Ephesiko lạgitʼ Pạul Apostolakʼ ciṭhi 5 - সান্তালী বাইবেল

Marsalre taṛam reaṅ

¹ Isorren dulạṛiạ hoponko lekate ape do Isorakʼ lek leka hoyokʼpe.

² Mạsi cetʼlekae dulạṛaketʼ bon ar abon lạgitʼ Isor ńutumte jut so lạgitʼ samaṅokʼakʼ lekate acʼtetʼgeye emen, ṭhik onkage ape hõ dulạṛ horte taṛampe.

³ Sanam lekan loṭghuṭi, bin napaeakʼ se laloc reakʼ kathako ape talare jemon alo ańjomokʼ, ente noako katha Isorren hoṛkoakʼ do baṅ sajaokʼa.

⁴ Ar sanam lekan lajao paṛaoakʼ colon se lelha roṛ ar bạṛicʼ umtạ umti katha hõ ape talare alo hoyokʼma, ente noako do baṅ sajaokʼa. Ona khon bickom ape do Isor sarhaoepe.

⁵ Khạṭigepe baḍaea, okoeko laṭghaṭetʼkan, okoeko bin napaege ar okoekoko lalociạkokan, metakʼme okoe do boṅga sewakoko ńumogokʼkan onko do Mạsi ar Isorakʼ rajre jãhãn ạidạrige bạnukʼtakoa.

⁶ Ạuṛi sạuṛi kathate okoe hõ jemon aloko bulạupe ma, ar eṭakʼ horte aloko idipe ma, ente okoe bebatao iạte onako kạmi onkorege Isorakʼ sạjại do paṛaokʼa.

⁷ Ar nonkan hoṛko sãote alogepe gatekʼa,

⁸ ente pạhil do ńutrepe tahẽkana menkhan ńitokʼ do Probhu Isorrepe mitʼ akante marsaltepe hecʼakana. Marsalte perecʼ hoṛkoakʼ cetʼleka calakʼ lek kan onkage ape hõ calakʼpe,

⁹ ente sanam lekan bhạlại ar dhorom ar sạriyakʼ kangea marsal reakʼ jo do.

¹⁰ Onate biḍạu aṭkarpe okaṭakʼ kạmi do Probhu Isore kusikʼa mente.

¹¹ Ńut reakʼ bin jowanakʼ kạmikore do alope seledokʼa; bickom onako reakʼ dos udukʼakope,

¹² ente manwakoakʼ oko danaṅre kạmi akatʼ reakʼ noako katha roroṛ hõ lajao paṛaoakʼ kana.

¹³ Marsal hotete jãhãn kạmi reakʼ dos udukʼlen khan ona do sodorokʼgea,

¹⁴ ente marsalge jotowakʼe sodoreda. Onate sonot sostorre olakana, “Ebhenokʼme E jạpitʼ akatʼicʼ, ar gocʼko khon beretʼme; khan Mạsiye marsalama.”

¹⁵ Ape cetʼlekape calakʼkan ona reaṅ mońjte hudiskate ńelpe. Bebuj hoṛko leka baṅ calaokate akelanko leka baṛe calakʼpe.

¹⁶ Apeakʼ tire bhage kạmi reakʼ okaṭakʼ ạt menakʼ ona do purạte kạmire lagaope, ente noa piṛhi do bạṛicʼgea.

¹⁷ Onateń meneda, ape do bebujko alope hoyokʼa, bickom Probhu Isorakʼ sana cetʼ kana mente ona bujhạu joṅpe.

¹⁸ Alope ńũ bulokʼa, onate do bin sambṛaokʼkope hoyokʼa. Ona khon bickom sonot Jiu tabere tahenpe,

¹⁹ ape do sereńko reakʼ sereńte ar sarhao sereńkote ar Jiuteakʼ õṛhẽakʼkote ape apere gapal maraope; ar apeakʼ ontorte Probhu Isor õṛhẽ sereńaepe.

²⁰ Siń sạṭupʼ aboren Probhu Jisu Mạsi ńutumte Isor Baba gun manao joharaepe.

²¹ Mạsiyakʼ dewa sewakore menakʼpete ape apere tabe akan tahenpe.

Juri pạri lạgitʼ sikhạuna

²² E maejiuko, Probhu Isorre cetʼleka tabe akan menakʼpe onkage apan ạpin jãwãe tabere tahenpe,

²³ ente Mạsi do cetʼleka manḍerren mathakane, metakʼme acʼakʼ hoṛmo reakʼ mathakane, onkage herel hõ maejiuren matha kanae. Ona chaḍa noa hoṛmoren babańcaoicʼ do Mạsige.

²⁴ Cetʼleka manḍer do Mạsiyakʼ tabere menakʼa onkage maejiuko hõ jotowakʼre apan ạpin jãwãe tabere tahen lek kanako.

²⁵ E jãwãeko, Mạsi cetʼ leka manḍere dulạṛletʼ ar ona lạgitʼ apnare emen ṭhik onkage ape hõ aperen bạhuko dulạṛkope.

^26-27 Mạsiyakʼ monsubạ do hoyokʼ kana jemon uni do acʼakʼ kathate dakʼre um saphakate onae sonot jemon acʼge apnar lạgitʼ mitʼṭecʼ ṭhonokanakʼ manḍerre samaṅ daṛeakʼ. Unre manḍerre bin dagan, se bin digdhạ se onkan jãhãnakʼge baṅ tahena, bickom ona do sonot ar niphuṭge hoyokʼa.

²⁸ Jãwãeko cetʼ leka apnarakʼ hoṛmoko dulạṛetʼkan ṭhik onkage apnarren bạhuko hõ dulạṛko lek kantakoa. Rinicʼtetʼe dulạṛedekan hoṛ do apnargeye dulạṛokʼ kana.

²⁹ Okoe hõ apnarakʼ hoṛmo do bae hirkhạwakʼa, bickom uni do acʼakʼ hoṛmoe ạsul are jotona. Onkage Mạsi hõ acʼakʼ manḍer do ạsul are jotoneda.

³⁰ Ente abon do uniyakʼ hoṛmo hạṭińko kana bon.

³¹ Sonot sostorre olakana, “Ona iạte herel hoṛ do eṅgat-apat bạgikate acʼren bạhu tulucʼ mitʼakane tahena ar unkin do mitʼ hoṛmokin hoyokʼa.”

³² Noa okoakʼ do maraṅgea, menkhan iń do Mạsi ar uniyakʼ manḍer reaṅ kathageń roṛeda.

³³ Menkhan ona katha do tahẽocoakʼge. Ape mimitʼko aperen bạhuko apnar leka dulạṛkope ar bạhu hõ onka leka acʼren jãwãeye manotema.