Dosar Biboron 9 - সান্তালী বাইবেল

Israelkoakʼ bebatao

¹ “E Israelko, ańjompe, okoe jạtrenko ape khon lekhareko ḍherge ar daṛe hõko daṛege ar onkoakʼ serma ṭuṅgạu usul pạcriko ar maraṅ maraṅ nagrahako ńitokʼ ape do onako dokhol lạgitʼ jordan gaḍape parom lạgidokʼkana.

² Onḍenko hoṛ doko Anakiko kana; onko doko usul usulgea arko daṛeangea. Ape do Anakiko reaṅ hõpe baḍaegea; ar noa katha hõpe ańjomakada, ‘Anakiko upạrte teṅgokʼ lạgitʼ nonkan cele jạtrenkoge bạnukʼkoa mente.’

³ Menkhan ape do niạ katha baḍae dohokakʼpe, aperen Probhu Isor do ḍahao maraoakʼ seṅgel leka ape lahate jordan gaḍae parom maṛaṅokʼ kana. Unige onkoe kạbukoa are marao utạrkoa; unige ape ṭhene bhagao ocokoa; Ar Probhu Isor ape ṭhen oka as reakʼ kathae emakan onkage uni doe laga ńirkoa ar thoṛa ghạṛicʼtegeye marao utạrkoa.

⁴ “Aperen Probhu Isor do ape samaṅ khon onkoe laga ńirko tayom aperen okoehõ jemon mone monte aloko menma, ‘iń doń bindusạngete Probhu Isor do noa disạm ạidạri lạgitʼ nonḍeye ạguakadińạ.’ Ona do sạriyakʼ do baṅkana; noko jạtren hoṛkoakʼ dusṭạmi iạtege Probhu Isor do ape samaṅ khone laga ńirko lạgidokʼ kana.

⁵ Ar bindusạn se dhorom iạte onkoakʼ disạm ạidạri lạgitʼpe calakʼ kana ona do baṅa bickom aperen Probhu Isorge aperen hapṛam Abraham, Isahak ar Jakob ṭhen kiriạkate okaṭakʼe menletʼ ona purạu lạgitʼge uni do noko jạtrenkoakʼ dusṭạmi iạte ape samaṅ khone laga ńirkoa.

⁶ Onate baḍae dohokakʼpe, apepe bindusạngete Probhu Isor do niạ mońj disạm ạidạri lạgitʼe emapekana ona do baṅa. Ente ape do mitʼṭen keṭecʼ hoṭokʼan jạtrenko kanape.

Sonaren mĩhũ

⁷ “Hahaṅkarre aperen Probhu Isorakʼ edre cetʼlekape rakapʼ ocoletʼtaea ona baṛe disạipe, ar tishõ alope hiṛińa. Misor disạmpe bạgi oṭowakʼ hilokʼ khon nonḍe seṭerokʼ hạbicʼ ape do Probhu Isor birudrepe ṭhok ạguakada.

⁸ Horeb ṭhen Probhu Isorakʼ edrepe rakapʼ ocoletʼtae jokhecʼ uni do ape marao giḍikapeye menleda.

⁹ Ar Probhu Isor okaṭakʼ bondobos ape lạgitʼe dohoakatʼ ona bondobos olakatʼ dhiri paṭakin hatao lạgitʼ iń do buru coṭre pongel siń ar pongel ńindạń tahẽkana. Unre iń do dakʼ hõ bạń ńũleda ar piṭhạ hõ bạń jomleda.

¹⁰ Probhu Isor do acʼakʼ nij tite olakʼ nonkan barea dhiri paṭa tinreye emadiń tahẽkana, unre ape sanamkoge Probhu Isor samaṅrepe jarwa akan tahẽkana ar enhilokʼ uni do seṅgel tala khon okako hukum ape ṭhen burureye sodorketʼ onage onakin dhiri paṭare ol tahẽkana.

¹¹ “Ar pongel siń ar pongel ńindạ paromen khan Probhu Isor do ona bondobos olakʼ dhiri paṭakine emadińạ.

¹² Ona tayom uni doe metadińa, ‘ar alom biloma ńitge latarte pheḍ calakʼme, ente okoeko hoṛ Misor disạm khonem oḍok ạguakatʼko onko do bạṛicʼ horteko mohnḍa akana. Oka horte calakʼ lạgitʼ iń hukumatʼko tahẽkan ar inạkʼtege onko do eṭakʼ secʼko ghańjeṛ akana ar sewae lạgitʼ dulakʼ muṭhạnko benao akawana.’

¹³ “Probhu Isor do arhõe metadińa, ‘iń do noko hoṛkoń ńelakatʼkoa; noko do keṭecʼ hoṭokʼan jạtren kanako.

¹⁴ Ar alom tạkicʼ daramińạ; onko doń marao utạrkoa ar dhạrti khon onkoakʼ ńutumiń meṭao utạrtakoa. Ar ona tayom do am hotete arhõ daṛean ar maraṅ mitʼṭen jạtrenkoń sirjạukoa.’

¹⁵ “Inạ tayom iń do buru khoniń pheḍ hecʼena; unrehõ burure seṅgel do jolokʼkan tahẽkangea, ar ińakʼ tire do bondobos olakʼ dhiri cạktikin tahẽkana.

¹⁶ Iń doń ńelkeda, ape do aperen Probhu Isor upạrtepe kại akada; ar sewae lạgitʼ dulicʼ mĩhũ muṭhạnpe benao akawana. Probhu Isor okaṭakʼ horte taṛam lạgitʼe hukum akawatʼpe inạkʼtege ape do eṭakʼ secʼpe ghańjeṛ akana.

¹⁷ Onate iń do ona dhiri cạktikin ińakʼ ti khoniń giḍikada. Ar apeakʼ mẽtʼ samaṅre onakin do rạputʼena.

¹⁸ “Probhu Isorakʼ mẽtʼãhã samaṅre nonkanakʼ kạikate ape do uniyakʼ edrepe rakapʼ ocoketʼtaete iń do lahate leka arhõ pongel siń ar pongel ńindạ Probhu Isor samaṅre ikhṛum hapegeń tahẽyena; dakʼ se piṭhạ cetʼge bạń jom ńũleda.

¹⁹ Iń do Probhu Isorakʼ edre iạteń botorena, ente marao giḍikape leka uni doe edre seṅgellena. Menkhan niạ dhao hõ Probhu Isor do ińakʼ kathae ańjomkeda.

²⁰ Aron marao giḍikae reakʼ edre hõ rakapʼade tahẽkana menkhan ona jokhecʼ Aron lạgitʼ hoń nehõrlena.

²¹ Apeakʼ ona kại reakʼ jinisko, metakʼme aperen benaoicʼ uni mĩhũ hataokate seṅgelreń khadlekadea. Ar ona tayom doń koṭecʼ gejerkedete dhuṛi lekań lopotʼ lopotʼkeda ar buru khon ạtu pheḍokʼkan dakʼreń giḍikada.

²² “Ape do Taberare, Masare, Kibrotre, ar Hatawarehõ Probhu Isorakʼ edrepe rakapʼ ocoletʼtaea.

²³ Probhu Isor do Kades Barnea khonpe mohnḍakʼ jokhecʼe metatʼpe tahẽkana, ‘okaṭakʼ disạmiń emape lạgidokʼkan onḍe senkate ona baṛe ạidạri joṅpe.’ Menkhan ape do aperen Probhu Isorakʼ hukum upạrtepe ṭhokkeda. Ape do Probhu Isor hõ bape pạtiạuadea, ar uniyakʼ katha hõ bape luturada.

²⁴ Iń do ape tis khoniń baḍae akatʼpe un khongeń ńelakada, ape do Probhu Isor upạrtepe ṭhok ạguakada.

²⁵ “Probhu Isor do marao giḍipe reakʼ kathae menletʼ iạte iń do pongel siń ar pongel ńindạ Probhu Isor samaṅre ikhṛum akaniń tahẽkana.

²⁶ Ar uni ṭhen noa menkateń koeleda, ‘E Probhu Isor am do amren hoṛko alom marao giḍikoa. Ente onko do amren hoṛ kangeako ar amge amakʼ maraṅ daṛetem chaḍao akatʼkoa ar amakʼ daṛeanakʼ tite Misor khonem oḍok ạgu akatʼkoa.

²⁷ Amren guti Abraham, Isahak ar Jakobakʼ katha baṛe disạime. Noko keṭecʼ hoṭokʼan jạtrenkoakʼ kạṭhuạ mon ar onkoakʼ ghạṭko secʼ do alom beṅgetʼakʼa.

²⁸ Arem onkae khan oka disạm khonem oḍok ạgu akatʼle ona disạmren hoṛko mena, Probhu Isor do acʼakʼ gokʼakʼ disạmte bae idi daṛeatʼkote se onkoe kurudakokante gocʼko lạgitʼ hahaṅkarteye oḍok ạguakatʼkoa.

²⁹ Menkhan noko do amren hoṛkangeako, amakʼ sompottige okoe do amakʼ daṛeanakʼ ti tiạrkatem oḍok ạguakatʼko.’