokakʼa, jemon onkoko ńel daṛeakʼ Probhu Isor do Misor disạm khone oḍok ạgupe tayom hahaṅkarre cetʼ lekan jomakʼe ematʼpe tahẽkana mente.”

³³ Mose do Arone metadea, “Am do mitʼṭecʼ dohowakʼre mitʼ Omorkate Manna hataokate Probhu Isor samaṅre dohoyme jemon piṛhike piṛhi hạbicʼ ona do tahen.”

³⁴ Ar Manna jemon piṛhike piṛhi hạbicʼ doho akan tahen ona lạgitʼ Aron do Moseye emakawade Probhu Isorakʼ hukum leka gohawakʼ samaṅreye dohokada.

³⁵ Hoṛko girobas akan nonkan mitʼṭecʼ jaegare, metakʼme Kanan disạm reakʼ simạnate ạuriko hijukʼ hạbicʼ Israelko do pongel bochor hạbicʼ ona Mannako jomkeda.

³⁶ Mitʼ Omor soṅakʼ do hoyokʼ kana mitʼ keji irạlsae gram.