Esra 3 - সান্তালী বাইবেল

Sekʼwae lạgitʼ pinḍ benaoen

¹ Israelko do apan ạpin ato ar nagrahare girobasokʼko ehopʼen tayom eaeakʼ candore sanam hoṛko do mitʼ domte Jerusalemreko jarwayena.

² Ar ona tayom Josadakren hopon Jesua ar uni sãoten naekeko ar Solṭielren hopon Serubabel ar uni sãoten hoṛko do jeredokʼ samaṅokʼakʼ porobokʼ lạgitʼ Isorren hoṛ Moseyakʼ ạn-ạrire olakʼ lekate Israelren Isorakʼ pinḍko benaokeda.

³ Onko do aḍepaseren hoṛko botoratʼkore hõ lahateakʼ rehetʼ cetanrege pinḍko benao arokeda ar ona cetanre setakʼ ar ạyupʼ jokhecʼ samaṅokʼakʼ oktere Probhu Isor ńutumte jeredokʼ samaṅokʼakʼko ehopʼena.

⁴ Ona tayom onko do sostor reakʼ katha leka Chạuni porobko porobena ar niạm lekate dinạm hilokʼ reakʼ niṭakatʼ lekha leka jeredokʼ samaṅokʼakʼko samaṅetʼ tahẽkana.

⁵ Ona tayom khon onko do dinạm hilokʼ reakʼ jeredokʼ samaṅokʼakʼ, ambas ńindạ reakʼ jeredokʼ samaṅokʼakʼ, Probhu Isor ńutumte niṭakatʼ porob reakʼ jeredokʼ samaṅokʼakʼ ar apnarakʼ kusite ạguakʼ jeredokʼ samaṅokʼakʼ samaṅko ehopʼena.

⁶ Probhu Isorakʼ oṛakʼ reakʼ rehetʼ baṅ hoyakan tahẽkanre hõ onko do eaeakʼ cando reakʼ pạhil din khon Probhu Isor ńutumte jeredokʼ samaṅokʼ reakʼ porobokʼko ehopʼena.

Koejoṅ oṛakʼ arhõ benao aroyen

⁷ Onko do rajmistriko ar chutạr mistriko ṭakako ematʼkote Sidon ar Turren hoṛkoakʼ jomakʼ, darkha rasa ar sunumko ematʼkoa jemon onko do Parasren Keros rajakʼ hukum lekate Lebanon khon Jappho hạbicʼ jalapurite debdạru kaṭkoko ạgu daṛeakʼ.

⁸ Jerusalemre Isorakʼ oṛakʼre seṭeren tayom dosar bochor reakʼ dosar candore Solṭiạlren hopon Serubabel, Josadakren hopon Jesua ar onkoren sarecʼ boehako do kạmiko ehopʼkeda. Noko boehako doko hoyokʼkana naekeko, liwiko ar eṭakʼ sanam hoṛko okoe do bondi dosa khon Jerusalemteko ruạṛ hecʼlen tahẽkan. Bargel bochor ar ona khon ḍher umerren liwiko do Probhu Isorakʼ oṛakʼ benao reakʼ ńel todarotreko bahal ocoyena.

⁹ Jesua ar uniren hoponko ar boehako, Hodbiạ bõsren Kadmiyel ar uniren hoponko, Henadadren hoponko ar onkoren hoponko ar boehako okoe do mitʼte Isorakʼ oṛakʼreko kạmiyetʼ tahẽkan onkoko ńel todarotketʼkoa. Noko do jotoge liwiko tahẽkana.

¹⁰ Ado rajmistriko Probhu Isorakʼ oṛakʼ reakʼ rehetʼ tinreko bạisạukeda unre Israelren raj Dạudakʼ hukum leka Probhu Isorakʼ ṭhonok hoyokʼ lạgitʼ naekeko do akoakʼ kicricʼko horokʼketʼte sakwako hataokeda ar liwiko mod khon Ashapren hoponko do kortalante apan ạpin jaegareko teṅgoyena.

¹¹ Onko do Probhu Isorakʼ sarhao ar ṭhonok reakʼ sereń sereńteko menkeda, “Uni doe bhạlạyạnicʼ kana, Israelko cetanre uniyakʼ daya do jaejug hạbicʼ tahenkana.” Probhu Isorakʼ oṛakʼ reakʼ rehetʼ bạisạuen khan sanam hoṛko do ãṭ aṛaṅte Probhu Isorko sarhaokedea.

¹² Menkhan ḍherkoge tinre rạskạteko andoṛkeda unre okoe do lahateakʼ koejoṅ oṛakʼko ńelletʼ onkan ḍher haṛam naekeko, liwiko ar bõsren mathako do niạ koejoṅ oṛakʼ reakʼ rehetʼ ńelte ạḍi ãṭko rakʼkeda.

¹³ Hoṛko do nunạkʼko andoṛkeda je, okaṭakʼ do rạskạteakʼ ar okaṭakʼ do homorteakʼ rakʼ kana ona do okoege bako bujhạu daṛeada. Ona aṛaṅ do ḍher sạṅgiń khon hõ ańjomena.