Esra 7 - সান্তালী বাইবেল

Esra do Jerusalemteye hijukʼkan

¹ Niạko ghoṭna tayom Parasren raj Artaksasto rajokʼ oktere Esra do Babel khone hecʼena. Esra do Serayaren hopone tahẽkana, ar Seraya do Asariạren hopon, Asariạ do Hilkiạren hopon,

² Hilkiạ do Salumren hopon, Salum do Sadokren hopon, Sadok do Ahiṭubren hopon,

³ Ahiṭub do Amariạren hopon, Amariạ do Asariạren hopon, Asariạ do Merayotren hopon,

⁴ Merayot do Sehariạren hopon, Sehariạ do Usiren hopon, Usi do Bukiren hopon,

⁵ Buki do Abisuạren hopon, Abisuạ do Pinhasren hopon, Pinhas do Eliaserren hopon ar Eliaser do maraṅ naeke Aronren hopone tahẽkana.

^6-7 Esra do dhorom gurui tahẽkana. Israelren Probhu Isorakʼ emakʼ Moseyakʼ ạn-ạriko cetanre uni do bhage bud ar ạkil tahẽkantaea. Uniren Probhu Isorakʼ ti do uni cetanre tahẽkante okae khoj onage raj do uniye emaekan tahẽkana. Artaksasto rajakʼ rajokʼ eaeakʼ bochorre Esra do Jerusalemte tinreye hecʼlena unre uni sãote thoṛa Israelko hõko hecʼ toralena. Onko modre do naekeko, Liwiko, gaenahako ar mundil oṛakʼren rurukhiyạ ar sapʼ sosor kạmi hoṛko tahẽkana.

^8-9 Isorakʼ bhạlạiyanakʼ ti do Esra cetanre tahẽkante uni do pạhil cando reakʼ pạhil dinre Babel khon mohnḍakate mõṛẽakʼ cando reakʼ pạhil dinre Jerusalemteye hecʼ seṭerena.

¹⁰ Esra do Israel disạmre Probhu Isorakʼ ạn-ạriko paṛhao ańjomako, onako manao, ar ona reakʼ niạmko ar hukumko cetʼako lạgitʼ apnartetʼe emena.

Esra ṭhen Artaksasto rajakʼ ciṭhi

¹¹ Okoe do Israelko emako lạgitʼ Probhu Isorakʼ sanam hukum ar niạmko reaṅ cecetʼakʼe ńamletʼ uni naeke ar dhorom guru Esra ṭhen Artaksasto raj do niạ ciṭhiye olleda;

¹² Sermaren Isorakʼ ạn-ạriren cecetʼicʼ naeke Esra ṭhen iń rajkoren raj Artaksasto do ciṭhiń oleda. Amakʼ bhạlại hoyokʼma baṛe.

¹³ Iń do ńit niạ hukumiń emokʼkana je, ińakʼ rajosṭire okoe Israelko ar onkoren naekeko ar Liwiko am sãote Jerusalemte ruạṛ calakʼko menetʼ onko doko sen ruạṛ daṛeakʼa.

¹⁴ Apeakʼ tire aperen Isorakʼ okaṭakʼ ạn-ạri menakʼ ona leka Jihudạ ar Jerusalem reakʼ obosta cetʼleka menakʼ ona khobor hatao lạgitʼ raj ar uniren eae sosolhako do onḍeko kolletʼmea.

¹⁵ Israelren Isor, okoe do Jerusalemreye tahenkan uni ńutumte raj ar uniren sosolhako tinạkʼ sona ar rupạ akoakʼ kusi lekako emokʼkan onam idi toraea.

¹⁶ Ona chaḍa okako sona ar rupạ Babel disạm khonem ńam ar Israelko ar onkoren naekeko Jerusalemre onkoren Isorakʼ oṛakʼ lạgitʼ akoakʼ kusite okako em ona jotogem iditoraea.

¹⁷ Am do onako sona ar rupạte ḍaṅgrako, bheḍako ar bhiḍi hoponko ar ona soṅgeteakʼ anaj-samaṅokʼakʼ ar coḍor samaṅokʼakʼ jinisko mońjte ńelkatem kirińa ar Jerusalemre aperen Isorakʼ oṛakʼre pinḍ cetanre onakom samaṅa.

¹⁸ Ona tayom am ar amren Jihudi boehako do sarecʼakʼ sona ar rupạte aperen Isorakʼ sana leka oka bhagepe hudis onape onkaea.

¹⁹ Aperen Isorakʼ oṛakʼre dewa sewae lạgitʼ oka bhajanko amakʼ tirem emocoyen onako do Jerusalemre aperen Isor samaṅrem hạjira.

²⁰ Ona chaḍa aperen Isorakʼ oṛakʼ lạgitʼ ar cetʼko jạruṛ ona reakʼ khoroc do rajakʼ khajańci oṛakʼ khonem idiya.

²¹ Iń Artaksasto raj do ńitokʼ phurạt gaḍa pạchim aṛe reakʼ sanam khajańci oṛakʼren rurukhiyạko niạ hukumiń emako kana je, sermaren Isorakʼ ạn-ạriren naeke Esra ape ṭhen okae khoj ona jotowakʼ ṭhik lekape emaea.

²² Ape do pe hajar are sae keji hạbicʼ rupạ, gel irạl hajar keji hạbicʼ guhum, bar hajar bar sae liṭar hạbicʼ darkha rasa, bar hajar bar sae liṭar hạbicʼ sunum ar tinạkʼ buluṅ lagaokʼ onape emaea.

²³ Sermaren Isor cetʼlekae hukum akatʼ ona lekage Isorakʼ oṛakʼ lạgitʼ jotowakʼ joton salakʼpe kạmiya. Raj ar uniren hoponkoakʼ rajosṭi upạrte uniyakʼ edre do alo jemon sodorokʼtae.

²⁴ Ale do arhõle metape kana je, Isorakʼ oṛakʼren jãhãe naekeko, Liwiko, gaenahako, rurukhiyạko, sapʼsosor kạmiko se eṭakʼ jãhãe kạmiyạko cetanre jãhãn khajna se bheja ladeako reakʼ ektiạri do okoeyakʼge bạnukʼtapea.

²⁵ E Esra, Isor reaṅ amakʼ oka ạkil menakʼ ona lekate am do phurạt gaḍa pạchim aṛeren sanam hoṛko bicạrko lạgitʼ nonkan kạmiyạko ar bikʼcạrkom bahalkoa okoe do amren Isore emakan ạn-ạriko baḍae. Ar okoe ona bako baḍae onko do onape cetʼakoa.

²⁶ Okoe aperen Isorakʼ ạn-ạri se rajakʼ hukum bako manao onko do ṭhik lekape sạjạikoa. Ona sạjại do hoedaṛeakʼ khan gujukʼ hoyokʼtaea se disạm khone laga oḍok ocokʼa se sompottiye behat ocokʼa se hajot khanareye bhorao ocokʼa.

Esra do Isore sarhaoede kan

²⁷ Aboren hapṛamkoren Probhu Isorakʼ sarhao baṛe hoyokʼtaema. Jerusalemre Isorakʼ oṛakʼre nonkan manot udukʼ reakʼ sana do rajakʼ ontorreye hoe ocoketʼtaea.

²⁸ Raj ar uniren sosolhako ar uniren sanam ektiạran kạmiyạko samaṅre unige asambheṛe dulạṛkedeńạ. Iń cetanre ińren Probhu Isorakʼ ti tahẽkante dil iń ńamkeda ar iń sãote Jerusalemte ruạṛ hijukʼ lạgitʼ Israelko mod khon mukhiyạko hõń jarwa mitʼketʼkoa.