Exodus 15 - সান্তালী বাইবেল

Mose ar Mạriạmakʼ sereń

¹ Noa tayom Mose ar Israelko do Probhu Isor ńutumte noa sereńko sereńkeda: “Iń do Probhu Isor ńutumteń sereńa, ente hoṛkoakʼ mẽtʼre uniyakʼ ṭhonok maraṅentaea. Sadom ar aswari dolrenko do unige jalapuri reakʼ dakʼreye giḍikatʼkoa.

² Probhu Isorge ińakʼ daṛe, unige ińakʼ sereń do; ińakʼ bańcao do unirege menakʼa. Probhuge ińren Isor do; uniyakʼgeń sarhao sereńa. Uni do iń ạpuńren Isor kanae; uniyakʼ ṭhonok reakʼ iń sereńa.

³ Uniyakʼ ńutum do Probhu Isorge, uni doe lạṛhại bir kana.

⁴ Pharaoakʼ rãt gạḍiko ar palṭonko do unige jalapuri reakʼ dakʼreye giḍikatʼkoa; Pharaoren bachao akan palṭonko do arakʼ jalapurireko unum gocʼena.

⁵ Onko do khạndri dakʼreko loṭomena dhiri leka jalapurireko tạpukʼena.

⁶ “E Probhu Isor, ektiạrite perecʼ amakʼ ona jojom ti do, hẽ ona jojom ti do bạirikoe chaka chunketʼkoa.

⁷ Okoe am upạrteko teṅgoyen amakʼ maraṅ ṭhonokte onko do latartem giḍikatʼkoa; ar amakʼ jal jalaokʼkan edre do busupʼ leka onkoe lo maraoketʼkoa.

⁸ Amakʼ sãhetʼte dakʼ do jarwayena. Ar ḍheokote perecʼ dakʼ do ḍhipi leka teṅgoyena, ar athantar dakʼ do jalapurire jomaṭ badhaoena.

⁹ “Bạiri doe menkeda, ‘onkoń khudạukoa, ariń sapʼkoa, ar onkoakʼ jiniskoń hạṭińjoṅa; iń do onkoakʼ jiniskote apnar iń perejokʼa. Ar tarwaṛe sapʼkate onkoń khudạukoa.’

¹⁰ Menkhan am dom oṅketʼte hoeyem ạgukeda, ar jalapuri hõ onkoe loṭomketʼkoa. Onko do khạndri dakʼre sisạ lekako tạpukʼena.

¹¹ “E Probhu Isor, Debko modre am leka do okoe menakʼkoa? Okoe menakʼkoa am leka sonot ar ṭhonokanicʼ ar sarhao sereńkore botoranicʼ do? Ar hahaṛawakʼ kạkʼmiyicʼ hõ okoeyakʼ menakʼtaea?

¹² Am do amakʼ jojom tiyem tiạrketʼtama, ar dhạrti do onkoe utʼketʼkoa.

¹³ Amakʼ asambheṛ dulạṛtem chaḍao ạguketʼkoa ar amge onko dom ạyurkoa. Apnarakʼ daṛete amakʼ sonot oṛakʼre amgem ạyur ạgukoa.

¹⁴ Ona katha ańjomkate eṭakʼ jạtrenko do botorteko thar tharaokʼa, ar Philisṭiko do monreko dhak dhakaokʼa.

^15-16 Edomren sordarko do botorteko keklesedokʼa; ar Moabren mukhiyạko doko thar tharaokʼa, ar botoranakʼ samaṅreko paṛaokʼte Kananrenko do dilko adtakoa. E Probhu Isor, amren hoṛkoakʼ sen joṅakʼ ạuri mucạdokʼ hạbicʼ, amren chaḍao akan hoṛkoakʼ sen joṅakʼ ạuri mucạdokʼ hạbicʼ amakʼ maraṅ daṛe samaṅre onko jạtrenko do dhiri lekako ńur tahena.

¹⁷ Amge amren hoṛko ạgukate poha leka amakʼ bururem rohoekoa. E Probhu Isor, am apnar tite benaoakʼ onage amakʼ tahen oṛakʼ do; E Probhu Isor, amakʼ tite benaoakʼ onage amakʼ tahen ṭhạ̃i do;

¹⁸ E Probhu Isor, jaejug hạbicʼ amgem rajokʼa.”

Mạriạmakʼ sereń

¹⁹ Pharaoren sadomko, rãt gạḍiko ar aswariko tinre jalapurireko boloyena unre Probhu Isor do jalapuri reakʼ dakʼ onko cetanreye ạgu ruạṛkeda. Menkhan Israelko do jalapuri talate kuṭhạ̃ṛgeko taṛam paromena.

²⁰ Aronren miserat Mạriạm do mitʼṭen maejiu nạbigeye tahẽkana. Uni do toblae sapʼkeda, ar uni tayom tayomte eṭakʼ maejiuko hõ tobla sapʼkate enecʼ enecʼteko oḍok hecʼena.

²¹ Moseyakʼ sereń reakʼ roṛ ruạṛre Mạriạm do noa sereńe sereńkeda; “Ape do Probhu Isor ńutumte sereńpe, ente hoṛkoakʼ mẽtʼãhãre uniyakʼ ṭhonok do maraṅena. Sadomko ar aswariko do unige doreão dakʼreye khadleketʼkoa.”

Dakʼ reakʼ bebosta

²² Tayomte Mose do arakʼ jalapuri khon Israelkoe idiketʼkoa. Onko do pạhilre Sur ńutuman mitʼṭen hahaṅkar jaegareko seṭerena. Ona hahaṅkar jaegare onko do pe din hạbicʼ dãṛã dãṛãte okarehõ dakʼge bako ńamleda.

²³ Tayomte onko do Mara ńutumanakʼ mitʼṭen jaegareko seṭerena, menkhan onḍenakʼ dakʼ do haṛhatʼgete bako ńũ daṛeada. Onate ona jaega reakʼ ńutum do Marako dohokeda (metakʼme “haṛhatʼ ”).

²⁴ Ar hoṛko do Mose upạrte karacʼ kurucʼenteko menkeda, “Ńitokʼ ńũi reakʼ dakʼ do okarele ńama?”

²⁵ Noa katha ańjomkate Mose do Probhu Isor ṭhene rakʼkeda. Uni do Mose mitʼṭen dareye udukʼadea. Mose do dakʼre ona dareye topoketʼ khan dakʼ do ńũi lek hoyena. Probhu Isor do onḍe biḍạureye paṛaoketʼkote onko lạgitʼ mitʼṭecʼ niạm ar ạne bandhaokeda.

²⁶ Uni doe metatʼko tahẽkana, “Ape do aperen Probhu Isorakʼ kathape bataotaea ar uniyakʼ mẽtʼre oka lek reakʼ kan onape onkaea ar uniyakʼ hukumkope luturakʼa ar uni emakʼ sanam niạmpe dohoya, enḍekhan Misriko cetanre okako rog iń ạguletʼ ape cetanre ona bạń ạguya. Ar iń Probhu Isorge ape doń bogepea.”

²⁷ Niạ tayom onko do Elimko metakʼ mitʼṭecʼ jaega ṭhenko seṭerena. Onḍe do gelbar goṭecʼ dakʼ jharna ar eae goṭecʼ khijur dare tahẽkana. Ona dakʼ jharna sorrege onko doko ḍerayena.