Esra 8 - সান্তালী বাইবেল

Esra sãoteko ruạṛ hecʼen bõs-mukhiyạkoakʼ tạlika

¹ Artaksasto raje rajokʼkan tahẽkanre tinạkʼ bõs-mukhiyạko do iń sãote Babel khonko ruạṛ hecʼlen onkoakʼ tạlika do nonka leka:

² Pinehas bõsko modre Gersom; Ithamar bõsren modre Daniel; Dạud bõsren modre Sekaniạ bõsren Hatus;

³ Parosakʼ bõsko modre Sakariạ ar uni soṅgeten tạlikare ńutum ol akan tako mitʼsae mõṛẽgel hoṛ;

⁴ Pahat-Moabakʼ bõsko modre Serahiạren hopon Eliye-honae ar uni soṅgeten barsae hoṛ;

⁵ Satuakʼ bõsko modre Jehasiyelren hopon Sekaniạ ar uni soṅgeten pesae hoṛ;

⁶ Adinakʼ bõsko modre Jonathanren hopon Ebed ar uni soṅgeten mõṛẽgel hoṛ;

⁷ Elamakʼ bõsko modre Athaliạren hopon Jesaeya ar uni soṅgeten eae gel hoṛ;

⁸ Sephatiạwakʼ bõsko modre Mikaelren hopon Sebadia ar uni soṅgeten irạl gel hoṛ;

⁹ Joabakʼ bõsko modre Jehiyelren hopon Obadiạ ar uni soṅgeten barsae irạlgel hoṛ;

¹⁰ Baniakʼ bõsko modre Josiphiaren hopon Selomit ar uni soṅgeten mitʼsae turuigel hoṛ;

¹¹ Bebaiyakʼ bõsko modre Bebairen hopon Sakariạ ar uni soṅgeten bargel irạl hoṛ;

¹² Asgadakʼ bõsko modre Hakatanren hopon Johanan ar uni soṅgeten mitʼsae gel hoṛ;

¹³ Adonikamakʼ bõsko modre okoe doko ruạṛ hecʼen onkoakʼ ńutum do hoyokʼkana Eliphelet, Jeuel ar Semaya ar onko soṅgeten turui gel hoṛ;

¹⁴ Bigwayakʼ bõsko modre Uthai ar Sabud ar unkin soṅgeten eae gel hoṛko.

Jerusalemte ruạṛ hijukʼ

¹⁵ Ahawa secʼ ạtu oḍokʼ calao akan nala ṭhen iń do nokoko hoṛkoń jarwa mitʼketʼkoa ar ona jaegare ale do tạmbule beretʼketʼte onḍe pe dinle tahẽyena. Ar hoṛko ar naekeko talare tolaskate jãhãn Liwiko do bạń ńamletʼkoa.

¹⁶ Unre iń do Elieser, Ariel, Semaya, Elnathan, Jarib, Elnathan, Nathan, Sekaria, ar Mesulam ńutuman mukhiyạko ar Joyarib ar Elnathan ńutuman bar hoṛ cecetʼkin iń hoho ạgu ocoketʼkoa.

¹⁷ Noko hoṛko do Kasiphiạre girobasokʼ kan mukhiyạ Ido ar uni bõsren mundilre sapʼsosorko ṭhen niạ katha lại lạgitʼ iń kolketʼkoa, “Ape do aboren Isorakʼ oṛakʼre sapʼsosor kạmi lạgitʼ ale ṭhen hoṛko ạgukope.”

¹⁸ Aleren Isorakʼ bhạlạiyanakʼ ti do alere tahẽkante onko do Israelren hopon Liwi gusṭiren Mahale bõs tala khon Serebiạ ńutuman mitʼ ṭhen gạkhuṛ hoṛ ar uniren hoponko ar boehakote jotote gel irạl hoṛ ale ṭhenko ạguketʼkoa.

^19-20 Ona chaḍa onko do Hasabiạ ar Merari bõsren mod khon Jesaeya ar uniren boehako ar onkoren hoponkote jotote bargel hoṛ ar mundil oṛakʼre sapʼdapʼ kạmiko modre barsae bargel hoṛko ạguketʼkoa. Dạud ar uniren kạmiyạko do sapʼ dapʼkoren hapṛamkoko ṭhik doholetʼkoa jemon onko do Liwikoko goṛo daṛeako. Noko barsae bargel hoṛkoakʼ ńutum do tạlikare ol caṛhaoena.

Esra do hoṛkoe upạs ocoyetʼko

²¹ Iń do Ahawa soḍokʼ ṭhen upạs dohoy lạgitʼ iń lại jạhirkeda jemon ale do aleren Isor samaṅre apnartetʼle nindhạn daṛeakʼ ar aleren gidrạko ar aleakʼ sanam sompottikoante nirạitele sen ruạṛ daṛeakʼ.

²² Horre aleren bạirikoakʼ ti khon ale rukhiyạle lạgitʼ raj ṭhen lạṛhại phạdko ar aswariko koeye doń lajaoena, ente ale do rajle metade tahẽkana, “Okoe do Isorakʼ sana lekako calakʼ onko mimitʼko cetanre uniyakʼ bhạlạiyanakʼ ti menakʼa, menkhan okoe uniko bạgiyae onko sanamko cetanre uniyakʼ edre do paṛaokʼa.”

²³ Onate ale dole upạskeda ar niạ reaṅ aleren Isor ṭhenle nehõrena, ar uni do aleakʼ koejoṅe ańjomketʼtalea.

Mundil lạgitʼ danko

²⁴ Ona tayom iń do gelbar maraṅ naekeko ar onko sãote Serebiạ, Hosbiạ ar onkoren gel Liwi boehakoń begarketʼkoa.

²⁵ Iń do onko ṭhen onako sona, rupạ ar bhajanko soṅkateń oḍokkeda one okaṭakʼ do raj ar uniren sosolhako, kạmiyạko ar onḍe jarwa akan sanam Israelko Isorakʼ oṛakʼ lạgitʼko danletʼ tahẽkan.

²⁶ Iń do onko ṭhen gel are hajar mõṛẽsae keji rupạ, pe hajar keji rupạ reakʼ bhajanko ar pe hajar keji sonań jimạkeda.

²⁷ Ona chaḍa turui keji tala ojon reakʼ bargel goṭecʼ sona reakʼ bhajanko ar jhak jhak nirạ pitạl reakʼ barea bạṭi hõń ematʼkoa.

²⁸ Iń do onkoń metatʼkoa, “Niạko bạṭiko do Probhu Isor ńutumte begar dohoakana. Ona chaḍa niạko sona ar rupạ do aperen hapṛamkoren Probhu Isor ńutumte apnarakʼ sana leka dan akana.

²⁹ Ar tin hạbicʼ Jerusalemre Probhu Isorakʼ oṛakʼ reakʼ khajańci oṛakʼren maraṅ naekeko, Liwiko ar Israelkoren bõs mathako samaṅre onako ạuripe soṅako unhạbicʼ sontorte onape rukhiyạ jotona.”

³⁰ Inạ tayom naekeko ar Liwiko do Jerusalemte aboren Isorakʼ oṛakʼte idi lạgitʼ soṅakʼ sona, rupạ ar bạṭiko ataṅkeda.

Jerusalemte ruạṛokʼ

³¹ Pạhil cando reakʼ gelbarakʼ dinre ale do Jerusalem calakʼ lạgitʼ Ahawa soḍokʼ ṭhen khonle mohnḍayena. Ar aleren Isorakʼ ti do ale cetanre tahẽkana ar uni do horre bạiri ar ḍạkukoakʼ ti khone rukhiyạketʼlea.

³² Nonkate ale do Jerusalemtele seṭerente onḍe pe dinle jirạuena.

³³ Ona tayom ponakʼ dinre ale do aleren Isorakʼ oṛakʼre ona sona, rupạ ar bhajankole soṅketʼte naeke Uriạren hopon Meremotakʼ tirele jimạkeda. Meremot soṅgete do Pinhasren hopon Eliasere tahẽkana ar unkin sãote do Jesuaren hopon Josabad ar Benuiren hopon Noadiạ. Nukin bana hoṛge Liwikin tahẽkana.

³⁴ Sanamakʼ jinisge lekha ar soṅkate em hoyena ar ona jokhecʼ reakʼ soṅkha ar ojon do ol dohoyena.

³⁵ Bondi dosa khon ruạṛ hecʼen hoṛko do Israelren Isor ńutumte jeredokʼ samaṅokʼakʼko samaṅkeda. Onko do goṭa Israel jạtrenko lạgitʼ gelbar goṭen ḍaṅgra, aregel turui goṭen bheḍa, eaegel eae goṭen bheḍa hopon ar kại ńutumte samaṅokʼakʼ lạgitʼ gelbar goṭen meromko emena. Noko jotoge Probhu Isor ńutumte jeredokʼ samaṅokʼakʼ mente em hoyena.

³⁶ Onko do phurạt gaḍa pạchim aṛe reakʼ disạmko ar nagraharen cakʼlaoko ṭhen rajakʼ parwanako seṭeratʼkoa. Ona hukum ńamkate onko do hoṛkoko goṛowatʼkoa ar Isorakʼ oṛakʼ reakʼ kạmi lạgitʼ hõ goṛoko emena.