Ephesiko lạgitʼ Pạul Apostolakʼ ciṭhi 4 - সান্তালী বাইবেল

Mạsiyakʼ hoṛmore mitʼakan tahen

¹ Onate Probhu Isorre kạidi akanicʼ iń nehõrape kana, Isor oka lạgitʼe hohoakawatʼpe ona reakʼ lek leka colonpe.

² Apeakʼ colon do jemon purạte nindhạn ar mạ̃hir hoyokʼ. Sombhuripe ar dulạṛ monte mimitʼko tulucʼ sapahaokʼpe.

³ Ar okaṭakʼ suluke mitʼ ocoakatʼ bon ona suluk hotete sonot Jiu reakʼ midokʼ dohoy lạgitʼ kurumuṭuipe.

⁴ Isore hohoakatʼpe iạte apere eken mitʼṭecʼ asge menakʼa, mitʼ hoṛmoge menakʼa ar mitʼ sonot Jiuge menaea,

⁵ mitʼṭen Probhu Isorge menaea, mitʼ patiạuge menakʼa, ar mitʼ bạptismage menakʼa,

⁶ ar sanamkoren Isor Baba hõ onka leka mitʼ goṭenge menaea. Unige sanamko cetanre, sanamko talare ar sanamkoakʼ ontorre menaea.

⁷ Menkhan Mạsi cetʼlekae ṭhik dohoakatʼ ona soṅ hạṭiń lekage abo mimitʼko do daya dan bon ńamakada.

⁸ Onatege sonot sostorreye meneda, Uni do sermateye rakapʼenre, lạṛhại kạidikoe kạidi idiketʼkoa, ar manwako aema dane ematʼkoa.

⁹ “Uni doe beretʼena,” Noa katha khon cetʼ noage baṅ bujhạukʼ kana, Mạsi do dhạrti reakʼ latar utạrakʼkore hõe pheḍlena mente?

¹⁰ Ar okoeye pheḍlen unige sanamakʼ purạu lạgitʼ arhõ sermako khon hõ cetanteye rakapʼena.

¹¹ Unige adom do apostolko, adom do nạbiko, adom do bhage sombat porcarko ar adom do sapʼdapʼko ar cecetʼko menkateye bahalketʼkoa.

¹² Uni doe bahalketʼkoa jemon Isorren sanam hoṛko uniyakʼ sapʼdapʼ lạgitʼko sapṛaokʼ ar nonkate Mạsiyakʼ hoṛmo jemon benao rakabokʼa.

¹³ Noa reakʼ monsubạ do hoyokʼ kana, sanamkoge jemon Isorren Hoponre bon pạtiạukʼte mońjtebon baḍae daṛeae ar mitʼakae bon hoyokʼ; ar Mạsi cetʼleka sanamakʼteye perecʼge, onkage jemon abo hõ sanamakʼte bon perejokʼ. Unre gidrạ leka do ar babon tahena.

¹⁴ Bạṛicʼ bulạuakʼte eṭakʼko bhul horte idiko lạgitʼ oka bhul sikhnạtko emakokan, ona bhul sikhnạt iạte abo do hoete sokojokʼkan ḍheoko leka hante nate alo bon sokojokʼma.

¹⁵ Bickom dulạṛ monte Mạsi reaṅ sạri katha bon roṛma ar sanamakʼre hara burukʼte Mạsi leka bon hoyokʼma. Uni kangeae hoṛmo reakʼ matha do.

¹⁶ Goṭa hoṛmo do nonka tolakana je, mimitʼ hạṭińko apan ạpin jaegare tahẽkate hoṛmo tulucʼ joṛao akana. Ar mimitʼ hạṭińko tinre ṭhikleka kạmikʼa unre goṭa hoṛmoge bohokʼ reakʼ ạyurte hara idikʼa ar dulạṛte apnarre benao rakabokʼa.

Biswạsi lekate khạṭi jion khemao

¹⁷ Onateń meneda, Probhu Isor ńutumteń sikhạuetʼpe kana boṅgan hoṛ jạtrenko cetʼleka bạṛicʼ cintạ talate jionko khemaoetʼkan onka do alope khemaoa.

¹⁸ Onkoakʼ mon do ńutre menakʼtakoa. Ar ontor keṭecʼgetakote Isor reaṅ cetʼge bako baḍaekana, ar onate onko do Isorakʼ emakʼ jion khon ạḍi sạńgińre menakʼkoa.

¹⁹ Onkoakʼ bibek do goṛdho akantakoa, onate bin tirpitokʼ ahkao monte joto lekan bin napaeakʼ kạmi lạgitʼ onko do lucạ lamoṭreko capaoena.

²⁰ Menkhan Mạsire nonkan sikhnạt ape do bape ńamakada.

²¹ Ape do uni reaṅpe ańjomleda, ar uni tulucʼ midokʼte unire oka sạritetʼ menakʼ ona lekagepe cetʼ ocoakana.

²² Ar noa sikhnạtpe ńamleda je, apeakʼ pạhil cạl-colon lekaten “Mare hoṛtetʼ ” kicricʼ leka totʼ giḍikaepe, ente lilkạr reakʼ lalocte uni “Mare hoṛtetʼ ” doe bạṛijokʼkana.

²³ Ona bodolte Isorge apeakʼ mon nãwãte benao rakapʼ ocowaepe,

²⁴ ar Isore emakan “Nãwã hoṛtetʼ ” do nãwã kicricʼ leka horokʼjoṅpe. Uni “Nãwã hoṛtetʼ ” do sạriyakʼre, dhoromre ar sonotre Isor lekae sirjạu ocoakana.

²⁵ Onate eṛeakʼ do bạgi giḍiyakʼpe ar ape apere sạri kathako roṛpe, ente jotokoge mimitʼko sãote bon jopoṛaogea.

²⁶ Arpe edre emanlen khan ona edre iạte alope kạiya; apeakʼ edre do siń cando ạuriye hạsurokʼrege cabakʼtapema,

²⁷ ar Soetan hõ jãhãn ạt alope aṛakʼaea.

²⁸ Kombṛoyicʼ do ar aloe kombṛoe ma, bickom acʼakʼ nij tite bhageakʼ kạmikoreye khaṭaokʼma jemon okulạnan hoṛko em hạṭińako lạgitʼ tahentae.

²⁹ Apeakʼ moca khon bạṛicʼ roṛ do alo oḍokokʼma, bickom jạruṛakʼre eṭakʼko benao rakapʼko lạgitʼ okaṭakʼ bhageakʼkan ona kathage oḍokokʼma, jemon okoe onako ańjom onate onkoakʼ bhạlại hoyokʼtako.

³⁰ Isorren sonot Jiu do alope mon duk ocoyea, one uni hotete Isor do chaḍaokʼ reakʼ din hạbicʼ apeye mohor chap dohoakatʼpe.

³¹ Sanam lekan hewer haṛhatʼ, edre, raṅgao, kạumạu ar opoman, dusṭạmi, ar sanam lekan hiskạ ape khon sahaṛ akan tahenma.

³² Ape apere mãyãwanko baṛe hoyokʼpe, eṭakʼkoakʼ dukte dukokʼpe, cetʼleka Isor do Mạsi hoteteye ikạ akatʼpe onkage ape hõ ape apere ipikạkʼpe.