Ester 6 - সান্তালী বাইবেল

Mordekaiye manot ocokʼkan

¹ Enhilokʼ ńindạ raj do bae jạpitʼ daṛeakʼ kan tahẽkana. Uni doe hukumkeda rajosṭi reakʼ Itihãs puthi jemon acʼ ṭhen ạgukʼ. Ar ona tayom do ona puthi khone paṛhao ańjom ocoyena.

² Onḍe ńelena Bigthan ar Teres ńutuman rajren barea horhokin do Ahasberos raj goje reakʼkin soṛojontroletʼre Mordekai do ona reakʼ khobor raje baḍae ocolede tahẽkana.

³ Raje kuliyana, “Noa iạte Mordekai do cetʼ jãhãn manot em akawadea?” Uniren kạmiyạkoko roṛ ruạṛadea, “Uni do cetʼge baṅ ceka akawadea.”

⁴ Raje kuliyana, “Dorbarre okoe menakʼkoa?” Unre Haman do acʼe benao akatʼ pạsikaṭre Mordekai pạsiye reakʼ raj ṭhen aroj lạgitʼ bahre dorbarre hecʼkateye teṅgo akan tahẽkana.

⁵ Rajren gutiko doko menkeda, “Dorbarre Hamane teṅgo akana.” Raje menkeda, “Haman bhitriteye hijukʼma.”

⁶ Haman bhitriteye boloyen khan raj do uniye kulikedea, “Raja jãhãe manoteye menjoṅ khan uni lạgitʼ do cetʼ cekae hoyokʼa?” Unre Haman do mone monteye menkeda, iń chaḍa raj do manot ar okoeye emaea?”

^7-8 Ona iạte uniye roṛ ruạṛkeda, “Raj do okoe manoteye menetʼkan uni lạgitʼ maharajakʼ mitʼṭecʼ raj kicricʼ ạgukʼma ar okoeṭakʼ sadomakʼ bohokʼre raj mukuṭ horokʼ menakʼ uni sadom hõe ạgu ocokʼma.

⁹ Ona tayom ona kicricʼ ar sadom do rajren cetan hudạren kạmiyạko modre mitʼ hoṛakʼ tire emokʼma. Ar raj okoeṭakʼ manoteye menetʼkan uni do ona kicricʼe horokʼaema ar sadomre uniye dejete nagraha reakʼ moedanre uni laha lahate lại jạhirokʼma, ‘raj okoe manoteye men unire hõ nonkage hoyokʼa.”

¹⁰ Unre raj do Hamane hukumadea, “Am do ńitge senkate raj kicricʼ ar sadom ạguiyem ar cetʼ lekam menketʼ onkage raj doṅgol reakʼ phaṭok duạrreye duṛupʼ akan uni Jihudi Mordekae onkawaeme. Ar am cetʼkom menketʼ onako reakʼ cetʼge alom ḍhilisiliya.”

¹¹ Onate Haman do raj kicricʼ ar sadome ạgukedea ar ona kicricʼ Mordekaiye horokʼadete sadomreye decʼkedea ar nagraha reakʼ moedanre uni laha lahate noae lại jạhirkeda, “Raj okoe manoteye men unire hõ nonkage hoyokʼa.”

¹² Inạ tayom Mordekai do arhõ raj dolan reakʼ phaṭo duạr ṭhene senena. Menkhan Haman do dukte bohokʼe tol esetʼente usạrate oṛakʼteye calaoena.

¹³ Ar uni cetanre oka hoyen ona do acʼren bạhu Seres ar uniren sanam gatekoe lạiyatʼkoa. Hamanren bạhu Seres ar uniren sopolhako do uniko metadea, “Okoe samaṅre amakʼ niạ ńurokʼ ehopʼakan uni Mordekai do Jihudi bõsren hoṛkan khane enḍekhan uni upạrte am do ohom teṅgo daṛelena, ar khạṭigem marao utạrokʼa.”

Hamane pạsi ocokʼkan

¹⁴ Onko do unhõ Haman sãote kathako roroṛkan tahẽkanrege rajren gutiko do hecʼkate usạrate Esterakʼ bhojre seledokʼ lạgitʼ Hamanko idikedea.