Ester 2 - সান্তালী বাইবেল

Ester do rạniye hoyen

¹ Noako tayom Ahasberosakʼ raṅgao thirentae khan uni do Bạsti rạniyakʼ katha, metakʼme Bạsti okae cekaletʼ ar uni reaṅ okae hukumletʼ onae disạkeda.

² Unre rajren kạmiyạkoko menkeda, “Maharaj lạgitʼ mońj kũạ̃ri kuṛiko ńamokʼma.

³ Ar maharaj do acʼakʼ rajosṭi reakʼ sanam disạmkore kạmiyạkoe bahalko jemon onko do mońj kũạ̃ri kuṛiko sendra ńamkote Susan gaṛ reakʼ raj doṅgol Haremteko kol daṛeako. Ar Hegai ńutuman okoeṭakʼ mạ̃yạ̃ṛi cetanre maejiuko ńeltodarotko reakʼ bhare ńamakatʼ uni do onkoe ńel todarotkoma. Ar onkoakʼ cehrakʼ lạgitʼ cetʼ cetʼko jạruṛokʼ onako jemone emakoma.

⁴ Ona tayom maharaj okoeṭakʼe kusiyae unige Bạsti rạni bodolte rạniye hoyokʼma.” Niạ sopolha raj do bogegeye metatʼa. Ar ona lekage uni doe kạmikeda.

⁵ Onako dinre Mordekae ńutuman Benjạmin gusṭiren mitʼṭen Jihudi hoṛ do Susan gaṛreye tahẽkana. Uni do Jayirren hopone tahẽkana, ar Jayir do Simạiren hopone tahẽkana ar Simại do Kisren hopone tahẽkana.

⁶ Jihudạren raj Jekoniạ, metakʼme Jehoyakin sãote okoeko hoṛ do Babelren Nebukadnesar raj Jerusalem khone bondi idiletʼko onko modre Mordekairen hapṛam hõe tahẽkana.

⁷ Mordekai kakattetʼren do Hadasa ńutuman mitʼṭen hoponerae tahẽkana. Kuṛiren eṅgat apat bạkin tahẽkante Mordekae do acʼgeye ạsul harakedea. Ar uni kuṛige, okoe do Esterko metaekan, uni do rupte mońj ar ńelokʼte hõ ạḍi cehrageye tahẽkana. Kuṛiren eṅgat apatkin gocʼen khan Mordekae do acʼren hopon era lekae joton harakedea.

⁸ Rajakʼ hukum ar uniyakʼ parwana oḍoken khan aema kuṛiko do Susan gaṛteko ạguketʼkoa ar Hegaiyakʼ jimạreko dohoketʼkoa. Ester hõ raj doṅgolte idikate Hegai ṭhene doho ocoyena.

⁹ Ester do Hegaiyakʼ nońjorre bhagegeye tahẽkana ar Ester hõ uni ṭhen khon mońj beohare ńamkeda. Hegai do pạhil khonge uniyakʼ rup baṛhaokʼtae lạgitʼ ojokʼakʼkoe emadea ar uniyakʼ niṭakatʼ jomakʼko hõe emadea. Uni do raj oṛakʼ khon eae goṭen kạ̃ṛmĩ kuṛikoe soṅgeadea ar Harem reakʼ mońj utạr jaegare uni ar uniren soṅge kuṛikoe dohoketʼkoa.

¹⁰ Ester do acʼakʼ jạt ar bõsbudạ reakʼ oprom do bae lạileda, ente Mordekai do ona reakʼe baron akade tahẽkana.

¹¹ Ester cetʼleka menaea ar cetʼko hoyokʼkana ona baḍae lạgitʼ Mordekai do din hilokʼ Haremakʼ raca samaṅreye dãṛã baṛaekan tahẽkana.

¹² Ahasberos raj ṭhen kuṛikoakʼ calakʼ pạli ạuri seṭerokʼ hạbicʼ onko do mitʼ bochor rup baṛhao ocoytako reakʼ bebosta tahẽkana. Onko do turui cando gondhoros ar turui cando do jut so mosola ar sajaokʼ reakʼ jinisko beoharetʼ tahẽkana.

¹³ Ar raj ṭhen jãhãe kuṛiyakʼ senokʼ okte hoylen khan Harem khon raj samaṅre idiye lạgitʼ uni okae khoj onageye emocokʼkan tahẽkana.

¹⁴ Ar uni do ạyupʼ jokhecʼ onḍeye senokʼa ar setakʼ do rajren chuṭki erakoren horhoyicʼ mạ̃yạ̃ṛi Sagas jimạre Haremteye ruạṛ hijukʼa. Ar Raj do kusikate ńutum ńumkate ạuriye hohowae hạbicʼ uni do raj ṭhen ar bae sen daṛeakʼa.

¹⁵ Mordekai do acʼren kakattetʼ Abhạyilren okoeṭakʼ hoponera do acʼren hoponera lekateye ạsul haralede uni kuṛi, metakʼme Esterakʼ tinre raj ṭhen calakʼ reakʼ okte seṭerentaea unre Haremren ńel todaroticʼ uni mạ̃yạ̃ṛi Hegai oka idiye metade ona chaḍa ar cetʼge uni do bae khojleda. Ar jãhãege Estere beṅgetʼaekan tahẽkan unige Esterre mẽtʼ do ḍhaṅokʼkantae tahẽkana.

¹⁶ Ahasberos rajakʼ rajokʼ eae bochor reakʼ gelakʼ candore, metakʼme Tobet candore Ester do raj doṅgolte raj ṭhenko idikedea.

¹⁷ Eṭakʼ maejiuko khon raj do Esterge bạ̃ṛtiye dulạṛkedea ar eṭakʼ kũạri kuṛiko khon uni do raj ṭhen bạ̃ṛti daya ar dulạṛe ńamkeda. Onate raj do bohokʼre rạni ṭupriye horokʼadea ar Bạstiwakʼ jaegare Estere rạnikedea.

¹⁸ Ona tayom raj do acʼren cetan hudạren hoṛko ar uniren kạmiyạko lạgitʼ Ester ńutumte mitʼṭecʼ maraṅ okocʼe bhojkeda. Uni do tabe disạmkore khajnae aṛakʼatʼkoa ar rajakʼ murji leka sandeskoe danatʼkoa.

Mordekai soṛojontro reakʼ kathae baḍae ńamketʼ

¹⁹ Dosar dhao kũạ̃ri kuṛiko jogaṛko jokhecʼ Mordekai do raj dolan reakʼ phaṭok duạr ṭhen duṛubokʼ lạgitʼe bahal ocoakan tahẽkana.

²⁰ Ester do Mordekayakʼ katha lekage acʼakʼ bõsbudạ reakʼ oprom ar jạt reakʼ katha doe danaṅ akatʼ tahẽkana. Ester do Mordekai ṭhene ạsul hara ocokʼre okalekae calakʼkan tahẽkan unhõ onkage uni doe calakʼkan tahẽkana.

²¹ Mordekae do raj dolan reakʼ phaṭok duạrre sapʼ sosor kạmireye tahẽkan jokhecʼ raj dolanren horhoko modre Bigthan ar Teres ńutuman rajren barea guti do Ahasberos goje reakʼ kin soṛojontrokeda.

²² Mordekai do soṛojontro reakʼ kathae baḍaeketʼ khan Ester rạniye baḍae ocokedea. Ar rạni do Mordekai ńutumte raj onae baḍae ocokedea.

²³ Ona babotre tinre suṭhik hataokate baḍaeyena katha do sạrikana mente unre unkin guti doko pạsiketʼkinạ. Ar niạ katha do raj samaṅrege Itihãs puthire ol caṛhaoena.