Ester 4 - সান্তালী বাইবেল

Mordekai do Esterakʼ goṛoye khojokʼkan

¹ Mordekae do jotowakʼ sombatkoe baḍaeketʼ khan acʼakʼ kicricʼe oṛecʼketʼte gõṛẽ kicricʼe horokʼkeda ar torocʼ ojokʼkate nagraha talare senkate ãṭ aṛaṅte rarakʼe ehopʼena.

² Nonkate uni do raj doṅgol reakʼ phaṭok duạr hạbicʼe senena menkhan bhitrite do bae bolo daṛeada, ente gõṛẽ kicricʼ horokʼkate bhitrite bolokʼ reakʼ hukum do baṅ tahẽkana.

³ Mitʼke mitʼ tabe disạmkore okare rajakʼ parwana ar hukum seṭeren onḍenko Jihudiko talare hõ maraṅ rakʼjoṅ, hae haeyokʼ ar upạsokʼko ehopʼena. Ar ḍher hoṛge gõṛẽ kicricʼ horokʼkate torocʼreko giticʼena.

⁴ Esterren kạ̃ṛmĩko ar mạ̃yạ̃ṛiko do hecʼkate tinre Mordekayakʼ kathako lạiyadea unre uni do monre ạḍi duke ńamkeda. Gõṛẽ kicricʼ bodolte Mordekai ṭhen uni do kicricʼe kolkeda menkhan Mordekai do ona bae hataoleda.

⁵ Unre Ester do rajen sapʼdapʼicʼ Hathake hohoadea ar Mordekaiyakʼ cetʼ hoyakana ar cedakʼ hoyena ona baḍae lạgitʼe kolkedea.

⁶ Unre Hathak do raj doṅgol reakʼ phaṭok duạr samaṅre nagraha reakʼ maedanre Mordekai ṭhene senena.

⁷ Ar Mordekai do acʼre oka hoyakan ar Jihudiko maraoko lạgitʼ Haman tinạkʼ ṭaka raj khajańcire emokʼ lạgitʼe gokʼ akatʼ ona jotowakʼ do Hathake lạiyadea.

⁸ Susanre emakʼ Jihudiko maraoko reaṅ okaṭakʼ raj parwana oḍok akan ona reakʼ mitʼṭecʼ nokol do Hathake emadea, jemon uni do Estere udukʼ daṛeae ar onate uniye bujhạu daṛeakʼ. Ar Ester do raj samaṅre senkate acʼren hoṛko lạgitʼe nehõrokʼ.

⁹ Hathak do ruạṛ senkate Mordekai okae metade tahẽkan ona joto do Estere baḍae ocokedea.

¹⁰ Unre Ester do Mordekai niạ katha lạiyae lạgitʼ Hathake hukumadea,

¹¹ “Rajren sanam kạmiyạko ar raj tabe disạmren sanam hoṛko baḍaea je, jãhãe herel se maejiuge rajakʼ hukum begorte bhitrite raj ṭhene senokʼ enḍekhan uni lạgitʼ do mitʼṭecʼ ạnge menakʼa- ona do uniyakʼ gujukʼ. Tobe okoe hoṛ secʼ raj do acʼakʼ sona ṭheṅgae ạwiltae eken unige jiwetʼe tahena. Menkhan pegel din hoyokʼkana raj ṭhen calakʼ lạgitʼ iń do bạń hoho ocoakana.”

¹² Esterakʼ sanam katha do Mordekaiko baḍae ocokedea.

¹³ Mordekae do Ester niạ kathae roṛ gotʼadea, “Niạ katha do alom hudisa je, raj doṅgolre menakʼmete Jihudiko modre eken am eskarge rukhiyạm ńama.”

¹⁴ Menkhan niạ oktere hape akangem tahen enḍekhan eṭakʼ secʼte Jihudiko do rukhiyạko ńama arko bańcaokʼa, menkhan am dom gujukʼa ar am apumren bõs hõko marao utạrokʼa. Okoe baḍaea pasecʼ niạ okte lạgitʼge am do rạni hudạm ńam akatʼ!”

¹⁵ Unre Ester do Mordekai niạ kathae roṛ ruạṛadea,

¹⁶ “Am do senkate Susanre menakʼko sanam Jihudikom jarwakoa ar iń ńutumte joto hoṛ upạspe dohoya. Ape do pe siń pe ńindạ cetʼge alope jom ńũiya. Ar ape cetʼ lekape upạs onkage iń ar ińren kạ̃ṛmĩko hõle upạsa. Ona tayom ạn upạrte jãhãnakʼge hoyokʼ enhõ iń do raj ṭheniń calakʼa. Ar ona khạtirte gujukʼ hoyokʼtiń khan hõ iń doń khaṛagea.”

¹⁷ Onate Mordekai do senkate Esterakʼ sanam hukum lekae kạmikeda.