Dosar Biboron 8 - সান্তালী বাইবেল

Probhu Isorakʼ kạmi dikʼsạ dohoy reakʼ hukum

¹ “Teheń okako hukum iń emapekan ona reakʼ mitʼke mitʼ manao reakʼ luturakʼpe, jemon jiwetʼpe tahen arpe saṅge idikʼ ar Probhu Isor aperen hapṛamko ṭhen okaṭakʼ disạm emape lạgitʼ kiriạkateye gokʼletʼ onḍe bolokate onape ạidạri daṛeakʼ.

² Disạipe, aperen Probhu Isor do pongel bochor hạbicʼ hahaṅkarreye dãṛã ạyur ocoketʼpea mente. Apeakʼ bạḍạiko rạpudtape lạgitʼ ar monre menakʼtapeakʼ, metakʼme uniyakʼ hukumkope manaoa se baṅa, ona biḍạu aṭkarpe lạgitʼ uni do noae kạmi akada.

³ Uni doe nindhạn ocoketʼpea, reṅgecʼ ocoketʼpea ar Mannae jom ocoketʼpea one ona reakʼ katha ape ar aperen hapṛamkoakʼ baḍae baṅ tahẽkan. Onate niạ sikhnạte emapekana, manwa do eken piṭhạ motote jiwetʼ bako tahena, menkhan Probhu Isorakʼ moca khon oḍokokʼkan mitʼke mitʼ kathatege jiwetʼko tahena.

⁴ Niạ pongel bochorre apeakʼ hoṛmo reakʼ kicricʼko hõ baṅ marelena ar jaṅga hõ baṅ bharaolentapea.

⁵ Ar niạ katha apeakʼ ontorre baḍae dohokakʼpe, baba cetʼleka hopone ḍanṭaoe onkage aperen Probhu Isor hõ apeye ḍanṭaopea.

⁶ “Ape do aperen Probhu Isorakʼ hukumpe manaotaea, ar uniyakʼ hortepe taṛama ar unipe sewawaea.

⁷ Aperen Probhu Isor oka mońj disạmteye ạyur aderetʼpe onḍe do buru ar lodamkore bhumbukokʼ ḍạḍi ar dakʼ nalako menakʼa.

⁸ Onḍe do guhumko, jaoko, darkha joko, loa dareko, ḍạlim dareko, jạitun dareko ar dumur rasako menakʼa.

⁹ Ona disạmre do ḍher jomakʼpe ńama ar okaṭakʼ reakʼ okulạn hõ baṅ tahentapea. Onḍenakʼ dhirire do mẽṛhẽtʼ menakʼa. Ar onḍenakʼ buru khon tambape la rakapʼ daṛeakʼa.

¹⁰ “Onḍe do jom-ńũkatepe tirpitokʼa ar aperen Probhu Isorakʼ emakʼ ona mońj disạm lạgitʼ unipe sarhaoea.

¹¹ Sontor akae tahenpe teheń uniyakʼ okako hukum ar niạmkoń emapekan onako bebatao iạte aperen Isor do alope hiṛińea.

¹² Ar sontor akae bape tahen, enḍekhan tinre jom ńũkatepe tirpitokʼa ar napae napae oṛakʼ duạr benaokatepe girobasokʼa,

¹³ unre aperen palren ḍaṅgrako, meromko, bhiḍikoko saṅge idikʼtapea ar aema sona-rupạ hoyokʼtapea ar jotowakʼ ḍherokʼtapea,

¹⁴ Unre ape do bạḍại iạtepe phulạukʼa ar golam oṛakʼ khon okoeye oḍok ạgu akatʼpe uni aperen Isorpe hiṛińea.

¹⁵ Uni do maraṅ ar botoranakʼ hahaṅkar secʼte, seṅgel biń ar kidiń kaṭkomko talate ar khaṅgoṭ jaega secʼteye taṛam ạgu ocoketʼpea. Uni do dhiri khon ape lạgitʼ dakʼe oḍok ocokeda.

¹⁶ Uni do hahaṅkarre Mannae jom ocoketʼpea, ona reakʼ katha aperen hapṛamko do bako baḍaekan tahẽkana. Ape biḍạu aṭkarpe ar apeakʼ bạḍại rạpudtape lạgitʼ uni do onae ematʼpe tahẽkana jemon mucạtʼ hạbicʼ apeakʼ bhạlại hoyokʼtapea.

¹⁷ Ape do mone montepe menkea, ‘ińakʼ nij daṛete, ińakʼ tite kạmikate niạko dhon doń hoyocoakada.’

¹⁸ Menkhan aperen Probhu Isorakʼ katha do alope hiṛińa; unige niạko hoyocoe reakʼ daṛeye emakatʼpea, ar nonkage uni do aperen hapṛamko ṭhen oka bondobos reakʼ katha kiriạkateye menletʼ ona do ńitokʼe purạu lạgidokʼ kana.

¹⁹ “Ar jãhãtisokʼ aperen Isor hiṛińkate debotako secʼpe ạcurokʼte onkope sewawako, enḍekhan teheń ape upạrte noa katha do khạṭitegeń roṛeda, ape dope marao utạrokʼa.

²⁰ Probhu Isor do ape samaṅre jạtrenkoe marao giḍi akatʼko leka Probhu Isorakʼ bebatao iạte ape hõpe marao utạrokʼa.