Ester 3 - সান্তালী বাইবেল

Jihudiko maraoko lạgitʼ Hamanakʼ soṛojontro

¹ Niạko ghoṭna tayom Ahasberos raj do Agag Hamedatharen hopon Haman do rajosṭiren eṭakʼ eṭakʼ kạmiyạko khon cetan hudạre dohokedeteye manotkedea.

² Unre raj dolan reakʼ phaṭok duạrre tahen kạmiyạko do ikhṛumate Hamanko ḍobokʼaekan tahẽkana, ente raj do uni reaṅ onkageye hukumakatʼ tahẽkana. Menkhan Mordekae do ikhṛum hõ bae ikṛumokʼkan tahẽkana ar ḍobokʼ hõ bae ḍobokʼae kan tahẽkana.

³ Ona iạte raj phaṭok duạrren kạmiyạko do Mordekaiko metadea, “Rajakʼ hukum do cedakʼ bam manaoeda?”

⁴ Nonkage din hilokʼko metaekan tahẽkanre hõ uni do onkoakʼ katha bae ańjomletʼtakoa. Onate onko do ona katha Hamanko baḍae ocokedea. Onko do Mordekayakʼ niạ beohar ṭarhaokʼtaea se baṅa ona ńelko mepenena, ente Jihudikanae mente onkoe lạiyatʼko tahẽkana.

⁵ Mordekai do ikhṛum hõ baṅ ar manot hõ baṅ emokʼkan reakʼe baḍaeketʼ khan Haman do ạḍiye raṅgaoena.

⁶ Ar Mordekayakʼ jạt reaṅe baḍaeketʼ khan uni goje do huḍiń bisoegeye metatʼa. Ona bodolte uni do mitʼṭecʼ pontha sendraye ehopʼena jemon Ahasberosakʼ goṭa rajosṭi khon Mordekairen hoṛko, metakʼme Jihudikoe marao cabako.

⁷ Ahasberos rajakʼ rajokʼ gelbar bochor reakʼ pạhil candore, metakʼme Nisan candore mitʼṭecʼ din ar cando bachao lạgitʼ hoṛko do Haman samaṅre puretʼ, metakʼme gulibãṭko ehopʼena. Onate gelbar cando reakʼ, metakʼme Adar candore guli do rakapʼena.

⁸ Haman do unre Ahasberos raje metadea, “Amakʼ rajosṭi reakʼ tabe disạmkore judạ judạ jạtrenko modre mitʼṭecʼ jạtrenko doko pasnao akana. Eṭakʼ sanam jạtrenko khon onkoakʼ ạn-ạriko do begargetakoa ar rajakʼ ạn hõ onko do bako manaoeda. Onate onko jiwetʼ dohoko do baṅ bhagea.

⁹ Ado raj bhageye hudis khan onko do marao utạrko lạgitʼ mitʼṭecʼ hukume emokʼma. Onate rajakʼ khajańci oṛakʼre dohoy lạgitʼ rajakʼ kạmi ạkʼyurkoakʼ tire iń do pesae aregel ṭon rupạń emokʼa.”

¹⁰ Unre raj do chap emakʼ lạgitʼ acʼakʼ kạṭupʼ khon mundạm totʼkate Jihudikoren bạiri Agag Hamadathren hopon Hamane emadea.

¹¹ Raj do Hamane metadea, “Ṭaka hõ ar hoṛko hõ amren kangekoa; onate ṭaka ar hoṛko idikate oka bhagem hudisetʼ ona onkaeme.”

¹² Ona tayom pạhil cando reakʼ gelpeyakʼ dinre raj do olokʼkoe hohowatʼkoa. Onko do mitʼke mitʼ tabe disạm reakʼ horop ar mitʼke mitʼ jạtrenkoakʼ pạrsi leka Hamanakʼ hukum do disạm cakʼlaoko ar judạ judạ mukhiyạko ṭhen ol kateko baḍae ocoyena. Ciṭhiko do Ahasberosakʼ ńutumtege ol hoyena ar raj do acʼakʼ mundạmte onako cetanreye chapada.

¹³ Rajakʼ goṭa tabe disạmkore sombat asenko hotete ciṭhi do kol hoyena. Ona ciṭhire do nonka hukum emena Adar cando reakʼ gelpeyakʼ dinre Jihudiren sanam juạnko, haṛamko, maejiuko, gidrạko, metakʼme sanam Jihudiko do gocʼko hoyokʼa ar mohor meṭao utạrko hoyokʼa. Ona chaḍa onkoakʼ jinisko hõ luṭtako hoyokʼa.

¹⁴ Ạn lekate ona hukum reakʼ nokol do tabe disạmkore kolkate sanam jạtren hoṛko baḍae ocoyena jemon onko do unhilokʼ lạgitʼ sapṛao akanko tahen.

¹⁵ Rajakʼ hukum ńamkate sombat asenko do usạrateko oḍokena ar Susan gaṛrehõ ona hukum lại jạhirena. Ona tayom raj ar Haman do darkha rasa ńũńũkin duṛupʼena ar Susan nagraharen Jihudiko doko hae nisạsena.