Dosar Biboron 4 - সান্তালী বাইবেল

Bakʼtao reakʼ hukum

¹ “E Israelko, iń okaṭakʼ niạm ar ạn-ạriko cetʼapeń menetʼkan ona ńitokʼ ańjompe. Ape do noako manao idiy hoyokʼtapea jemon jiwetʼpe tahen ar aperen hapṛamkoren Probhu Isor okaṭakʼ disạme emape lạgidokʼkan onḍe senkatepe ạidạri joṅ.

² Iń do okaṭakʼ hukumiń emapekan ona sãote jãhãnakʼ alope juṭucʼakʼa ar ona khon jãhãnakʼ hõ alope meṭao giḍikakʼa. Ape do aperen Probhu Isorakʼ emakʼ hukumgepe manao idiya.

³ “Probhu Isor do Bakʼal-Peorre okae cekaletʼ ona ma nijạrakʼ mẽtʼtegepe ńelakatʼ. Apeko modren okoe do Peorren Bakʼal debotako sewawae kan tahẽkan aperen Probhu Isor do onko mimitʼko ape tala khone marao akatʼkoa.

⁴ Menkhan ape okoe do aperen Probhu Isorpe sapʼ dohoakade ape do sanamkoge ńitokʼ hõ jiwetʼge menakʼpea.

⁵ “Ińren Probhu Isorakʼ hukum bataokate ape hõ ạn-ạrikoń cetʼ akawatʼpea; jemon oka disạm ạidạri lạgitʼpe calakʼkan ona disạmre onape manao daṛeakʼ. Ar joton salakʼ onakope manao idiy.

⁶ Noako manao idi talate eṭakʼ jạtren hoṛko samaṅre apeakʼ bud ạkil do sodorokʼtapea. Ar noako niạm reaṅ ańjomkateko mena, ‘onko do jạtren lekate sạrigeko maraṅgea arko ạkilangea ar budan hoṛkanako.’

⁷ Nonkan ar okoe maraṅ jạtren menakʼkoa one onkoren Isor do ako ṭhenko tahenkan, cetʼleka aboren Probhu Isor bon hohowaere sorreye ńamokʼkan?

⁸ Nonkan ar okoe jạtren menakʼkoa one onkoakʼ niạm ar ạn-ạriko ape ṭhen teheń iń emakʼ niạm leka hokte perecʼge?

⁹ “Jiwetʼ jonom sontor akae tahenpe ar ape cetanre nojor dohoype jemon mẽtʼte okape ńelakatʼ ona alope hiṛiń ar apeakʼ ontor khon alope meṭao ocoy. Noako ape do aperen hoponko ar goṛom gidrạkope cetʼakoa.

¹⁰ Ar enhilokʼ reakʼ katha monre disạ dohokakʼpe oka hilokʼ Horeb burure Probhu Isor samaṅrepe hạjirlen. Enhilokʼ uni do ińe metadiń tahẽkana, ‘ińakʼ katha ańjom lạgitʼ hoṛko iń samaṅre jarwakom jemon onko do niạ dhạrtire jiwetʼ jonom ińgeko sewawạń ar onkoren hoponko hõ ińakʼ hukum reakʼko cetʼako.’

¹¹ Unre ape do ona buru latarre senkatepe teṅgolena; ar ńutte esetʼ akan buru ar dhundte perecʼ rimil do serma hạbicʼ jolokʼkan tahẽkana.

¹² Unre seṅgel tala khon Probhu Isor do ape ṭhen kathae roṛleda. Ar ape do uniyakʼ kathape ańjomkeda menkhan uniyakʼ mẽtʼãhã do bape ńelńamleda, eken uniyakʼ aṛaṅ motogepe ańjomleda.

¹³ Uni do ape ṭhen acʼakʼ bondobos, metakʼme uniyakʼ gel hukume sodorleda. Uni do ona gel hukum manao idi reakʼe metatʼpe tahẽkana ar dhiri reakʼ barea paṭareye olletʼ tahẽkana.

¹⁴ Jordan gaḍa paromkate okaṭakʼ disạmpe ạidạri lạgidokʼkan ona disạmre senkate okako niạm ar ạn-ạriko manao hoyokʼtapea ona reakʼ sikhnạt emokʼ lạgitʼ unre Probhu Isor do ińe hukumạdiń tahẽkana.

Murhutʼ sewa upạrte cehaona

¹⁵ “Horeb burure oka hilokʼ Probhu Isor do seṅgel tala khon ape ṭhene roṛletʼ enhilokʼ ape do uniyakʼ mẽtʼãhã bape ńelńamletʼtaea. Ona iạte ape do ape cetanre nońjorpe dohoya,

¹⁶ jemon bạṛicʼ horte senkate jãhãn murhutʼko alope benaokoa se jãhãn muṭhạn hõ alope benaojoṅa- baṅ do herelakʼge cetʼ baṅ do maejiuakʼge cetʼ,

¹⁷ baṅ do otren jãhãn janwarkoakʼge, baṅ do coṭren uḍạu baṛaekan cẽṛẽkoakʼge,

¹⁸ baṅ do lacʼte taṛametʼkan jiwiyankoakʼge, baṅ do dakʼren jãhãn hakokoakʼge onako cetʼge alope sewawakʼa.

¹⁹ Serma secʼ beṅgetʼkate siń-cando, ńindạ-cando ar ipilko, metakʼme coṭ sermare menakʼakʼ jiniskote apeakʼ mẽtʼ do alo baṛe bulạukʼtapema ar dhạrtiren sanam jạtrenko cetanre emakʼ aperen Probhu Isorakʼ noa jinisko reakʼ alope sewawakʼa.

²⁰ Disạipe, Probhu Isor do apeye bachao akatʼpea ar mẽṛhẽtʼ reakʼ seṅgel bhaṭa metakʼme Misor khone oḍok ạguakatʼpea jemon uniren hoṛpe hoyokʼ ar ape do ńitokʼ onagepe hoyakana.

²¹ “Ape iạte Probhu Isor do iń cetanre hõe edre akana. Uni do kiriạkateye men akada, sompotti lekate okaṭakʼ mońj disạm aperen Probhu Isor do apeye emape lạgidokʼkan, onḍe jordan gaḍa paromkate iń do bạń calao daṛeakʼ.

²² Iń do nonḍegeń gujukʼa, jordan gaḍa do bạń parom daṛeakʼa; menkhan ape do gaḍa paromkate ona mońjakʼ disạmpe ạidạri lạgidokʼ kana.

²³ Aperen Isor ape lạgitʼ okae bondobos akatʼ, ona reakʼ sontorokʼpe, ona do alope hiṛińa. Ar aperen Probhu Isore mana akatʼ jãhãn muṭhạnko alope benaojoṅa,

²⁴ ente aperen Probhu Isor doe jojom seṅgel kana; ar acʼakʼ paona bhokti lạgitʼ do ãṭokʼicʼ Isorge.

²⁵ “Ape ar aperen bõsko ona disạmre ḍher dinpe girobasokʼ tayom tinre bạṛicʼ horte senkate sewawako lạgitʼ muṭhạnkope benaojoṅa ar aperen Probhu Isorakʼ mẽtʼre oka bạṛicʼakʼkan onape onkaete unipe khĩs ocoye,

²⁶ enḍekhan teheńge iń do un okte lạgitʼ serma ar ot do ape upạrte goha dohokateń meneda, ape do jordan gaḍa paromkate okaṭakʼ disạmpe ạidạri lạgidokʼkan ona disạmre thoṛa dintegepe ses utạrokʼa. Ar onḍe ḍher din do bape girobas daṛeakʼa, khạṭigepe marao utạrokʼa.

²⁷ Probhu Isor do ạḍi lekan jạtrenko talareye chirchạtur ocopea ar okoeko talareye laga ńirpe onko talare ape do thoṛa hoṛge jiwetʼpe tahena.

²⁸ Onḍe ape do manwa tite kaṭren ar dhiriren benao muṭhạnkope sewawakoa okoe do bako ńeńel, bako ańjom, bako jom daṛeakʼ ar sãhetʼ hõ bako sãhetʼ daṛeakʼ.

²⁹ Menkhan ape do aperen Probhu Isor secʼ monpe ạcurtapea ar onate unipe ńamea, tobe apeakʼ goṭa mon, goṭa jiwi ar ontorte unipe sendrayea.

³⁰ Ar tinre kosṭorepe paṛaokʼa ar noako ape cetanre hijukʼa unre tayom daram reakʼ ona dinkore aperen Probhu Isor ṭhenpe ruạṛ hijukʼa arpe bataotaea.

³¹ Aperen Probhu Isor doe dayakʼicʼ Isor kana; uni do bae bạgiyapea se bae maraopea, menkhan kiriạkate aperen hapṛamko lạgitʼ oka bondobose dohoakatʼ ona do alope hiṛińa.

Probhu kangeae Isor do

³² “Isor do dhạrtire manwa sirjạukede tayom khon ar apeko bidạl reakʼ laha dinko khon khoj hataokate ńelpe; serma reakʼ mitʼ mucạtʼ khon eṭakʼ mucạtʼ hạbicʼ kulijoṅpe, okako hoyakan ona lekan maraṅ ar jãhãnakʼko hoyakana se baṅa, se ona lekan jãhãnakʼ ańjom akana se baṅa,

³³ se ape leka eṭakʼ jạtren hoṛko seṅgel tala khon Isorakʼ roṛ ańjomkate jiwetʼ menakʼkoa se baṅa.

³⁴ Ape do kuli joṅpe, aperen Probhu do apeakʼ mẽtʼ samaṅre Misor disạmre ape lạgitʼ okae cekaletʼ onka jãhãn debota jãhãtisokʼ biḍạu hotete, hahaṛa kạmi hotete, cinhạ kạmikote, lạṛhại talate, keṭecʼ ar daṛeanakʼ tite ar maraṅ ar botoranakʼ kạmiko hotete jãhãn jạtren hoṛko eṭakʼ jạtrenko tala khon apnar lạgitʼe oḍok ạgu akatʼkoa se baṅa.

³⁵ “Ape jemonpe baḍae daṛeakʼ, Probhu kangeae Isor do ar uni chaḍa cele Isorge bạnukʼkoa, ona iạtege noako dope ńel ocolena.

³⁶ Uni do acʼakʼ ḍanṭao tabere ạgupe lạgitʼ serma khon acʼakʼ aṛaṅe ańjom ocoletʼpea ar ape do dhạrtire uniyakʼ ṭhonok reakʼ seṅgel, ar ona seṅgel tala khon uniyakʼ aṛaṅpe ańjomleda.

³⁷ Uni do aperen hapṛamkoe dulạṛketʼkoa ar ona tayom do onkoren bõskoe bachao hataoana. Ar onate acʼ hạjir tahẽkate acʼakʼ maraṅ daṛete Misor disạm khon apeye oḍok ạguketʼpea.

³⁸ Uni doe onka akada jemon maraṅ ar daṛean jạtrenko ape samaṅ khone laga ńirkote onkoakʼ disạmte apeye idi daṛeape ar sompotti lekate onae em daṛeape; ar teheń do onage hoyakana.

³⁹ “Teheń ape do niạ katha baḍaekakʼpe ar ontorre rebetʼ dohokakʼpe, Probhu Isorge coṭ sermaren ar latar otren Isor kanae, uni chaḍa ar cele Isorge bạnukʼkoa.

⁴⁰ Ape ar ape tayom aperen hoponko jemon bhạlại hoyokʼtako ar aperen Probhu Isor okaṭakʼ disạm jaejug lạgitʼe emape lạgidokʼ kan onare jemon ḍher din jiwetʼpe tahẽdaṛeakʼ onate iń do onako ạn-ạri ar hukumkoń emape kana onako manao idipe baṛe.”

Asrayokʼ nagrahako

^41-43 Inạ tayom Mose do jordan gaḍa reakʼ purub secʼre pea nagrahae bachaokeda jemon jãhãege jãhãeye gocʼlere bańcaokʼ lạgitʼ onḍeye dạṛ bańcao daṛeakʼa. Monre jãhãn raṅgao doho baṅkate ackage onkanakʼe kạmi lekhan uni do ona asrayokʼ nagrahareye dạṛ bańcao daṛeakʼa. Ar okako nagrahare jiwi rukhiyại lạgitʼe ńir bańcao daṛeakʼ onako do hoyokʼkana Rubenrenko lạgitʼ bilạn ṭạnḍi reakʼ Beser, Gadrenko lạgitʼ Gilead reakʼ Ramot ar Manaseko lạgitʼ Bason reakʼ Golan.

Ạn-ạriko

^44-46 Mose do Israelko samaṅre noako ạn-ạrikoe samaṅatʼkoa. Misor khon oḍok hecʼen tayom uni do jordan reakʼ purub secʼ Hesbonren Amori raj Sihon reakʼ disạmre Bet-Peor mohnḍa muhnḍi reakʼ buru tala otetere Israelko ṭhen sontorokʼ reakʼ noako katha, niạm ar hukumkoe baḍae ocoketʼkoa. Ar misor disạm khon oḍokʼ hecʼkate Mose ar Israelko do Sihon rajko bhagaokedea.

⁴⁷ Onko do Sihon ar Basonren raj Ogakʼ disạmko ạidạriana. Amorikoren nukin rajakʼ rajosṭi do jordan gaḍa reakʼ purub secʼre tahẽkana.

⁴⁸ Arnon otet aṛe reakʼ Aroer nagraha khon Sion buru, metakʼme Hormon buru hạbicʼ noakin rajosṭige tahẽkana.

⁴⁹ Onakin modre jordan purub secʼ goṭa Araba ṭoṭha hõ tahẽkana. Noa do Pisga buru dhasna latar menakʼ doreão hạbicʼ sen akana.