Esra 6 - সান্তালী বাইবেল

Darjawes rajakʼ hukum

¹ Darjawes raje hukumketʼ khan hoṛko do Babelren rajakʼ nothi-potro dohoy reakʼ jaegare senkate onako sendrakeda.

² Onare Media disạmren Ekbatana ńutuman raj nagrahare mitʼṭecʼ guṛhạ puthi ńamena. Onare niạ katha ol tahẽkana: Dikʼsạ dohowakʼ

³ Kores rajakʼ rajokʼ pạhil bochorre Jerusalemren Isorakʼ oṛakʼ reaṅ uni do noae hukum akada: “Janwar samaṅko reakʼ samaṅokʼakʼ jaega lekate mundil do arhõ benao arokʼma ar ona reakʼ rehetʼ do kajakte bạisạu dohṛakʼma. Ona do hoyokʼa turui gel moka usul ar turui gel moka osar.

⁴ Onare pe aṭal do lạṭu lạṭu dhiri reakʼ ar mitʼ aṭal do kaṭ reakʼ. Ar jotowakʼ khorocko do rajakʼ dhon bhanḍar khon emokʼma.

⁵ Ona chaḍa Nebukadnesar Jerusalem reakʼ mundil khon okako sona ar rupạ reakʼ bhajanko Babelteye idiletʼ tahẽkan onako do arhõ Isorakʼ oṛakʼ reakʼ ṭhik jaegare dohokʼma.”

Darjawes raj do kạmi calao idi reakʼe hukumetʼ

⁶ Unre Darjawes raj do noae roṛ ruạṛkeda: “Phurạt gaḍa reakʼ pạchim aṛe reakʼ ṭoṭhakoren disạm cakʼlaoyicʼ Tatenai ar Setharbosenai ar onḍenko maraṅ hudạren kạmiyạko, ape do ńitokʼ ona jaega khon pharakre tahenpe.

⁷ Isorakʼ oṛakʼ reakʼ kạmire badha alope ema. Jihudikoren subedar ar murubbiko do Isorakʼ ona oṛakʼ lahateakʼ jaegaregeko benaoma.

⁸ Ona chaḍa Isorakʼ ona oṛakʼ benao kạmire Jihudikoren murubbiko lạgitʼ cetʼko cekae lagaoape ona reaṅ iń hukum apekana. Ar ona kạmi jemon alo thirokʼ ona lạgitʼ noko hoṛkoakʼ purạ khoroc do rajakʼ khajańci khon emokʼ hoyokʼtapea, metakʼme phurạt gaḍa pạchim aṛe ṭoṭhako reakʼ raj bheja khon.

⁹ Sermaren Isor ńutumte jeredokʼ samaṅokʼ lạgitʼ Jerusalemren naekeko do bạchurko, bheḍako ar bheḍa hoponko, guhum, buluṅ, darkha rasa ar sunum, metakʼme okako jạruṛokʼ ona emokʼ hoyokʼtapea. Onkoakʼ jạruṛokʼ leka dinạm hilokʼ noako do emokʼtege hoyokʼa,

¹⁰ jemon onko do sermaren Isor ńutumte ataṅokʼ reakʼ samaṅokʼakʼ porobko porob daṛeakʼ ar raj ar raj hoponkoakʼ bhạlại lạgitʼko koe daṛeakʼ.

¹¹ Iń do arhõń hukumeda, jodi niạ hukum jãhãe bae batao enḍekhan uniyakʼ oṛakʼ khon mitʼṭecʼ koalipe or boja ar onape coeloya ar unipe sobokʼ tabeya. Ar uniyakʼ niạ behok iạte uniyakʼ oṛakʼ do mạilạ ḍhipi leka hoyokʼtaea.

¹² Jãhãe raj se jãhãe jạtrenge jodi niạ hukume bebatao ar Jerusalem reakʼ ona mundil dhaṅdhaser reakʼe monejoṅ enḍekhan Isor, onḍe okoeye tahẽnkan uni do jemon uniye marao giḍikae. Ar iń Darjawesge niạ hukum doń emena. Noa do jemon joton salakʼ manao idikʼ.”

Mundil oṛakʼ reakʼ kạmi sạten

¹³ Darjawes raj do ona hukume emletʼ iạte phurạt gaḍa pạchim aṛe ṭoṭhakoren disạm cakʼlao kin Tatenai, Setharbosenai ar onḍenko maraṅ hudạren kạmiyạko do joton salakʼ onako palonkeda.

¹⁴ Hagai nạbi ar Eddor hopon Sakariạ do Isorakʼ katha lekate udgạukin emokʼkan tahẽkana ar ona são sãote Jihudiren murubbiko do gạthni reakʼ kạmiko laha idikeda. Israelkoren Isorakʼ hukum lekate ar Parasren raj Kores, Darjawes ar Artaksastokakʼ hukumte onko do mundil oṛakʼ reakʼ kạmiko sạtkeda.

¹⁵ Ar Darjawes rajakʼ rajokʼ turuiyakʼ bochorre Adar cando reakʼ tesarakʼ dinre mundil oṛakʼ reakʼ benao kạmi do sạt utạrena.

¹⁶ Ona tayom Israelko do, metakʼme naekeko, liwiko ar bondi dosa khon ruạṛ hecʼakan sarecʼ hoṛko do rạskạ salakʼ Isorakʼ oṛakʼko uḍhạukeda.

¹⁷ Isorakʼ oṛakʼ uḍhạu lạgitʼ onko do mitʼsae ḍaṅgra, bar sae bheḍa ar pon sae bheḍa hoponko samaṅketʼkoa. Ona chaḍa sanam Israelkoakʼ kại ńutumte samaṅokʼ lạgitʼ Israel gusṭiko reakʼ lekha lekate onko do gelbar goṭen meromko samaṅketʼkoa.

¹⁸ Moseyakʼ puthire cetʼleka olakan onkage Jerusalemre Isorakʼ sewa kạmi lạgitʼ naekeko ar liwiko do judạ judạ dolreko bahal ocoyena.

Bańcaokʼ porob

¹⁹ Bondi dosa khon ruạṛ hecʼen hoṛko do pạhil cando reakʼ gelpon din hilokʼre bańcao porobko porobena.

²⁰ Naekeko ar liwiko do apnartetʼko sapha maṛaṅena, ar onate sanamkogeko saphayena. Liwiko do apnar lạgitʼ, bondi dosa khon ruạṛ hecʼakan sanam hoṛko lạgitʼ ar onkoren naekeko lạgitʼ bańcaokʼ porobren bheḍako gurketʼkoa.

²¹ Bondi dosa khon ruạṛ hecʼ akan Israelko ar disạmre girobasokʼ kan Israelko okoe do Israelren Probhu Isorakʼ sana leka calakʼa mente aḍepase be-Jihudiko khon apnartetʼko begar doholen onko sanamkoge mitʼ sãote ona jelko jomkeda.

²² Onko do eae din hạbicʼ rạskạ salakʼ bin khạmiyanakʼ piṭhạ porobko porobena. Onko do rạskạteko perecʼena, ente Ạsurren raj jemon Israelren Isorakʼ oṛakʼ reakʼ kạmireye goṛowako onate Probhu Isor do uniyakʼ mone ạcruletʼtaea.