Dosar Biboron 6 - সান্তালী বাইবেল

Probhu Isorakʼ maraṅ hukum

¹ “Aperen Probhu Isor do niạko hukum ar ạn-ạriko cetʼape lạgitʼ ińe hukum akawadińạ, jemon jordan gaḍa paromkate okaṭakʼ disạm ạidạri lạgitʼpe calakʼkan onḍe onape manao idiy.

² Onate ape ar aperen hoponko, goṛom gidrạko do Probhu Isorpe botoraete uniyakʼ noa hukum ar ạn-ạriko jiwetʼ jonompe manao idite ḍher din jiwetʼpe tahena.

³ E Israelko, ape do ińakʼ katha ańjompe ar sontor akae tahente noako manaope, jemon toa ar dumur rasa ạtukʼkan disạmre senkate aperen hapṛamkoren Probhu Isorakʼ gokʼakʼ lekate apeakʼ bhạlại hoyokʼtape ar lekharepe saṅge idikʼ.

⁴ “E Israelko ańjompe, aboren Probhu Isor doe mitʼ goṭengea.

⁵ Ape do apeakʼ goṭa ontorte, goṭa jiwite, goṭa daṛete aperen Probhu Isor dulạṛepe.

⁶ Niạko hukum okaṭakʼ do teheń apeń emapekan ona do apeakʼ ontorre rebetʼ dohokakʼpe.

⁷ Ar aperen hoponko hõ ghane ghạṛicʼ onako cetʼakope. Oṛakʼrepe duṛupʼkokʼre, horte calakʼre, gitijokʼre ar aṭetʼ khon beredokʼre ape do niạkope cetʼakoa.

⁸ Ar dikʼsạ dohoy reakʼ cinhạ lekate ona do apeakʼ tirepe tolkakʼa ar mạndạli leka cạndirepe dohoya.

⁹ Apeakʼ oṛakʼ duạr reakʼ kapaṭre ar phaṭok duạrre onakope ol dohokakʼa.

¹⁰ “Aperen hapṛamko Abraham, Isahak ar Jakob ṭhen aperen Probhu Isor do kiriạkate okaṭakʼ disạm emokʼ lạgitʼe gokʼakawatʼpe onḍe uni doe idipea. Onḍe do maraṅ ar napae napae nagrahako menakʼa okaṭakʼ ape bape benao akatʼ,

^11-12 nokan bhage bhage jiniskote perecʼ oṛakʼ-duạrko ar okako jinis apnarte bape arjao akatʼ, dakʼ ḍạḍiko oka bape benao akatʼ ar nonkan darkha khetko ar jạitun bagwanko one onako reakʼ dareko bape rohoe akatʼ. Menkhan jom-ńũkate onḍe sontor akae tahenpe ar Probhu Isor do alope hiṛińea, one okoe do Misor disạm khon golam oṛakʼ khone oḍok ạgu akatʼpe.

¹³ “Ape do aperen Probhu Isorpe ḍobokʼaea, ar eken uni eskargepe sewawaea ar uni ńutumtegepe kiriạkʼa.

¹⁴ Ape aḍepasere menakʼko eṭakʼ eṭakʼ jạtren debotako do alope pańjakoa,

¹⁵ ente ape talare aperen okoe Isor menae uni do ãṭicʼ Isor kanae; ar debotakope pańjaleko khan uni do ape upạrteye edre seṅgelokʼa, ar dhạrti khone marao giḍikapea.

¹⁶ Aperen Probhu Isor do alope biḍạuea, cetʼleka Mesarepe biḍạu aṭkarlede.

¹⁷ Aperen Probhu Isor oka hukumko ar sontor tahen reakʼ katha ar niạmkoe emakan ona do khạṭige manao hoyokʼtapea.

^18-19 Ar jemon bhạlại hoyokʼtape onate Probhu Isorakʼ mẽtʼre okaṭakʼ do ṭhik ar bhageakʼkan onape kạmiya. Onate Probhu Isor do aperen hapṛamko ṭhen kiriạkate okaṭakʼ mońjakʼ disạm emokʼ reakʼ kathae gokʼletʼ, ona disạmte senkate onape ạidạri daṛeakʼa ar Probhu Isor okae menakatʼ onkage ape samaṅ khon bạirikope laga ńir daṛeakoa.

²⁰ “Tayom daram dinkore aperen hoponko tinreko kulipea, ‘aboren Probhu Isorakʼ noako sontorokʼ reakʼ katha, niạm ar hukumkope em ocoakan onako reakʼ mane do cetʼ kana?’

²¹ Unre onkope metakoa, ‘Misor disạmre abo do Pharaoren golam bon tahẽkana, menkhan Probhu Isor do acʼakʼ daṛeanakʼ tite onḍe khone oḍok ạguakatʼ bona.

²² Probhu Isor do aboakʼ mẽtʼ samaṅre Pharao ar uniyakʼ oṛakʼren sanamko cetanre ar Misor disạm cetanre maraṅ ar botoranakʼ cinhạko ar hahaṛa kạmikoe kạmileda.

²³ Menkhan onḍe khon uni doe oḍok ạguakatʼ bona jemon aboren hapṛamko ṭhen oka disạm emokʼ reakʼe gokʼletʼ ona disạme emabon.

²⁴ Teheń leka jemon jao okte aboakʼ bhạlại hoyokʼ ar jiwetʼbon tahẽ daṛeakʼ onate Probhu Isor do noako niạm pańjae ar uni sewawae reakʼe hukum akada.

²⁵ Ar aboren Probhu Isor samaṅre uniyakʼ hukumleka noa ạn-ạriko pańjae reakʼ monsubạ tahen tabon, enḍekhan onage abo lạgitʼ dhorom do hoyokʼa.