Esra 9 - সান্তালী বাইবেল

Esrawakʼ koejoṅ

¹ Niạko kạmi sạten khan mukhiyạko do iń ṭhen hecʼkateko menkeda, “Israelko ar onkoren naekeko ar Liwiko do onkoakʼ disạmre girobasokʼ kan judạ judạ jạtrenko khon apnartetʼ do bako begar dohoakan tahẽkana. Onko do Kananiko, Hittiko, Perisiko, Jebusiko, Amoniko, Moabiko, Misriko ar Amoriko leka hirkhạwakʼko kạmikana.

² Onko do apnartetʼ ar onkoren hoponko lạgitʼ bạhu lekate onko jạtren kuṛiko hataoketʼkoa, ar nonkate onko do sonot jạtrenko tulucʼko mesalena. Noa bepạtiạr reakʼ hor do mukhiyạko ar cetan hudạren kạmiyạkoge pạhilre horko udukʼatʼkoa.”

³ Niạ katha ańjomkate mon reakʼ kosṭote iń do horokʼakʼ kicricʼ iń oṛecʼkeda ar ińakʼ bohokʼ reakʼ upʼ ar gocoyiń racakʼ totʼketʼte hadosań duṛupʼ hapeyena.

⁴ Bondi dosa khon ruạṛ hecʼakan noko hoṛkoakʼ bepạtiạr babotre okoe do Israelren Isorakʼ katha disạkateko thar tharaoen onko mimitʼko do iń ṭhen hecʼkateko jarwayena. Ar ạyupʼ reakʼ samaṅokʼ okte hạbicʼ iń do onḍegeń duṛupʼ hape akan tahẽkana.

⁵ Ona tayom ạyupʼ reakʼ samaṅokʼ jokhecʼ iń do mon reakʼ duk khoniń beretʼena, ar oṛecʼ kicricʼ ar aṅgrop horokʼ akatʼrege ikhṛumente ińren Probhu Isor samaṅre banar ti tiạrkateń koekeda,

⁶ “E ińren Isor, am secʼ beṅgetʼ hõ lajaogeń ạikạueda, ente aleakʼ kại do aleakʼ bohokʼ cetan hara rakapʼ akantalea ar aleakʼ ghạṭ do sermae tiyạkʼ akada.

⁷ Aleren hapṛamkoakʼ okte khon ehopʼkate teheń hạbicʼ ạḍitetʼle ghạṭ akada. Aleakʼ kại gunạkʼtege ale ar aleren rapajko, ar naekeko do eṭakʼ rajakʼ tireko bondi ocoakana arko gocʼ ocoakana, onko doko luṭ ocoakana arko bemanot ocoakana ar teheń hõ inạ dosarege menakʼa.

⁸ “Menkhan ńit thoṛa okte lạgitʼ aleren Probhu Isor doe daya akatʼlete aleren thoṛa hoṛ do jiwetʼe dohoakatʼlea ar uniyakʼ sonot disạmre mitʼṭecʼ jaegae em akatʼlea. Nonkate aleren Isor do rạskại dan akatʼlea ar aleakʼ golam dosarele tahẽkanre jiwiye raṛecʼketʼtalea.

⁹ Ale do golamko kanrehõle golam tahen oktere aleren Isor do bae bạgi giḍi akatʼlea. Paras raj samaṅre uni do pạtiạre beohar akada. Uni do aleye udgạuketʼlea jemon aleren Isorakʼ oṛakʼle benao aroe ar rạputʼ akan jaegako hõle jut ruạṛ. Uni do Jihudạ ar Jerusalemre nirạite tahen reakʼe bebosta akatʼlea.

^10-11 “Menkhan ńitokʼ do, E aleren Isor, niạ tayom ale do cetʼ jãhãnakʼle mendaṛekea? Am do amren nạbiko hotete okako hukumem em akatʼle ona dole bạgi akawada. Am dom menleda, ‘okaṭakʼ disạm ạidạri lạgitʼpe calakʼkan ona do onḍenko hoṛkoakʼ besapha iạte bhõnḍ akana. Onkoakʼ hirkhạwanakʼ kạmi iạte onko do disạm reakʼ mitʼ simạ khon eṭakʼ simạ hạbicʼ besaphawakʼteko perecʼ akada.

¹² Ona iạte aperen kuṛiko do onkoren hoponko sãote alope baplakoa se aperen koṛako lạgitʼ hõ onkoren kuṛiko alope hataokoa ar tishõ onkoakʼ bhạlại se rakapʼko reakʼ do alope kurumuṭuiya. Onate ape do daṛeankope hoyokʼa ar jumi reakʼ bhage bhage jiniskope jom daṛeakʼa ar jaejug ạidạri lekate disạm do aperen hopon ar hoponerako lạgitʼpe doho oṭo daṛeakʼa.’

¹³ “Aleakʼ bạṛicʼ kạmi ar maraṅ ghạṭ iạtege ale cetanre niạko do hoyokʼkana, menkhan enhõ E aleren Isor, aleakʼ kại reakʼ kuṛại lekate am do thoṛagem sạjại akatʼlea ar aleren adomko hoṛ do jiwetʼem tahẽ ocoakatʼkoa.

¹⁴ Ale do cetʼ amakʼ hukumko batao baṅkate bạṛicʼko kạmikan hoṛko tulucʼle bapla midokʼte onko sãotele peṛakʼa? Arle onkae khan am do ale cetanrem edrekʼte alem marao giḍikalea ar celege jiwetʼ do bam doholeya.

¹⁵ E Israelren Probhu Isor, am dom dhoromgea. Ale do teheń hạbicʼ thoṛa hoṛ jiwetʼ menakʼlea. Menkhan am samaṅre do sanamkogele kạiyan hoṛ kana, ar onate ale do okoehõ am samaṅre teṅgokʼ lek dole baṅkana.”