Esra 5 - সান্তালী বাইবেল

Darjawes ṭhen ciṭhi

¹ Darjawes rajakʼ rajokʼ dosarakʼ bochorre Hagae nạbi ar Eddoren hopon Sakariạ nạbi do Israelkoren Isor ńutumte Jihudạ ar Jerusalemren Jihudiko ṭhen Isor emakʼ niạ katha lạlạikin ehopʼena.

² Unre Sealṭiyelren hopon Serubabel ar Josadakren hopon Jesua do Jerusalemre Isorakʼ oṛakʼ arhõ benao aroekin ehopʼena. Ar Isorren nạbikin hõ onko sãote tahẽkate goṛoako kin ehopʼena.

³ Unre phurạt gaḍa pạchim aṛe reakʼ ṭoṭharen disạm cakʼlaoyicʼ Tatenai, Setharbosenai ar onḍenko maraṅ hudạren kạmiyạko do Jihudiko ṭhen senkateko menkeda, “Mundil oṛakʼ benao aroe reakʼ hukum do okoeye emakatʼpea?”

⁴ Onko do arhõko menkeda, “Okoe niạ dolanko benaoetʼkan onkoakʼ ńutum do cetʼ tako?”

⁵ Menkhan Jihudikoren murubbiko secʼ Isorakʼ nońjor tahẽkana. Ar Darjawes ṭhen khobor ạuri kol hạbicʼ ar uni ṭhen khon olakʼ reakʼ roṛruạṛ ạuriko ńam hạbicʼ mukhiyạko do kạmi bako bond ocoletʼkoa.

^6-7 Phurạt gaḍa pạchim aṛeren disạm cakʼlaokin Tatenai, Setharbosenai ar onḍenko maraṅ hudạren kạmiyạko do Darjawes raj ṭhen oka ciṭhiko kolketʼ ona do nonka leka tahẽkana: Maharaj Darjawes, amakʼ bhạlại baṛe hoyokʼma.

⁸ Maharaj baḍaekakʼme je, ale do Jihudạ reakʼ maraṅ Isorakʼ oṛakʼtele senlena. Onḍe hoṛko do lạṭu lạṭu dhirikote oṛakʼko benaoeda ar bhitkore do borgako bạisạueda. Ar ạḍi joton salakʼko kạmikana ar kạmiko do laha idikʼ kana.

⁹ Murubbikole kuliketʼkoa, “Mundil benao aroe lạgitʼ do okoeye hukum akatʼpea?”

¹⁰ Ar onkoakʼ ńutum hõle kuli akatʼkoa jemon onkoren mukhiyạkoakʼ ńutumle baḍae ocome arle ol doho daṛeakʼ.

¹¹ Onko doko roṛ ruạṛatʼlea, “Ale do ot ar sermaren Isorren golam kanale. Ale do ona mundil oṛakʼ arhõle benao aroyeda oka do Israelren mitʼṭen maraṅ raj ḍher serma lahareye benaoletʼ tahekan.

¹² Menkhan aleren hapṛamko do sermaren Isorko bekusi ocoledete uni do Babelren raj Kaldi Nebukadnesar rajakʼ tireye jimạletʼlea. Nebukadnesar do niạ mundile dhaṅ dhaserleda ar hoṛko bondikate Babelteye idiletʼkoa.

¹³ Menkhan Babelren raj Koresakʼ rajokʼ pạhil bochorre uni do Isorakʼ niạ oṛakʼ arhõ benao lạgitʼe hukumakada.

¹⁴ Uni do Babel reakʼ mundil khon Isorakʼ oṛakʼ reakʼ sona ar rupạ reakʼ bhajankoe oḍok akada one okaṭakʼ do Jerusalem mundil khon Nebukadnesare idiletʼ tahẽkan. Ar Keros raj do acʼe bahal akade subedar Sesbasarakʼ tire onakoe jimạ akada.

¹⁵ Raj do uniye metade tahẽkana, Jerusalemre lahateakʼ ṭhạ̃irege jemon Isorakʼ oṛakʼ do arhõ benao ruạṛokʼ ar onako jinis jemon idikate onḍege doho ruạṛokʼ.

¹⁶ Onate Sesbasar do Jerusalemte hecʼkate Isorakʼ oṛakʼ reakʼ rehetʼe bạisạukeda. Ar enhilokʼ khon teheń hạbicʼ ona reakʼ benao kạmi calakʼ kana ar ạuri sạtokʼa.”

¹⁷ Ar ńitokʼ maharaje khoj khan tobe do Babelren rajakʼ nothi-potro dohoy jaegare khoj hataokatem ńel daṛeakʼa, Jerusalem reakʼ Isorakʼ niạ oṛakʼ benao lạgitʼ hukum do Keros raj sạrigeye emakana se baṅa. Ar niạ tayom ale babotre maharaj okae goṭae ona baṛeye baḍae ocolema.