Exodus 14 - সান্তালী বাইবেল

¹ Tayomte Probhu Isor do Moseye metadea,

² “Israelkom metakoa jemonko ạcur calakʼte jalapuri ar Migdol tala reakʼ Pi-Hakirot ńutumanakʼ jaega ṭhenko ḍerakʼ. Ona jaega do jalapuri aṛe reakʼ Bakʼ al Sephon mohnḍa muhnḍirege menakʼa.

³ Noa ńelte Pharao doe hudisa Israelko do bako ṭhik daṛeakʼkana cetʼko cekaea mente onko do disạmrege ạcur baṛaete hahaṅkarregeko aṭkao akana.

⁴ Ar iń do Pharaoakʼ moniń keṭecʼ ocoytaea ar uni do onkoe khudạu idikoa. Menkhan Pharao ar uniren lạṛhại phạdkoge ińakʼ ṭhonok sodorokʼren hoṛko hoyokʼa. Ar noa iạte Misorrenko baḍae daṛeakʼa, iń kangeạń Probhu Isor do.” Ar Israelko do Probhu Isorakʼ katha lekako kạmikeda.

⁵ Misorren raj Pharao do tinreye lại ocoyena baṅma, Israelko doko dạṛkeda unre Pharao ar uniren kạmiyạkoakʼ mon do pheraoentakoa. Onkoko menkeda, “Noa do cetʼ bon cekakeda? Onko bidạkate aboren golam bon atʼketʼkoa.”

⁶ Noa menkate Pharao do acʼakʼ rãt gạḍiko sapṛao lạgitʼe hukumkeda ar acʼren palṭonko jarwaketʼkote soṅgeteye idiketʼkoa.

⁷ Uni do turui sae rãt gạḍikoe bachaoana, ar ona chaḍa misrikoakʼ eṭakʼ rãt gạḍiko hõe soṅge torakeda. Ar mimitʼ goṭecʼ rãt gạḍire mimitʼ goṭen senapotikoe dohoketʼkoa.

⁸ Probhu do Misorren raj Pharaoakʼ mone keṭecʼ ocoketʼtaea. Ar Israelko dilkate samaṅ secʼko sen idikʼkan tahẽkanre uni do onkoe khudạu idiketʼkoa.

⁹ Misorrenko do uniren sanam sadomko, aswariko ar palṭonkoante onkoko khudạu idiketʼkoa. Unre Israelko do jalapuri aṛe Bakʼal Sephonreko ḍera akan tahẽkana ar onko doko tiyokʼ ńõkʼ ocoakan tahẽkana.

¹⁰ Ar Israelko do Pharao ar uniren dolko ako tayomte hijukʼkanko ńelketʼko khan ạḍiko botorena ar Probhu ṭhenko rakʼkeda.

¹¹ Onko do Moseko metadea, “Misorre do cetʼ topakʼ lạgitʼ jaega baṅ tahẽkante gocʼ giḍikale lạgitʼ noa hahaṅkar jaegatem ạgu akatʼlea? Misor khon oḍok ạgukate ale sãote noa do cetʼem cekakeda?

¹² Misorre tahẽkanrege cetʼ bale metatʼme tahẽkana, ‘nonḍege tahẽocoaleme; ale do misrikoren golam akangele tahena’? Nonḍe noa hahaṅkarre gujukʼ khon golam akae tahenge ale lạgitʼ do bhage tahẽkana.”

¹³ Mose do onkoe metatʼkoa, “Alope botorokʼa. Okare menakʼpe onḍege tahenpe ar Probhuakʼ bańcao reakʼ kạmi ńelpe. Uni do teheńge ape lạgitʼe onkaea. Okoe misrikope ńeletʼko onko do ar tisge bape ńelkoa.

¹⁴ Ape do eken thir hape akae tahenpe. Probhuge aperen hoykateye lạṛhạiya.”

¹⁵ Niạ tayom Probhu do Moseye metadea, “Am do cedakʼem rakʼeda? Israelko laha secʼ sen idikʼ metakom.

¹⁶ Ar amakʼ ṭheṅga sabme ar jalapuri cetanre amakʼ ti tiạrtam ar jalapuri bar hạṭiń ocoyme. Ar onate Israelko do jalapuri talate rohoṛgeko taṛam parom daṛeakʼa.

¹⁷ Menkhan iń do misrikoakʼ mon nonkań keṭecʼ ocoytakoa, onko do Israelkoko khudạu idikoa ar jalapuriteko bolokʼa. Onate Pharao ar uniren sanam palṭonko, rãt gạḍiko ar aswariko do ińakʼ ṭhonok sodorokʼ reakʼko hoyokʼa.

¹⁸ Ona ńelte misriko doko bujhạu daṛeakʼa, iń kangeạń Probhu Isor do.”

^19-20 Unre Isorren okoeṭakʼ goḍet do Israelko laha lahateye calakʼkan tahẽkan uni doe ạcurente onko tayom secʼe senena. Ar rimil khunṭi hõ onko samaṅ khon tayom secʼ ocokʼente Israelko ar misriko talare teṅgoyena. Onate misriko secʼ do ńutge ar Israelko secʼ do ńindạre hõ siń leka hoyena. Onkate misriko do goṭa ńindạ Israelko ṭhen bako hecʼsor daṛeada.

²¹ Tayomte Mose do jalapuri cetanre acʼakʼ tiye tiyạrketʼtaea; ar Probhu Isor do goṭa ńindạ mitʼṭecʼ purub reakʼ maraṅ hoeye ạguketʼte dakʼ doe bar hạṭiń ocokeda. Uni do dakʼe bar hạṭińketʼ khan jalapuri talate mitʼṭecʼ kuṭhạ̃ṛ hore tearkeda.

²² Ar Israelko do jalapuri talate kuṭhạ̃ṛgeko parom calaoena. Ar jalapuri reakʼ dakʼ do onko dene banar secʼ teṅgo tahẽyena.

²³ Noa ńelte misriko do tayom khon Israelkoko khudạu idiketʼkoa. Ar Pharaoren sadomko, rãt gạḍiko ar aswariko hõ onko tayom tayomte jalapuriteko boloyena.

²⁴ Ar setakʼ jokhecʼ Probhu Isor do rimil khunṭi ar seṅgel khunṭi khon misrikoren palṭonko secʼe beṅgetʼkeda ar onko talare mitʼṭecʼ ạulạ jhạulại hoyocokeda.

²⁵ Ona chaḍa uni do rãt gạḍiko reakʼ pạihạ̃ko hõe totʼgiḍikatʼ takoa; onate rãt gạḍi cakʼlao hoṛ do ạḍi kosṭo hoyen takoa. Unre misriko doko menkeda, “Dela, abo do Israelko bạgikate bon dạṛ joṅma, ente Probhu Isorge Israelko secʼ hoykate abo upạrteye lạṛhại kana.”

²⁶ Unre Probhu Isor do Moseye metadea, “Jalapuri cetanre amakʼ ti tiạrtam. Onate dakʼ do arhõ mitʼ ruạṛokʼte misriko cetanre, onkoakʼ rãt gạḍikore ar aswariko cetanre paṛaokʼa.”

²⁷ Unre Mose do acʼakʼ ti jalapuri secʼe tiạrkeda. Ar setakʼ jokhecʼ jalapuri reakʼ dakʼ do arhõ mitʼ ruạṛena. Misriko do unreko ńir baṛakeda, menkhan Probhu Isor do jalapuri reakʼ ḍheoteye ḍombol idiketʼkoa.

²⁸ Jalapuri reakʼ dakʼ do mitʼ ruạṛente rãt gạḍiko ar aswarikoakʼ, metakʼme Israelko tayomteko ńir hijukʼkan Pharaoren goṭa palṭon phạdkoe unum cabaketʼkoa. Onko do ar okoehõ jiwetʼ bako tahẽlena.

²⁹ Menkhan Israelko do tala horte kuṭhạ̃ṛgeko parom calaoena. Ar dakʼ do onko dene banar secʼ bhit leka teṅgo tahẽkana.

³⁰ Probhu Isor do enhilokʼ nonkage misrikoakʼ ti khon Israelkoe bańcaoketʼkoa. Ar Israelko do misrikoakʼ mạ̃ṛĩko jalapuri aṛekoreko ńelkeda.

³¹ Probhu Isor do misriko upạrte acʼakʼ oka daṛeye udukʼketʼ ona ńelte Israelko do monre mitʼṭen botor caṛhaoatʼkoa. Onko do Probhu Isor ar uniren golam Mose cetanre purạ biswạs dohokate calakʼko ehopʼena.