Ephesiko lạgitʼ Pạul Apostolakʼ ciṭhi 2 - সান্তালী বাইবেল

Gujukʼ khon jionte

¹ Bebatao ar kại iạte ape do gocʼgepe tahẽkana.

² Dhạrti reakʼ cạli leka ape hõ pạhil do bebatao ar kạirepe dãṛãnkan tahẽkana. Ar okoeṭakʼ jiu doe hoe reakʼ etkiạriren rajkan uni bạṛicʼ jiuge Isorren bebatao hoṛko talareye kạmikana, ar ape do uni jiugepe pańjayede tahẽkana.

³ Abo sanamkoge abo do aboakʼ jel reakʼ sana bon purạuetʼ tahẽkante onko hoṛko talare mitʼ okte jion bon khemaoetʼ tahẽkana. Ar jel khon okako sana ar hudisko rakabokʼkan tahẽkan ona lekage bon kạmikan tahẽkana. Noa colon iạtege abo hõ eṭakʼko leka Isor ṭhen khon sạjại ńam lek hoṛ bon tahẽkana.

⁴ Menkhan Isor do mãyãteye perecʼgea; uni do ạḍiye dulạṛetʼ bona.

⁵ Ar bebatao iạte tinre gocʼge bon tahẽkana unre Mạsi sãote uni doe jiwetʼketʼ bona. Isorakʼ dayate ape do kại khon bańcaope ńamakada.

⁶ Abo do Jisu Mạsire bon kolom mitʼ akante Isor do Mạsi tulucʼe jiwetʼketʼbona ar Mạsi sãotege sermareye duṛupʼ akatʼbona.

⁷ Uni do noae kạmikeda jemon acʼakʼ bin mucạtʼ daya darakan jugkoreye udukʼ daṛeakʼ. Uni do Mạsi Jisu hotete aboreye dayayente okaṭakʼe kạmiakatʼ onatege uniyakʼ noa daya do sodor akana.

⁸ Ente dayatepe bańcao akana biswạste. Ar ona do ape khonakʼ do baṅ, ona do Isorakʼ dan kana.

⁹ Noa do kạmiteakʼ jo lekate hõ baṅ emakana, jemon okoege aloko sarhaokʼ.

¹⁰ Abo do Isorakʼ tite bon benao akana. Isor do Jisu Mạsi sãoteye joṛaoketʼbonte nãwãteye sirjạuketʼ bona jemon bhageakʼko bon kạmi. Uni do noa bhage kạmi laha khongeye ṭhik dohoakatʼ tahẽkana, jemon ona kạmikote jion bon khemao.

Mạsire do sanamgeko mitʼgea

¹¹ Janam secʼ lekate ape do boṅgan hoṛ jạtrenko kanape. Ar okoe titeko khatna ocoakan, metakʼme apnarte khatna akan hoṛ menteko ńumogokʼkan onko do bin khatna hoṛ menteko metapekana.

¹² Disạipe, lahate ape do Mạsi khon begargepe tahẽkana; jạtrenko lekate Israelkoakʼ oka ạidạri menakʼ ona ạidạri khon bahrerepe tahẽkana; Isor do Israel jạtrenko lạgitʼ okae gokʼ dohoakatʼ tahẽkan ona sãote apeakʼ jãhãn bondobos baṅ tahẽkana; ar noa dhạrtire ape do Isor chaḍagepe tahẽkana.

¹³ Mitʼ jokhecʼ ape do sạṅgińrepe tahẽkana, menkhan Mạsi Jisurepe kolom mitʼakante ńitokʼ do uniyakʼ mãyãm ṭhenpe ạgu ocoakana.

^14-15 Unikangea aboren sulukicʼ do. Unige Jihudi ar be Jihudi, noa banare mitʼ akada. Uni do acʼe kuruslen hoṛmo hotete sanam hukum ar niạm sudhạ Moseyakʼ ạn-ạriko reakʼ daṛeye rạputʼkeda. Ar nonkate noakin banar talare okaṭakʼ do bạiri bhit leka tahẽkan onae lạnduṛ giḍikada. Uni doe nonkakeda jemon unkin hotete mitʼṭen nãwã manwae sirjạue, ar nonkate unkin talare jemon suluk hoyokʼ.

¹⁶ Uniyakʼ monsubạ do tahẽkana jemon, acʼakʼ kurusteakʼ gujukʼte ona banar mitʼkate Isor tulucʼ arhõe mitʼ ruạṛ daṛeakʼ, ente noa banar talare oka bạiri leka tahẽkan, ona do acʼakʼ kurusteakʼ gujukʼ hoteteye maraokeda.

¹⁷ Ape okoe sạṅgińrepe tahẽkan ar onko okoe do sorreko tahẽkan, jotoko ṭhenge uni do hecʼkate suluk reakʼ bhage sombate porcarleda.

¹⁸ Uni hotete ini mitʼ sonot Jiure Baba ṭhen calakʼ reakʼ ạidạri do sanamkoakʼ menakʼ tabona.

¹⁹ Onate bin opromko dope baṅkana, ar bedisiạko hõpe baṅkana; menkhan Isorren hoṛkoakʼ oka ạidạri menakʼ ape hõ onko sãote ona ạidạripe ńam akada ar Isor gharońjrenpe hoyakana.

²⁰ Apostol ar nạbiko do rehetʼ kanako, ar ona rehetʼren konac dhiri do Jisu acʼtetʼ kangeae. Ar ona rehetʼ cetanrege ape dope gathao ocoakana.

²¹ Mạsi tulucʼ kolom mitʼ akante dolan reakʼ goṭa hĩsge mitʼ sãote jopoṛao akante Probhu Isorakʼ tahen lạgitʼ mitʼṭecʼ sonot oṛakʼ benao rakabokʼ kana.

²² Ape do uni tulucʼgepe kolom mitʼakana ar onate ape hõ mitʼ sãotepe gathao rakapʼ ocokʼkana, jemon sonot Jiu hotete Isorakʼ mundilpe hoydaṛeakʼ.