Exodus 10 - সান্তালী বাইবেল

Misor cetanre irạlakʼ duk-Pohoko

^1-2 Ona tayom Probhu Isor do Moseye metadea, “Am do Pharao ṭhen calakʼme. Iń do Pharao ar uniren kạmiyạkoakʼ moniń keṭecʼ akatʼtakoa jemon ińakʼ ektiạri reakʼ cinhạko ńel daṛeakʼ, ar amhõ jemon amren hoponko ar goṛom gidrạko ṭhenem lại daṛeakʼ cetʼleka Misri hoṛko lelhań benaoletʼkoa ar ińakʼ cinhạkoń udukʼatʼko tahẽkana. Onate apepe bujhạu daṛeakʼa, iń kangeạń Probhu Isor do.”

³ Mose ar Aron do unre Pharao ṭhen senkatekin menkeda, “Ibrikoren Probhu Isore meneda, ‘ar tinạkʼ din iń samaṅre bohokʼ bam kuḍburtama? Iń sewawạń lạgitʼ ińren hoṛko sen ocoakome.

⁴ Ińren hoṛko bam sen ocoako khan enḍekhan gapage amakʼ disạmre pohokoń kolkoa.

⁵ Onko do hecʼkate disạmko chạplạu eseda, ar ot hõ baṅ ńel ńamokʼa. Arel khon okako rukhiyạlen ona do noko pohoko jom cabaea.

⁶ Ona tayom am ar amren sanam kạmiyạko ar eṭakʼ sanam Misrikoakʼ oṛakʼ-duạr do onko pohokote perejokʼa. Noa disạmte hecʼ tayom amren baba-haṛam ar onkoren hapṛamko hõ nonka do tishõ bako ńelakada.’ ” Ar noa katha roṛ tayom Mose doe ạcurente Pharao ṭhen khone calaoena.

⁷ Unre Pharaoren kạmiyạko do uniko metadea, “Noko hoṛ do ar tinạkʼ din aboakʼ jhampa lekako tahena? Onko jemon akoren Isorko sewa daṛeae onate sen ocoakome. Am do cetʼ bam bujhạu daṛeakʼ kana, Misor do dhaṅ dhaser cabakʼkana mente?”

⁸ Mose ar Aron do arhõ Pharao ṭhenkin ạgu ocoyena. Pharao do unkine metatʼkinạ, “Do calakʼpe, ar aperen Probhu Isor sewawaepe. Menkhan ape sãote do ar okoekoko calakʼa?”

⁹ Moseye roṛ ruạṛkeda, “Aleren hopon ar hoponerako, aleren haṛam ar buḍhi hoṛko, aleren gidrạko ar aleren ḍaṅgrako-bhiḍiko jotoge ale sãoteko calakʼa, ente Probhu Isor ńutumte ale do mitʼṭecʼ poroble porobokʼa.”

¹⁰ Unre Pharao doe metatʼkinạ, “Jãhãtis aperen hopon ar hoponerako salakʼ iń sen ocoape khan tobe do aperen Probhu Isor hõ ape sãoteye tahenma. Husiạrokʼpe apeakʼ monsubạ do baṅ ṭhik tapea.

¹¹ Baṅa, ona do baṅ hoyokʼa, ape ma Probhu Isor sewawae lạgitʼ calakʼpe menetʼkan, enḍekhan herel hopon motogeko senokʼma.” Noa tayom Pharao samaṅ khon Mose ar Aron dokin laga ńir ocoyena.

¹² Ar Probhu Isor do Moseye metadea, “Misor disạm cetanre ti tiạrtam. Onate ṭạnḍi reakʼ sanam hạriạ̃ṛakʼko metakʼme arel khon okako rukhiyại ńamletʼ ona do pohoko hecʼkateko jom cabaea.”

¹³ Unre Mose do Misor disạm cetanre acʼakʼ ṭheṅgae tulkeda; Ar Probhu Isor do ona disạm cetanre goṭa siń ar ńindạ purub reakʼ hoeye kolkeda. Ar setakʼ jokhecʼ ona purub reakʼ hoete jhake jhak pohokoe ạguketʼkoa.

¹⁴ Noate goṭa Misor disạm cetanre alekha pohoko do hecʼkateko apʼena. Ar noa lahare nunạkʼ poho do ar tishõ bako ńelakan tahẽkana, ar tishõ bako ńelokʼa.

¹⁵ Nonkate onkote goṭa disạm do chạplạu esetʼena ar ot do hendege ńelena. Ar ṭạnḍiko reakʼ sanam hạriạ̃ṛakʼko ar dare reakʼ okako jo do arel khon sahaṛ akan tahẽkan onako joto do onko pohoko jomkeda. Goṭa Misorre hạriạ̃ṛ dareko do ar cetʼge baṅ tahẽlena.

¹⁶ Unre Pharao do usạra Mose ar Arone hoho ạgu ocoketʼkinteye metatʼkinạ, “Iń do aperen Probhu Isor ar ape upạrteń kại akada.

¹⁷ Onate dayakate niạ dhao baṛe ikạkạńpe. Ar aperen Probhu Isor ṭhen nehõrokʼpe jemon uni do iń cetan khon gujukʼ umule ocokʼ giḍikakʼ.”

¹⁸ Unre Mose do Pharao ṭhen khon ruạṛkate Probhu Isor ṭhene nehõrena.

¹⁹ Ar onate Probhu Isor do hoeye ạcur ocokeda ar pạchim khon mitʼṭecʼ kajak hoeye ạguketʼte pohokoe oṭaṅ idiketʼkoa ar arakʼ jalapurireye khadlekatʼkoa. Onkate goṭa Misor disạmre ar mitʼṭen poho hõ bako tahẽlena.

²⁰ Menkhan Probhu Isor do Pharaoakʼ mone keṭecʼ ocoketʼtaea; uni do Israelko bae sen ocowatʼkoa.

Misor cetanre areakʼ duk- Ńut

²¹ Inạ tayom Probhu Isor do Moseye metadea, “Serma secʼ amakʼ ti tiyạrtam. Onate tite ṭunḍuyetʼ leka disạm do ńut cabakʼa.”

²² Unre Mose do serma secʼ tiye tulkeda, onate Misor disạm do pe din hạbicʼ kaṛaṅ ńut ńutena.

²³ Ona pe din okoege bako ńepel ńapamlena ar oṛakʼ bạgikate okoe hõ bahrete bako oḍoklena. Menkhan Israelko okareko tahẽkan onḍe do marsalge tahẽkana.

²⁴ Unre Pharao do Mose hoho ạgu ocokedeteye metadea, “Do calakʼpe, ar Probhu Isor sewawaepe. Aperen hopon ar hoponerako hõ ape sãoteko sen daṛeakʼa, menkhan aperen ḍaṅgra-bhiḍi palko do nonḍeko tahenma.”

²⁵ Moseye roṛ ruạṛkeda, “Aleren Probhu Isor ńutumte jeredokʼ ar eṭakʼakʼ samaṅokʼakʼ janwar do amge jogao aleme.

²⁶ Aleren ḍaṅgra-bhiḍiko hõ ale sãotegele iditorakoa. Onkoakʼ mitʼṭecʼ khurạ hõ nonḍe do bale giḍi oṭokakʼa. Aleren Probhu Isor sewawae lạgitʼ noko mod khon adomko do jạṛuṛalea. Ar onḍe ạurile senokʼ hạbicʼ bale bujhạu daṛeakʼ kana Probhu Isor sewawae lạgitʼ okoeko janwar lagao aleya.”

²⁷ Menkhan Probhu Isor do Pharao rajakʼ mone keṭecʼketʼtaea ar onko sen ocoako bae rebenlena.

²⁸ Pharao do Moseye metadea, “Iń ṭhen khon pharakokʼme. Ar sontorokʼme! Ar tishõ iń samaṅre alom hijukʼa. Ar tisokʼ iń samaṅrem paṛaokʼa enhilokʼ do gujukʼ hoyokʼtama.”

²⁹ Moseye menkeda, “Am okam menketʼ onkage hoyokʼma. Ińakʼ sana leka am samaṅre do ar bạń hijukʼa.”