Dosar Biboron 7 - সান্তালী বাইবেল

Eṭakʼ jạtrenko reaṅ hukum

¹ “Ape okaṭakʼ disạm ạidạri joṅ lạgitʼpe calakʼkan onḍe do aperen Probhu Isorgeye idipea ar ape samaṅ khon ḍher jạtrenkoe laga ńirkoa. Onko doko hoyokʼkana Hittirenko, Girgasirenko, Amorirenko, Kananrenko, Pherisirenko, Hiwirenko ar Jebusirenko. Noko eae jạtrenko doko saṅgegea ar daṛete hõ ape khonko daṛegea.

² Ar aperen Probhu Isor do tinre apeakʼ tireye jimạkoa unre sanamkope marao utạrkoa. Onko sãote jãhãn bondobosge alope dohoya ar onkore daya hõ alope dayakʼa.

³ Onko sãote baplakʼ reakʼ hõ alope bondobosa. Aperen kuṛiko hõ onkoren hoponko alope emakoa ar onkoren kuṛiko hõ aperen hoponko lạgitʼ alope ạgukoa,

⁴ ente onko kuṛiko do iń ṭhen khon aperen hoponkoko pharakkoa ar onkoren debotako sewa ocokoa. Onate Probhu Isorakʼ edre seṅgel do ape upạrte jolokʼa ar apeye marao utạrpea.

⁵ Ape do onko jạtrenkoakʼ pinḍkope rạputʼ giḍikatakoa, ar pujạ reakʼ dhirikope gejertakoa, Asera khunṭiko hõpe rạputʼ giḍikatakoa ar boṅga muṭhạnko do seṅgelrepe khadle giḍikakoa.

⁶ Ente ape do nonkan mitʼṭen jạtrenko kanape aperen Isor ńutumtepe begar doho ocoakana. Ape do jemon Probhu Isorren hoṛ ar uniren sompottipe hoyokʼtae onate dhạrtiren sanam jạtrenko tala khone bachao akatʼpea.

⁷ “Eṭakʼ jạtrenko khonpe ḍherge iạte Probhu Isor do apeye dulạṛ akatʼpea seye bachao akatʼpea ona do baṅa, ente eṭakʼ jạtrenko khon apeakʼ lekha do thoṛagea.

⁸ Uni doe onka akada apere uniyakʼ dulạṛ iạte ar aperen hapṛamko ṭhene kiriạlen iạte. Ar onate uni do acʼakʼ daṛeanakʼ titeye oḍok ạguakatʼpea ar Misorren Pharao rajakʼ ti khon ar golam oṛakʼ khone chaḍao akatʼpea.

⁹ Onate baḍae dohokakʼpe, aperen Probhu kangea Isor do. Uni doe pạtiạrangea; okoe uniko dulạṛe ar uniyakʼ hukumko manao onko lạgitʼ uni okae bondobos akatʼ ona do hajar piṛhi hạbicʼe rukhiyạyea ar onkoe dulạṛkoa.

¹⁰ Menkhan okoe uniko kurudaekan onkoe doe hala ruạṛakoa are marao giḍikoa; ar ona onkae lạgitʼ do bae biloma.

¹¹ Onate teheń ape okako hukum ar niạmko ar bicạrkoń emapekan ona do joton salakʼ manaope.

Bhor ar gokʼakʼ reaṅ

¹² “Ar niạko niạm secʼpe moneyakʼ ar joton salakʼ onape manao, enḍekhan aperen Probhu Isor do aperen hapṛamko ṭhen okae gokʼletʼ ar ape lạgitʼ okae bondobos akatʼ onae rukhiyạitaea are dulạṛpea.

¹³ Uni do apeye dulạṛpea, are bhorapea ar aperen hoṛkoe saṅge ocopea. Ar okaṭakʼ disạm emokʼ lạgitʼ aperen hapṛamko ṭhene gokʼletʼ tahẽkan ona disạmteye aderpea. Onate aperen do ḍher hopon ar hoponerako hoyokʼtapea, ar apeakʼ jumi khon ḍher anajko, darkha rasako ar sunumkope ńama, ar aperen bhiḍi, merom, ḍaṅgrako hõ ạḍi ḍherko hoyokʼtapea.

¹⁴ Ape do eṭakʼ hoṛko khon ḍher bhorpe ńama. Aperen okoe hõ bạńjhi do bako tahena ar aperen ạsul janwarko hõ bańjhi do bako tahena.

¹⁵ Probhu Isor do sanam lekan rog bighin khone rukhiyạpea. Misorre oka botoranakʼ rog bighinkope ńelakatʼ onako ape cetanre bae paṛao ocoya, menkhan okoe apeko kurudape onko cetanre uni do noakoe paṛao ocoya.

¹⁶ Aperen Probhu Isor apeakʼ tire okoe jạtrenkoe jimạko onko dope marao utạrkoa. Onko do daya hõ alope dayawakoa ar onkoren debotako hõ alope sewawakoa, ente ona do apeakʼ jhampa lekako hoyokʼa.

¹⁷ “Ape dope hudiskea, ‘noko jạtrenko do abo khon hõko saṅgegea; ar cekate onko dobon laga ńir daṛekekoa?’

¹⁸ Menkhan ape do alope botorakoa. Pharao ar goṭa Misor disạm cetanre aperen Probhu Isor okae cekaletʼ ona baṛe disạipe.

¹⁹ Aperen Probhu Isor do botoranakʼ biḍạu hotete, hahaṛa kạmi ar cinhạko hotete ar acʼakʼ daṛeanakʼ tite apeye oḍok ạguketʼpe ona do apeakʼ mẽtʼtegepe ńelakada. Ar ńitokʼ okoe jạtrenko ńeltepe botorokʼkan onko cetanrehõ unigeye onkaea.

²⁰ “Inạ tayom onko modren okoeko jiwetʼko tahen ar ape khon okore okoeko tahen onko talare aperen Probhu Isor do ńele hõe kolkoa ar onko sanamko marao utạrokʼa.

²¹ Ape do alope botorakoa, ente aperen Probhu Isor do ape talare menaea, uni doe maraṅgea are botorangea.

²² Aperen Probhu Isorge ape samaṅ khon onko jạtrenko bại bạiteye laga ńirkoa. Onko sanamko mitʼdomte alope laga ńirkoa, ar baṅ khan ape beṛhaeten bir janwarko baḍhaokʼa.

²³ Aperen Probhu Isor do apeye soprotapea onko ạuriko marao utạrokʼ hạbicʼ.

²⁴ Onkoren raj do apeakʼ tireye jimạyea ar ape do onkoakʼ ńutum dhạrti khonpe meṭao utạrtakoa. Cele hõ bako teṅgo daram daṛeapea; ape dope marao cabakoa.

²⁵ Onkoren boṅga muṭhạnko do seṅgelrepe khadle giḍikakʼa. Ar onkoakʼ hoṛmo reakʼ sona, rupạ do alope lalocakʼa. Ar ape lạgitʼ hõ alope hataoa, ente onape onkae khan onakoge apeakʼ jhampa leka hoyokʼa. Ar aperen Isor ṭhen hõ ona do hirkhạwanakʼ jinis kana.

²⁶ Jãhãn hirkhạwakʼ jinisko oṛakʼte alope adera. Onako do mon ar ontorte hirkhạwakʼpe ar giḍikakʼpe, ente onako cetanre do maraokʼ reakʼ sarap menakʼa. Ar oṛakʼtepe ader khan ape cetanre hõ sarap paṛaokʼa.