Esra 4 - সান্তালী বাইবেল

Mundil bekʼnao arokʼre tạkicʼ daram hoyokʼkan

¹ Jihudạ ar Benjạminkoren bạiriko doko ańjomkeda, bondiko doko ruạṛ hecʼakana ar Israelren Probhu Isor ńutumte mitʼṭecʼ mundilko benaokana.

² Unre onko bạiriko do Serubabel ar bõskoren mathako ṭhen hecʼkateko menkeda, “Mundil oṛakʼ benao kạmire ale hõ ape sãotele kạmiya, ente ale hõ aperen Isorakʼ sana leka calakʼle kurumuṭuyeda. Ạsurren raj Esarhadon do nonḍeye ạgu akatʼle tayom khon ale hõ Isor ńutumte janwarkole samaṅetʼkoa.”

³ Menkhan Serubabel, Jesua ar Israelren eṭakʼ eṭakʼ mukhiyạkoko menkeda, “Aleren Isor ńutumte oṛakʼ benaore ale tulucʼ apeakʼ do cetʼ bakhra hõ bạnukʼtapea. Parasren Keros rajakʼ hukum leka Israelren Probhu Isor ńutumte ale eskarge onale onkaea.”

⁴ Unre onkoakʼ disạmreko girobasokʼ kan eṭakʼ eṭakʼ jạtrenko do Jihudạren hoṛkoakʼ tiko lạbṛukʼ ketʼtakoa ar botor udukʼakoko ehopʼena jemon ona oṛakʼ aloko benao daṛeakʼ.

⁵ Onko upạrte kạmikate onkoakʼ monejoṅakʼko rạputʼ ocoytako lạgitʼ Paras rajren kạmiyạko ṭakako ematʼkoa. Onko do Keros rajakʼ rajokʼ oktere ar uni tayom Doreabosakʼ rajokʼ oktere hõ inạ kạmigeko kạmikeda.

Parasren judạ judạ rajko oktere kạmi upạrte teṅgo daram

⁶ Ahasberosakʼ rajokʼ ehopʼrege onko bạiriko do Jihudạ ar Jerusalemren hoṛko upạrte mitʼṭecʼ olakʼ hoteteko lạliskeda.

⁷ Parasren raj Artaksasto oktere hõ Bislam, Mitredat, Tabeyel ar uniren eṭakʼ eṭakʼ soṅgetenko do Artaksasto ṭhen mitʼṭecʼ ciṭhiko olkeda. Ona ciṭhi do Arami pạrsite torjomakate ol hoylena.

⁸ Jerusalem upạrte Artaksasto raj ṭhen disạm cakʼlaoyicʼ Rehum ar olokʼicʼ Simsaiyakʼ ciṭhi tahẽkana.

^9-10 (Disạm cakʼlaoyicʼ Rehum ar olokʼicʼ Simsai do niạ ciṭhikin olkeda. Unkin sãote bikʼcạrko, kạmiyạko, cạlạuako, Erekrenko, Babelrenko, Susarenko metakʼme, Elamiko, ar sarecʼ jạtrenko one onko maraṅ ar manotan Osnarbnipal do Samariạ ato ar nagraha ar phurạt gaḍa pạchim aṛe reakʼ ṭoṭhakoreye girobas ocoletʼko.)

¹¹ Onko do Artaksasto raj ṭhen okaṭakʼ ciṭhiko olletʼ ona do nonka tahẽkana: “Amren gutiko, metakʼme phurạt gaḍa pạchim aṛeren hoṛko do Artaksasto raj ṭhenle oleda.

¹² Maharaj do baḍae jạruṛtaea je, am ṭhen khon okoe Jihudiko ale ṭhenko hecʼakan onko do Jerusalemteko sen akana ar huhul ar bạṛicʼ nagraha arhõko benao rakapʼeda; onko do ona reakʼ bhit ar rehetʼko bạisạu aroyeda.

¹³ Maharaj do arhõ baḍae jạruṛaea je, ona nagraha ar bhitko benao dohṛakʼ enḍekhan onko hoṛ do khajna, bheja, se mạsul do ar bako emokʼa. Ar onate rajakʼ do lokshan hoyokʼtaea.

¹⁴ Ale do raj oṛakʼ reakʼ buluṅle jometʼte raje bemanotokʼ do bale khojkana. Ona iạte ale do niạ khobor raj ṭhenle kolkeda.

¹⁵ Onate raj do acʼren hapṛamkoakʼ Itihãs puthire sendrakateye ńelma. Ona puthire ol menakʼa, Jerusalem do mitʼṭecʼ huhul nagraha kana; niạ nagraha do rapajko ar disạmkoren cakʼlaoko ạḍi sasete em akatʼkoa ar ḍher laha khonge ona nagrahare do hulko hõ hoe hijukʼkana. Ar ona iạtege nagraha do ḍahao maraolena.

¹⁶ Ale do rajle baḍae ocoyede kana, niạ nagraha do arhõ benao rakabokʼ ar ona reakʼ bhitko benao ruạṛokʼ, enḍekhan phurạt gaḍa pạchim aṛe reakʼ ṭoṭha do am tabere ar baṅ tahena.”

¹⁷ Raj do ona ciṭhi reakʼ niạ roṛ ruạṛe kolkeda: “Subedar Rehum, olokʼicʼ Simsai ar Samariạ ar phurạt gaḍa pạchim aṛe reakʼ judạ judạ ṭoṭhare girobasokʼ kan judạ judạ hudạren cetan kạmiyạko ṭhen niạ ciṭhiń oletʼ kana. Apeakʼ bhạlại baṛe hoyokʼma.

¹⁸ Okaṭakʼ ciṭhi iń ṭhenpe kol akatʼ ona do torjomakate paṛhao ańjomakana.

¹⁹ Ar ińiń hukumketʼ khan ona reakʼ khoj do hatao hoyakana ar baḍae ńam akana je, ḍher jug laha khonge ona nagraha do rapajko upạrteye hul ạguyeda; ona do nonkan mitʼṭecʼ jaega kana onḍenko hoṛ do ḍanṭaore tahen bako kusiyakʼa.

²⁰ Daṛean rapajko do Jerusalem khon phurạt gaḍa pạchim aṛe reakʼ goṭa ṭoṭhako rajokʼ kan tahẽkana ar onḍenko hoṛko hõ khajna, bheja ar mạsulko emokʼkan tahẽkana.

²¹ Ńitokʼ do onko hoṛko hukumakope jemon akoakʼ kạmiko thirtako ar ińakʼ hukum ạuriko ńam hạbicʼ ona nagraha do alo jemonko benao rakab.

²² Sontorokʼpe, niạ kạmi do alope ḍhilisiliya. Raj ar sorkarakʼ lokshan do cedakʼpe ḍher ocowakʼa?”

²³ Artaksasto rajakʼ ciṭhi do Rehum, olokʼicʼ Simsai ar judạ judạ maraṅ hudạren kạmiyạkoko paṛhao ańjomatʼko são sãote onko do Jerusalemren Jihudiko ṭhenko calaoena ar onkoakʼ kạmi jormoṭkateko bondkatʼ takoa.

²⁴ Nonkate Jerusalemre Isorakʼ oṛakʼ reakʼ kạmi do thirena; Parasren raj Darjawesakʼ rajokʼ dosar bochor hạbicʼ ona do thirge tahẽyena.