Ephesiko lạgitʼ Pạul Apostolakʼ ciṭhi 6 - সান্তালী বাইবেল

Gidrạ ar go-babako lạgitʼ sopolha

¹ E gidrạko, Probhu Isor cetʼlekae khojkan onkage aperen gogo-babakoakʼ bataotakope, ente ona do lek kana.

² Sonot sostorre pạhilre okaṭakʼ hukum sãote gokʼakʼ menakʼ ona do noage, “Eṅgam-ạpum ganaokinme,

³ jemon amakʼ bhage hoyokʼtam ar dhạrtire aema din jiwetʼem tahena.”

⁴ E babako, aperen gidrạko alope ạṛis ocokoa, bickom Probhu Isorakʼ ḍanṭao ar sikhạunate hara burukope.

Golam ar kisạ̃ṛko lạgitʼ sopolha

⁵ E golamko, ape do Mạsirepe gobol akante botor ar manot seletʼ ontor khon niạ dhạrtiren kisạ̃ṛkoakʼ batao takope.

⁶ Hoṛ kusi ocoko lạgitʼ aperen kisạ̃ṛkoakʼ mẽtʼãhã samaṅre alope gobolokʼa; ona khon bickom Mạsiren golam leka Isorakʼ monsubạ do mon ar ontorte bataokate aperen kisạ̃ṛko ṭhen tabekʼpe.

⁷ Ente manwa ṭhen golam do bape khaṭaokʼ kana menkhan Probhu Isor ṭhenge ar ona hudiskate rạskạ monte aperen kisạ̃ṛko ṭhen khaṭaokʼpe, entepe baḍaegea,

⁸ mimitʼ hoṛ jãhãnakʼ bogeye kạmi khan onatege Probhu Isor ṭhen khon kuṛạiye ńama, baṅ doe golam kan ar baṅ doe sạdhinicʼ kan.

⁹ E kisạ̃ṛko, aperen golamko sãote ape hõ onkage beoharpe. Onko do botor alope udukʼakoa, entepe baḍaegea, onko ar aperen doe ini mitʼ Probhu Isor kangeae ar uni do sermare menaea; uniyakʼ mẽtʼãhã samaṅre do jotogeko somangea.

Soetan upạrte lạṛhại

¹⁰ Sarecʼ katha do nõkʼõe, Probhu Isor sãote mitʼakae tahẽkate uni emakʼ maraṅ daṛete daṛeanko hoyokʼpe.

¹¹ Lạṛhại lạgitʼ Isorakʼ sanam saj-bajko horokʼ joṅpe, jemon Soetanakʼ joto lekan phor phundikorepe teṅgo daram daṛeakʼ.

¹² Aboakʼ noa lạṛhại do jãhãe manwa upạrte do baṅkana, bickom ona do ńut rajosṭi reakʼ joto lekan cakʼlaoko ar ektiạrianko upạrte, ńut dhạrtiren daṛean jiuko upạrte, ar coṭren joto bạṛicʼ jiuko upạrte.

¹³ Onate ape do lạṛhại lạgitʼ Isore emakan sanamakʼ sajbajko horokʼ joṅpe, jemon Soetane hạ̃nlepere unipe teṅgo daram daṛeae arpe bhagaoete teṅgo ṭak akanpe tahen.

¹⁴ Onate sạriyakʼte ḍanḍa paṭhe keṭejokʼte, koṛam rukhiyạ lạgitʼ dhorom jionte koṛam aḍkate,

¹⁵ suluk reakʼ bhage sombat porcar lạgitʼ jaṅga sapṛaokate teṅgo ṭak akan tahenpema.

¹⁶ Ona chaḍa pạtiạu reakʼ ḍhal hõ sapʼ joṅpe; ona ḍhalte Soetanakʼ joto lekan seṅgel sarkope ĩṛĩcʼ daṛeakʼa.

¹⁷ Ar bańcaokʼ lạgitʼ bohokʼ reakʼ aḍokʼakʼ hatao joṅpe ar sonot Jiu reakʼ tarwaṛege, metakʼme Isorakʼ katha ataṅ joṅpe.

¹⁸ Sonot Jiu hotete ạyur ocokʼte mon ar ontorte jao ghuṛi koejoṅpe. Onate jagwar akae tahente Isorren sanam hoṛko lạgitʼ mitʼ talao koejoṅre jamaṛ akae tahenpe.

¹⁹ Iń lạgitʼ hõ koejoṅpe jemon kathań roṛre Isor do nonkan pạrsiye emạń jemon dil salakʼ uniyakʼ bhage sombat reakʼ sạri okoakʼkoń porcar daṛeakʼ.

²⁰ Noa bhage sombat porcar lạgitʼ iń do sikṛi akan raj paṭhaona kạnạń. Koejoṅpe jemon hajotre tahen jokhecʼ cetʼleka bhage sombat porcar reakʼ lek kantiń onkage dil salakʼ onań porcar daṛeakʼ.

Mucạtʼ katha

²¹ Cetʼleka minạńa ar ińakʼ dinko cetʼ leka paromokʼkan ona do dulạṛiạ boeha ar Probhu Isorre pạtiạu akan sapʼ dapʼicʼ Tukhikus ṭhenpe baḍae daṛeakʼa.

²² Ar ale reaṅ jemonpe baḍae daṛeakʼ ar uni jemon udgạue emape onate iń do ape ṭheniń kolkedea.

²³ Isor Baba ar Probhu Jisu Mạsi do boehako suluk, pạtiạu, are dulạṛpema.

²⁴ Aboren Probhu Jisu Mạsire okoekoakʼ bin mucạtʼ dulạṛ menakʼ onko sanamkore Isorakʼ daya baṛe tahenma.