Dosar Biboron 5 - সান্তালী বাইবেল

Gel Hukum

¹ Mose do sanam Israelko hohoatʼkoteye metatʼkoa, “E Israelko, teheń ape ṭhen okako niạm ar hukumiń sodoretʼkan ona baṛe ańjompe. Ar onako cetʼ dohokakʼpe ar joton salakʼ manao idiype.

² Aboren Probhu Isor do Horeb burure abo lạgitʼ mitʼṭecʼ bondobose doholeda.

³ Ona bondobos do aboren hapṛamko ṭhen bae emlena, menkhan abo ṭhen, metakʼme teheń okoe do nonḍe jiwetʼ menakʼbon abo sanamko ṭhenge.

⁴ Probhu Isor do ona buru cetanre seṅgel tala khon abo samaṅre kathae roṛleda.

⁵ Unre seṅgel botorte buru coṭte bape rakapʼlente iń do Probhu Isor ar ape talare teṅgokate uniyakʼ katha ape ṭheniń sodorleda. Unre Probhu Isor doe menleda,

⁶ ‘Ińge Probhu amren Isor. Misor disạm khon golam oṛakʼ khon ińgeń oḍok ạguakatʼmea.

⁷ ‘Iń samaṅre eṭakʼ Isorko aloko tahentam ma.

⁸ ‘Sekʼwae lạgitʼ jãhãn muṭhạnko alom benaojoṅa, baṅ do coṭ sermarenko reakʼ baṅ do otrenko reakʼ baṅ do ot latar dakʼrenko reakʼ.

⁹ Onako do alom ḍobokʼakʼa, ar sewa hõ alom sewawakʼa, ente iń Probhuge amren Isor do. Iń do ińakʼ paona bhoktiń khojkana. Okoeko kurudạń onkoakʼ kại reakʼ sạjại do onkoren hoponko ṭhen pe pon piṛhi hạbicʼ iń pańja halawako kana.

¹⁰ Menkhan okoe ińko dulạṛiń ar ińakʼ hukum lekako calakʼ onko do hajar piṛhi hạbicʼ iń dayawakoa.

¹¹ ‘Amren Probhu Isorakʼ ńutum ạuṛi pạthạuṛi do alom ńumtaea. Ente okoeye onkae Probhu Isor do uniye sạjạiyea.

¹² ‘Aperen Probhu Isor cetʼ lekae hukum akatʼme onkage jirạukʼ mãhã disạime ar ona sonotme.

¹³ Hapta reakʼ turui dinem khaṭaokʼa ar amakʼ jotowakʼem kạmiya,

¹⁴ menkhan eae din hilokʼ do amren Probhu Isor ńutumte mitʼṭecʼ jirạukʼ din kana. Enhilokʼ do am ar amren hopon ar hoponerako, amren guti kạ̃ṛmĩko, amren ḍaṅgra, se gadha se eṭakʼ jãhãn janwarko se amakʼ ato se nagrahare girobasokʼ kan eṭakʼ jạtren hoṛko, okoe hõ cetʼge alope kạmiya. Onate amren guti ar kạ̃ṛmĩ hõ am leka jirạuko ńama.

¹⁵ Disạime, amhõ Misor disạmre guti se kạ̃ṛmĩm tahẽkana ar amren Probhu Isor do acʼakʼ daṛeanakʼ tite onḍe khone oḍok ạgu akatʼmea. Ona iạte uni do jirạukʼ mãhã manao reakʼ hukume em akatʼmea.

¹⁶ ‘Amren Probhu Isorakʼ hukum bataotaeme ar amren gogo ar baba ganaokinme. Enḍekhan Probhu Isore emam disạmre ḍher din jiwetʼem tahena ar bhạlại hoyokʼtama.

¹⁷ ‘Alom khũna.

¹⁸ ‘Alom laṭghaṭa.

¹⁹ ‘Alom kombṛoya.

²⁰ ‘Okoe upạrte hõ eṛe goha alom ema.

²¹ ‘Jãhãe hoṛren bạhu alom lalocaea. Ar eṭakʼ hoṛakʼ oṛakʼ duạr, jaega-jumi, guti-kạ̃ṛmĩ, daṅgratae se gadhatae se am aḍepaseren hoṛakʼ jãhãnakʼge alom lalocakʼa.’

²² “Probhu Isor do noako hukum ona buru cetanre seṅgel, rimil ar kaṛaṅ ńut khon sanamko ṭhen ãṭ aṛaṅteye sodorleda. Ona chaḍa uni do ape ṭhen ar jãhãnakʼ bae menleda. Tayomte uni do barea dhiri reakʼ paṭare onako olkate ińe emadińạ.

²³ “Enhilokʼ buru jolokʼkan tahẽkanre ar dhũnd tala khon uniyakʼ aṛaṅpe ańjom tiyokʼketʼre aperen sanam gusṭikoren sordarko ar murubbiko do iń ṭhenko rakapʼ hecʼlena.

²⁴ Unre ape dope menleda, ‘aboren Probhu Isor do acʼakʼ ṭhonok ar daṛeye ńel ocoketʼbona ar seṅgel tala khon uniyakʼ aṛaṅle ańjomakada. Teheń ale dole bujhạu daṛeakʼkana, Isor jãhãe ṭhen kathae roṛle khan hõ uni do jiwetʼe tahẽdaṛeakʼa mente.

²⁵ Ado cedakʼle gocʼ giḍi ocokʼa? Niạ maraṅ daṛeakʼ seṅgel doe atar cabalea; ar ḍher ghạṛicʼ aboren Probhu Isorakʼ aṛaṅle ańjom lekhan ale dole gujukʼgea.

²⁶ Manwako modre okoe menaea, abo leka seṅgel tala khon jiwetʼ Isorakʼ aṛaṅ ańjomkate hõ jiwetʼ menaegea mente?

²⁷ Aboren Probhu Isor okae menakatʼ, ona do sorkate amge ańjom ạguiyme. Ar uni okae metam ona baḍae ocoleme; ar ale do ańjomkate ona lekagele senokʼa.’

²⁸ “Iń sãote tinre kathape roroṛkan tahẽkana unre Probhu Isor do apeakʼ kathae ańjomletʼ tahẽkana ar ińe metadiń tahẽkana, ‘noko hoṛko am cetʼko metatʼme ona joto doń ańjomakada. Onko okaṭakʼko menakatʼ onage bhagea.

²⁹ Ińko botorạń ar ińakʼ sanam hukumko dohoy lạgitʼ jaejug onkoakʼ mon baṛe nonkage tahentakoma. Onate onko ar onkoren hoponko do jaejug hạbicʼ bhạlại hoyokʼtakoa.

³⁰ “‘Onko do tạmbute ruạṛ senokʼ baṛe metakom,

³¹ menkhan am do iń ṭhen nonḍe tahenme. Iń do hukumko ar ạn-ạrikoń emama okaṭakʼ do onko cetʼako hoyokʼtam, jemon ạidạri lạgitʼ okaṭakʼ disạmiń emako lạgidokʼkan onḍe onako manao idiy.’

³² “Onate aboren Probhu Isor do ape okaṭakʼ cekae lạgitʼe hukum apekan ona do joton salakʼ manao hoyokʼtapea; ar ona khon do bape ghańjeṛ daṛeakʼa.

³³ Ape jemonpe bańcao tahen, apeakʼ jemon bhạlại hoyokʼ ar okaṭakʼ disạmpe ạidạrijoṅ onḍe ḍher din jemonpe tahẽdaṛeakʼ onate aperen Probhu Isor oka horte senokʼe hukum akatʼpe ona hortege taṛampe.