Ester 8 - সান্তালী বাইবেল

Jihudiko secʼ rajakʼ hukum

¹ Enhilokʼ Ahasberos raj do Jihudikoren bạiri Hamanakʼ sompotti do Ester rạniye emadea. Inạ tayom Mordekai do raj samaṅreye hạjirena, ente Ester do uni tulucʼ acʼakʼ sạgại babotre raje baḍae ocoledea.

² Raj do acʼakʼ chap akatʼ mundạm Haman ṭhen khon okae hatao ruạṛletʼ ona totʼkate Mordekaiye emadea. Ar Ester do Hamanakʼ sompotti cetanre Mordekaiye dohokadea.

³ Ester do rajakʼ jaṅgareye giḍiyena ar rakʼ rakʼte arhõ uni ṭhen nehõrkateye menkeda. Jihudiko upạrte Agagi Haman oka dusṭạmi phundiye aṭao akatʼ ona baṛe bondme.

⁴ Unre raj do acʼakʼ sona reakʼ ṭheṅga Ester secʼe ạwilkeda ar Ester doe beretʼente raj samaṅreye teṅgoyena.

⁵ Estere menkeda, “Maharaje kusikʼkan khan, ar uni nońjorre dayań ńamakatʼ khan ar kạmi do hok reakʼ kan khan ar iń cetanre kusi menae khan, enḍekhan goṭa tabe disạmre Jihudiko maraoko lạgitʼ Agagi Hamadatharen hopon Haman oka ciṭhiye olletʼ ona bạtil lạgitʼ mitʼṭecʼ hukum emokʼme.

⁶ Ińakʼ jạt ar ińren hoṛko cetanre hecʼ paṛaokʼ ghoṭnako do cekateń sahao daṛekea?”

⁷ Onate Ahasberos raj do Ester rạni ar Jihudi Mordekai tạkine metatʼkinạ, “Haman do Jihudiko upạrteye kạmiletʼte uniyakʼ sompotti do Ester iń emadea ar hoṛko do uniko pạsikedea.

⁸ Menkhan rajakʼ ńutumte olakʼ ar rajakʼ mundạm reakʼ chapakʼ jãhãn hukumge baṅ bạtilokʼa. Onate ńitokʼ bhage ben hudisetʼ khan Jihudiko lạgitʼ raj ńutumte ar mitʼṭecʼ parwana ol ocoyben ar onare rajakʼ mundạm reakʼ chap emakʼben.”

⁹ Onako din reakʼ tesar cando, metakʼme Siwan cando reakʼ bargel tesar hilokʼre rajren olokʼkoko hoho ocoyena. Ar Mordekaiyakʼ hukum lekate Bharot khon Kus hạbicʼ mitʼsae bargel eae tabe disạmren Jihudiko, tabe disạm cakʼlaoko, cetan hudạren kạmiyạko ṭhen ciṭhi ol hoyena. Ar niạ ciṭhiko do mimitʼ tabe disạm reakʼ harop ar mimitʼ tabe disạm reakʼ pạrsi lekate ar Jihudikoakʼ harop ar pạrsi lekate olena.

¹⁰ Mordekai do unre Ahasberos raj ńutumte ciṭhikoe olketʼte rajakʼ mundạme chapada. Ar ona tayom do rajren khacaṛ sadomre decʼkate aswarikoakʼ tite ciṭhikoe kolkeda.

^11-12 Ahasberos raj do ona ciṭhire Adar cando reakʼ, metakʼme gelbar cando reakʼ gelpeyakʼ dinre uniyakʼ rajosṭi reakʼ mimitʼ nagraharen Jihudiko jemon mitʼ ṭhenko jarwakʼte akoakʼ jiwi rukhiyạitako reakʼ ạidạriye ematʼkoa. Jãhãn jạt se tabe disạmren hoṛko jodi Jihudiko ar onkoren maejiuko ar hoponko ar hoponerako cetanre akromonko calao enḍekhan Jihudiko hõ akoren bạirikoko marao utạrko ar onko bạirikoakʼ sompotti luṭ reakʼ ạidạriko ńamkeda.

¹³ Rajakʼ hukum do sanam tabe disạmre ạn lekate lại jạhirena ar mitʼke mitʼ jạtrenkoko baḍae ocoyena Jihudiko do enhilokʼ akoren bạiriko cetanreko hala daṛeakʼa.

¹⁴ Rajren khacaṛ sadomkore decʼkate sombat asenko do usạrate rajakʼ hukumanteko oḍokena. Ar Susan gaṛre hõ ona hukum do lại jạhirena.

¹⁵ Mordekai do mĩhĩ musnạ sutạm reakʼ beguni kicricʼ cetanre lil ar ponḍ roṅ reakʼ raj kicricʼ horokʼkate ar sona reakʼ mitʼṭecʼ mukuṭ bohokʼre horokʼkate raj samaṅ khone oḍok calaoena. Ar Susan nagraharen hoṛko do ãṭ aṛaṅteko hulạsena.

¹⁶ Jihudiko lạgitʼ okte do ạḍi rạskạ, hulạsokʼ ar manot reakʼ hoyena.

¹⁷ Joto tabe disạm ar nagrahakore okare rajakʼ hukum seṭeren onḍenko Jihudiko do hulạsateko porobena. Ar eṭakʼ eṭakʼ jạtren ḍher hoṛ doko Jihudiyena, ente onko do Jihudiko ạḍiko botoratʼkoa.