Exodus 13 - সান্তালী বাইবেল

Isor ńutumte pạhil hopon begarko reaṅ

¹ Probhu Isor do Moseye metadea,

² “Israelkoren mitʼke mitʼ pạhil koṛa hopon do iń ńutumtem begar dohokoa, onko modre baṅ doe manwakan ar baṅ doko janwarkan. Mitʼke mitʼ pạhil janamokʼ koṛa hopon doko ińren kana.”

³ Unre Mose do hoṛkoe metatʼkoa, “Noa din reakʼ katha disại iạte noa dinpe manaoa, ente ape do niạ dinrege Misor reakʼ golam khonpe oḍok hecʼakana. Probhu Isorge acʼakʼ daṛeye udukʼketʼte ona disạm khone oḍok ạguakatʼpea. Niạ dinre khạmi mesalakatʼ cetʼge alope joma.

⁴ Ape do Abib cando reakʼ noa dinregepe oḍok hecʼakana.

⁵ Probhu Isor do tinre Kananrenko, Hittirenko, Amorirenko, Hibiyạrenko ar Jebusirenkoakʼ disạmteye idipea unre ape do noa candorege bochor reakʼ porobpe porobokʼa. Noa kangea ona disạm do one okaṭakʼ Probhu Isor do ape emapea mente aperen hapṛamko ṭhene gokʼletʼ. Onḍe do toa, dumur rasa ar cetʼ jãhãnakʼ reakʼ okulạnge bạnukʼa.

⁶ “Noa porob manao jokhecʼ eae din hạbicʼ bin khạmiyanakʼ piṭhạpe joma. Ar eae din hilokʼ do Probhu Isor ńutumte mitʼṭecʼpe porobokʼa.

⁷ Niạ eae din apeakʼ jomakʼ piṭhạ do bin khạmiyanakʼ baṛe hoyokʼma. Enhilokʼ apeakʼ goṭa disạmre khạmi ar khạmi mesalakatʼ jãhãn cetʼ jomakʼge alope dohokakʼa.

⁸ Enhilokʼ ape do aperen hoponkope metakoa, ‘Misor disạm khon tinreń oḍok hecʼlena unre Probhu Isor iń lạgitʼ okae cekaletʼ ona disạite noań onkayeda.’

⁹ Nonkate Probhu Isorakʼ emakʼ noa hukum reakʼ kathape cetʼakoa. Noa niạm manao do nonkan mitʼṭecʼ cinhạ hoyokʼa one ona do ti ar moloṅ reakʼ cinhạ lekae disạ ocopea, Probhu Isor do acʼakʼ daṛete Misor disạm khone oḍok ạguakatʼpea.

¹⁰ Ape do bochorke bochor niṭakatʼ dinrege noa niạmpe palona.

¹¹ Ar Probhu Isor do ape ar aperen hapṛamko ṭhen kiriạkate okaṭakʼe gokʼakatʼ ona gokʼakʼ lekate tinre Kanan disạmte idikate ạidạri lekate onae emapea,

¹² unre ape hõ aperen mitʼke mitʼ pạhil hoponko do Probhu Isor ńutumtepe emokʼa. Janwarkoren mimitʼ pạhil hopon hõ Probhu Isorrenko hoyokʼa.

¹³ Menkhan amren gadharen pạhil hoponko do mitʼṭen bheḍa se merom hopontem chaḍao hataokoa. Ar bape chaḍao hataoleko khan gadha hoponakʼ hoṭokʼpe rạpudtakoa. Ar ape do aperen mimitʼ pạhil hopon hõpe chaḍaokoa.

¹⁴ “Ar jãhãtis aperen hoponko noa reakʼ manetetʼko kulilepere onkope lạiyakoa, ‘Probhu Isor do Misor reakʼ golam khon acʼakʼ daṛeteye oḍok ạguakatʼlea.

¹⁵ Ar kạṭhuạ iạte Pharao do tinre bae hecʼ ocoale kan tahẽkana unre Probhu Isor do Misor disạmren hoṛ ar janwarkoren mimitʼ pạhil hoponkoe gocʼketʼkoa. Onate ińren janwarkoren pạhil hopon do Probhu Isor ńutumteń dãṛẽyetʼkoa ar ińren pạhilicʼ hoponiń chaḍaoede kana.

¹⁶ Noa do nonkan mitʼṭecʼ cinhạ hoyokʼa oka do ti ar moloṅ reakʼ cinhạ lekae disạ ocomea, Probhu Isor do acʼakʼ daṛete Misor disạm khone oḍok ạguketʼbona.’ ”

Arakʼ jalapuri paromokʼ

¹⁷ Pharao do tinre Israelkoe bidạkatʼkoa unre Isor do Philisṭikoakʼ disạm talate sojhe hor tahẽkanre hõ ona horte do bae ạyurletʼkoa. Ente Isore menkeda ona disạm talate calakʼ jokhecʼ lạṛhại emanreko paṛaolen khan hoedaṛeakʼa onko do mon ạcurkate arhõ Misorteko ruạṛ botejokʼa.

¹⁸ Onate Isor do hahaṅkar talate arakʼ jalapuri secʼe ạyur idiketʼkoa. Ar Israelko do lạṛhại phạd leka Misor disạm khonko oḍok hecʼena.

¹⁹ Mose do Josephakʼ jaṅkoe soṅge torakeda, ente Joseph do Israelkoe kiriạ ocoletʼkoa. Uniye metatʼko tahẽkana, “Isor do khạṭigeye ńel todarotpea. Ar nonḍe khonpe oḍok calakʼre ińakʼ jaṅko hõ soṅgete iditorae tińpe.”

²⁰ Niạ tayom onko do Sukot nagraha khon mohnḍakate hahaṅkar reakʼ Etamko metakʼ jaegareko ḍerayena.

²¹ Probhu Isor do hore udukʼ idiyako lạgitʼ siń do mitʼṭecʼ rimil khunṭire ar ńindạ do marsal emokʼ lạgitʼ seṅgel khunṭire tahẽkate onko laha lahateye calakʼkan tahẽkana. Nonkate onko do siń ar ńindạ jao oktegeko sen daṛeakʼkan tahẽkana.

²² Siń do rimil khunṭi ar ńindạ do seṅgel khunṭi jao okte hoṛko samaṅre tahenkan tahẽkana.