Esra 10 - সান্তালী বাইবেল

Israelkoakʼ kại aṅgoc

¹ Esra do tinre Isorakʼ oṛakʼ samaṅre otre ombakʼkate rakʼ rakʼteye koejoṅkan tahẽkana ar kạiye aṅgocetʼ tahẽkana unre Israelkoren ạḍi utạr herel, maejiu ar gidrạko do uni ṭhen hecʼkateko jarwayena. Ar onko hõ ạḍitetʼko rakʼkeda.

² Unre Elamren mitʼ bõsren Jehiyelren hopon Sekaniạ do Esrae metadea, “Aboakʼ disạmreko girobasokʼ kan judạ judạ jạtren kuṛiko bon bapla akatʼkote aboren Isor ṭhen do bepạtiạrko bon hoyakana; menkhan enhõ Israelkoakʼ as do ńithõ menakʼgea.

³ Onate dela bon, aboren Isor samaṅre niạ bon kiriạkʼma, ińren kisạ̃ṛ amakʼ sopolha lekate ar aboren Isorakʼ hukum okoeko botorakʼ kan onkoakʼ solha hotete ale do noko sanam maejiuko ar onkoren gidrạkole bạgi giḍiyakoa. Ar ona do ạn lekatege hoyokʼma.

⁴ Ado ma beretʼme; niạ reaṅ kạmi do amakʼ dạyik kangea. Ale do amle goṛowama, onate ma dil salakʼ kạmime.”

⁵ Unre Esra doe beretʼena ar ona katha leka kạmi lạgitʼte maraṅ naekeko, Liwiko ar onḍe jarwa akan Israelkoe kiriạ ocoketʼkoa. Ar onko do sanamkogeko kiriạyena.

⁶ Ona tayom Esra do Isorakʼ oṛakʼ samaṅ khon Eliasibren hopon Jehohananakʼ kandhateye boloyena. Onḍe uni do cetʼge bae jom ńuleda, ente bondi dosa khon ruạṛ hecʼakan hoṛkoakʼ bepạtiạr iạteye hirdạnikʼ kan tahẽkana.

⁷ Bondi dosa khon ruạṛ hecʼakan sanam hoṛko jemon Jerusalemre hecʼkateko jarwakʼ onate Jihudạ ar Jerusalem reakʼ sanam jaegare mitʼṭecʼ lại jạhirakʼ do hoyena.

⁸ Jãhãege pe din bhitrite bae hạjirokʼ, uniyakʼ somppoti do cetan hudạren kạmiyạko ar mukhiyạkoakʼ sopolha lekate dokholokʼtaea ar bondi dosa khon ruạṛ hecʼakan hoṛkoakʼ somaj khon hõe oḍok ocokʼa.

⁹ Pe din bhitrire Jihudạ ar Benjạmin ṭoṭharen sanam hoṛ do Jerusalemre hecʼkateko jarwayena. Ar areyakʼ cando reakʼ bargelakʼ dinre sanam hoṛ do Isorakʼ oṛakʼ samaṅ reakʼ maedanre ona babotreko duṛupʼena ar jạṛi dakʼ iạteko thar tharaoena.

¹⁰ Unre naeke Esra do teṅgoyente onkoe metatʼkoa, “Ape do bepạtiạrkope hoyakana, ar judạ judạ jạtren kuṛikope bapla akatʼkote Israelkoakʼ kại tulucʼ arhõ kạipe juṭucʼ akada.

¹¹ Ńitokʼ ape do aperen hapṛamkoren Probhu Isor ṭhen kại aṅgocpe ar uniyakʼ sana leka kạmipe. Apeakʼ disạmre girobasokʼ kan hoṛko ar eṭakʼ jạtren maejiu khon ape apnartetʼ begarokʼpe.”

¹² Unre sanam hoṛko do ãṭ aṛaṅteko menkeda, “Am do ṭhik kathagem roṛ akada; ar cetʼ lekam roṛakatʼ onkage ale dole kạmiya.

¹³ Menkhan ńitokʼ do ạḍi dakʼe dakʼeda ar ḍher hoṛ kana bon, onate abo do bahrere babo teṅgo daṛeakʼ kana. Ona chaḍa niạ babotre miṭmaṭ do mitʼ se bar dinre do baṅ hoyokʼa, ente abo do ḍherkoge bon kại akada.

¹⁴ Aboren cetan hudạren kạmiyạkoge goṭa somajren ạyurko jemonko hoyokʼma. Ar ona tayom aboakʼ judạ judạ ato ar nagraha modre okoe do eṭakʼ jạtren kuṛiko bapla akatʼko onko mimitʼko do akoren murubbiko ar bikʼcạrkoante mitʼṭecʼ niṭakatʼ oktere Jerusalemteko hijukʼma. Enḍekhan niạ kại iạte aboren Isorakʼ botoranakʼ edre do abo khon ocogokʼa.”

¹⁵ Eken Asahelren hopon Jonathan ar Tikua hopon Jahseya do niạ katha upạrtekin teṅgoyena; ar Mesulam ar Liwi Sabethae hõ unkin secʼkin tahẽkana.

¹⁶ Ar bondi dosa khon ruạṛ hecʼakan hoṛko do ona katha lekageko kạmikeda. Naeke Esra do mitʼke mitʼ bõs khon mukhiyạkoe bachaoana. Ar gelakʼ cando reakʼ pạhil din hilokʼ onko do ona babotre ḍunḍhạu lạgitʼko duṛupʼena.

¹⁷ Okoe do eṭakʼ jạtren kuṛiko baplaletʼko tahẽkan onko sanamko babotre ḍunḍhạu reakʼ kạmi do dosar bochor pạhil cando reakʼ pạhil dinreko sạtʼkeda.

Etạkʼ jạtren kuṛiko bapla akatʼko hoṛkoakʼ tạlika

¹⁸ Okoe eṭakʼ jạtren kuṛiko baplaletʼko tahẽkan onkoakʼ tạlika do nonka leka: Naekeko modre Josadakʼ hopon Jesua ar uniren boehakoakʼ bõsrenko modre Makʼasia, Eliaser, Jarib ar Godlia.

¹⁹ Noko sanamkoge akoren bạhu bạgiko reakʼko kiriạyena ar onkoakʼ dos gunạkʼte mimitʼ pal khon mitʼṭenkate bheḍa do dos ńutumteko samaṅketʼkoa.

²⁰ Imerakʼ bõsrenko modre Hanani ar Sebadia.

²¹ Harim bõsrenko modre Makʼasia, Eliạ, Semaya, Jahiyel ar Usiạ.

²² Pasur bõsrenko modre Elioyena, Makʼasia, Ismael, Nethaniel, Josabad ar Elasa.

²³ Liwi bõsrenko modre Josabad, Simai, Kelaia metakʼme Kelita, Pethahiạ, Jihudạ ar Elieser.

²⁴ Sekʼreńko modre Eliasib. Rurukhiyạko modre Salum, Telem ar Uri.

²⁵ Eṭakʼ Israelko modre- Paros bõsko modre Ramia, Isiạ, Malkia, Miyamin, Eliasar, Malkia ar Benaya.

²⁶ Elam bõsrenko modre Mataniạ, Sekariạ, Jahiye, Abdi, Jeremot, ar Eliya.

²⁷ Satu bõsrenko modre Elioyenae, Eliasib, Matania, Jeremoth, Sabad, ar Asisa.

²⁸ Bebae bõsrenko modre Jehohanan, Hananiạ, Sabai ar Athlai.

²⁹ Bani bõsrenko modre Mesulam, Maluk, Adaya, Jasub, Seyal ar Jeremoth.

³⁰ Pahat-Moab bõsrenko modre Adna, Kelal, Benaya, Makʼasia, Matania, Besalel, Binui, ar Manse.

³¹ Harim bõsko modre Eliaser, Jisia, Malkia, Semaya, Simeon,

³² Benjamin, Maluk ar Semaria.

³³ Hasum bõsrenko modre Matenai, Matata, Sabad, Eliphelet, Jeremai, Manase ar Simai.

³⁴ Bani bõsrenko modre Makʼadai, Amram, Uwel,

^35-37 Benaya, Bedeya, Keluhi, Wania, Meremot, Eliasib, Matenai, Matania ar Jakʼasu,

^38-40 Binui bõsrenko modre Simai, Selemia, Nathan, Adaya, Maknadebai, Sasai, Saraj,

^41-43 Asarel, Selemiạ, Semariạ, Salum, Amariạ ar Joseph. Nebo bõsrenko modre: Jeyel, Matithia, Sabad, Sebina, Jadai, Joel ar Benaya.

⁴⁴ Noko sanamkoge eṭakʼ jạtren kuṛiko baplaletʼkoa ar adom adom bạhukoakʼ hoṛmore do gidrạko hõko tahẽkana.