Ester 7 - সান্তালী বাইবেল

¹ Ona tayom raj ar Haman do dosar dhao Ester rạni sãote jom lạgitʼ kin senena.

² Unkin do tinre darkha rasakin ńuńukan tahẽkana unre raj do arhõe kuliyana, “Ester rạni, am do cetʼem khojkana? Am okam khoj onagem emocokʼa. Amakʼ nehõr joṅakʼ do cetʼ tam? Adha rajosṭim khoj khan ona hõm ńama.”

³ Ester rạniye roṛ ruạṛkeda, “Maharaj, am nońjorre dayań ńamakatʼ khan ar maharaj do ińreye kusi akan khan enḍekhan ińakʼ nehõr joṅakʼ do noage iń ar iń jạtren hoṛkoakʼ jiwi rukhiyạitaleme baṛe,

⁴ ente ale gocʼle ar marao utạrle lạgitʼte iń ar iń jạtren hoṛko dole ạkhriń akana. Ale do eken guti ar kạ̃ṛmĩ hoyokʼ lạgitʼle ạkhrińlen khan do hape akangeń tahẽkokʼa, ente onkan kosṭo reakʼ katha maharaj baḍae ocoye do lek baṅ tahẽkokʼa.”

⁵ Unre Ahasberos raj do rạniye kulikedea, “Okoe kanae uni hoṛ do? Ar uni do okare menaea? Nonkan kạmi reakʼ dil do okoeyakʼ hoyakantaea?”

⁶ Estere menkeda, “Uni dusṭạmi bạiri do nui Hamange.” Unre Haman do raj ar rạni samaṅre ạḍiye botorena.

⁷ Raj doe raṅgaoente darkha rasa dohokateye beretʼena ar oḍokente raj doṅgol reakʼ bagwanteye boloyena. Unre Haman doe bujhạu daṛeada raj do acakʼ bhạge ṭhik dohoakada onate jiwi rukhiyạitae lạgitʼ Ester rạni ṭhene tahẽyena.

⁸ Raj doṅgol reakʼ bagwan khon raj do bhoj oṛakʼteye ruạṛ hecʼena ar unre Ester oka duṛupʼakʼre ṭenḍarkateye duṛupʼ akan tahẽkan onare Haman doe ombakʼ akan tahẽkana. Unre raj do ãṭ aṛaṅteye menkeda, “Nui do cetʼ iń samaṅrege ińren rạniye jormoṭea?” Rajakʼ moca khon niạ katha oḍokokʼ são sãote hoṛko do Hamanakʼ mẽtʼãhãko betʼketʼtaea.

⁹ Unre Harbona ńutuman rajren mitʼṭen sapʼsosoricʼe menkeda, “Hamanakʼ oṛakʼre mõṛẽgel moka usul mitʼṭecʼ pạsikaṭ sapṛao doho menakʼa. Mordekai, okoe do rajakʼ jiwi rukhiyại lạgitʼ khobore ạguletʼ uni lạgitʼge Haman do onae sapṛao dohoakatʼ tahẽkana.” Raje menkeda, “Onarege uni pạsiyepe.”

¹⁰ Onate Haman okaṭakʼ pạsikaṭ Mordekai lạgitʼe sapṛao doholetʼ hoṛko do onarege Hamanko pạsikedea. Ar ona tayom do rajakʼ edre thirentaea.