Ester 5 - সান্তালী বাইবেল

Raj ṭhen Esterakʼ nehõr

¹ Tesar hilokʼ Ester do rạniyakʼ sajbaj horokʼkate raj doṅgol bhitri raj dorbarte senkateye teṅgoyena. Unre raj do siṅghạsonre duṛupʼkate duạr secʼe samaṅ akatʼ tahẽkana.

² Uni do Ester rạni raj dorbarre teṅgo akane ńelkede khan kusite acʼakʼ ti reakʼ sona ṭheṅgae ạwiladea. Unre Ester doe sen sorente ona ṭheṅga reakʼ agaltetʼe joṭetʼkeda.

³ Raje kuliyana, “Ester rạni, cetʼ hoyakana? Ar am do cetʼem khojkana? Adha rajosṭim koeyeńre hõ onań emama.”

⁴ Estere roṛ ruạṛkeda, “Maharaj bhagem moneyetʼ khan enḍekhan am lạgitʼ oka bhojiń sapṛao akatʼ onare Maharaj ar Haman jemon seletʼkin tahen.”

⁵ Unre raj doe hukumkeda, “Esterakʼ katha leka jemon kạmi hoyokʼ onate ńitge nonḍe Haman ạguiyepe.” Ar Ester okaṭakʼ bhoje sapṛao akatʼ onare Raj ar Hamankin seletʼena.

⁶ Darkha rasa ńuńu tulucʼ raj do Estere kulikedea, “Am do cetʼem khojkana? Am okam khoj onagem emocokʼa. Amakʼ nehõr joṅakʼ lạiyạńme? Rajakʼ adha kanrehõ enhõ onam emocokʼa.”

⁷ Ester rạni doe roṛ ruạṛkeda, “Ińakʼ nehõr ar monejoṅakʼ do niạge-

⁸ Maharajakʼ nońjorre dayań ńamakatʼ khan ar ińakʼ nehõr joṅakʼ dohoytińem menetʼ khan tobe gapa okaṭakʼ bhojiń sapṛao lạgidokʼkan onare hõ Maharaj ar Haman do jemon seletʼkin tahen. Ar unre iń do maharajakʼ kukli reakʼ roṛ ruạṛiń emokʼa.”

Mordekai cetanre Hamanakʼ edre

⁹ Enhilokʼ Haman do kusite bahreteye oḍok calaoena. Menkhan uni do tinre raj dolan reakʼ phaṭok duạrre Mordekaiye ńamkedea, ar Mordekai do uni ńelkate hõ bae teṅgolena ar manot hõ bae udukʼadea unre uni do Mordekai upạrte ạḍiye edreyena.

¹⁰ Menkhan enhõ Haman do apnartetʼe sambṛaoente oṛakʼteye calaoena. Oṛakʼte senkate acʼren bạhu Seres ar gatekoe hoho jarwaketʼkoa.

¹¹ Ona tayom uni do onko ṭhen acʼakʼ dhon durib reakʼ katha, acʼren hoponkoakʼ katha, ar oka pontha iạte raj ṭhen khon manote ńamketʼ ar cekate eṭakʼ cetan hudạren hoṛko ar kạmiyạko khone maraṅ ocoyena ona joto katha do gorbokate lại akoe ehopʼena.

¹² Hamane menkeda, “Eken ona do baṅ Ester rạni oka bhoje sapṛaoletʼ tahẽkan onare iń chaḍa raj sãote ar okoe hõ bako neota ocolena. Uni do gapa arhõ raj sãote ińe neota akadińạ.

¹³ Menkhan jãhãtinrege raj doṅgol reakʼ duạrre uni Jihudi Mordekai duṛupʼ akaniń ńele unrege iń do monre suluk bạń ạikạua.”

¹⁴ Unre acʼren bạhu Seres ar acʼren sanam gatekoko metadea, “Am do mõṛẽgel moka usul mitʼṭecʼ pạsi kaṭ benaome ar setakʼre rajakʼ hukum hataokate onare Mordekai pạsiye reakʼ bebostaeme. Ona tayom kusi monte raj sãote bhojre seledokʼme.” Niạ katha Haman do ạḍi bhageye metatʼa ar uni do ona pạsikaṭe benao ocokeda.