Dosar Biboron 33 - সান্তালী বাইবেল

Mose do Israelkoe bhorakokan

¹ Isorren hoṛ Mose do acʼakʼ gujukʼ lahare Israelko noa menkateye bhoratʼkoa,

² “Probhu Isor do Sinại khone hecʼena, Ar Seyir khon abo cetanre marsale emena; uniyakʼ marsal do Paran buru khon jhakjhakaoena. Uni do lakh lakh sonot serma goḍetko tala khone hecʼena; ar uniyakʼ jojomsa reakʼ tire do durdurạukʼkan seṅgel tahẽkana.

³ “Sạrige uni do acʼren hoṛkoe dulạṛetʼkoa. Sonot goḍetko do acʼakʼ tire menakʼkoa, sanamkoge uniyakʼ umulreko taṛameda; ar uniyakʼ hukumko senakʼkana.

⁴ Abo ṭhen Mose okako ạn-ạrikoe emakan, ona do Jakob bõsrenkoakʼ dhon kana.

⁵ Tinre Israelren mukhiyạko, ar onko sãote Israel khũṭren sanamkoko jarwayena. unre Jisurun raj do Probhu Isorgeye tahẽkana.”

Gelbar khũṭrenko lạgitʼ asirbad

⁶ Ruben reaṅ Mose doe menkeda, “Ruben do jiwetʼ baṛeye tahenma, uniyakʼ gujukʼ do sạṅgińkakʼme; uniren hoṛkoakʼ lekha alo baṛe komaokʼma.”

⁷ Jihudạ reaṅ uni doe menkeda, “E Probhu Isor, Jihudạwakʼ katha baṛe luturakʼme; ar acʼren hoṛko talare ruạṛ ạguiyeme. Uni do acʼakʼ banar titeye lạṛhại kana; bạiriko upạrte uni sãore baṛe tahenme.”

⁸ Liwi reaṅ uni doe menkeda, “Amakʼ Thumim do Lewi emaeme, ar amakʼ Urim do amren dhoromicʼ, one uni Masa ṭhenem bulạulede, one uni tulucʼ Meriba dakʼ ṭhenem reṭepeṭelen.

⁹ One uni acʼ eṅgat apat reakʼe menketʼ, bạń bạsutạkin kana, Ar acʼren boehako bae puchạuletʼko, ar acʼren hoponko bae baḍaeletʼko, uni do amakʼ kathakoe dohoyeda ar amakʼ bondoboskoe manaoeda.

¹⁰ Onko do Jakob amakʼ bicạrko cetʼaea, ar Israel do amakʼ ạnge, onko do am samaṅre dhupko dohoya. Ar amakʼ pinḍre goṭa jeretʼ cabakʼ samaṅokʼakʼkoge.

¹¹ E Probhu Isor, am do uniyakʼ sompotti baṛe bhorakʼtaeme, ar uniyakʼ sanamakʼ kạmire kusikʼme. Uniren bạirikoakʼ ḍanḍa baṛe rạpudtakome, ar okoe uniko hirkhạwae onkoakʼ ḍanḍa hõ rạpudtakome, jemon aloko teṅgo ruạṛ daṛeakʼ.”

¹² Benjạmin reaṅ uni doe menkeda, “E Probhu Isor okoeyem dulạṛedekan uni do khạtirjoma unireye tahena; ar jao ghuṛi uni doe aḍ dohokaea; uniyakʼ tarenregeye tahena.”

¹³ Joseph reaṅ uni doe menkeda, “Probhu Isor do jemon uniyakʼ disạme bhorakʼtae coṭ serma reakʼ sorosakʼ dante ar latarre jarwa akan athantar dakʼte,

¹⁴ siń cando reakʼ soros soros dante ar cando cando upcạukʼ reakʼ phosolte,

¹⁵ mare buruko reakʼ boge utạrakʼte, jaejug reakʼ ḍuṅgriko reakʼ dhonte,

¹⁶ prithimi reakʼ bhage bhage jiniskote, ar jolokʼkan jhạuạre okoeye tahẽkan uniyakʼ dayate. Josephakʼ bohokʼre noako ạsirbad baṛe pheḍ hijukʼma; boehako modre okoeye mukhiyạkan uniyakʼ bohokʼre noako bhor baṛe paṛaokʼma.

¹⁷ Uniren pạhil janam adar doe ṭhonokana, uniyakʼ bohokʼre kạpil gại reakʼ dereńge menakʼa. Onate uni do prithimiren sanam jạtrenkoe hoṭakʼ pạsirkoa, ar ses simạnare menakʼko jạtrenko hõ. Ephrayimren do lakh lakh ar Manaseren do hajar hajar hoṛko hoyokʼa.”

¹⁸ Sebulon reaṅ uni doe menkeda, “Sebulon do bahre kạmire kusi akane tahenma, ar Isakar do oṛakʼ bhitri reakʼ kạmikorege.

¹⁹ Unkin do jạt jạtrenko burutekin rakapʼkoa; ar onḍe do lekren dãṛẽkin samaṅkoa. Unkin do jalapuri reakʼ sareṛokʼakʼ kin cepeja, ar gitilre do danaṅakʼ acelkoge.”

²⁰ Gad reaṅ uni doe menkeda, “Bhạgangea uni do, okoe do Gad rajosṭi reakʼ simạnae baṛhaoetʼ. Uni do dhạcri kul lekae tahena ar bạirikoakʼ ti ar coṭ bohokʼ hạbicʼe cirạitakoa.

²¹ Uni do acʼ lạgitʼ bhage jumiye bachaojoṅa; mukhiyạwakʼ kuṛại do uni lạgitʼge dohoakana. Lạṛhạire jarwa akan sordarko talare unige Probhu Isorakʼ hukume manao akatʼtaea, uni do Probhu Isorakʼ niạme dohoakada oka do Israel hoponko em ocoakan.”

²² Dan reaṅ uni doe menkeda, “Dan doe dhạcri kul hopon kana okoe do Bason khone don hijukʼkan.”

²³ Napthali reaṅ uni doe menkeda, “Napthali do Probhu Isorakʼ mãyãteye perecʼgea; uniyakʼ bhorte uni doe perecʼakana. Gạlil doreão ar ona reakʼ dạkhin disạm am do ạidạri joṅme.”

²⁴ Aser reaṅ uni doe menkeda, “Aser do eṭakʼko khon ḍher ạsirbade ńama; ar acʼren boehako ṭhen bạsutạnicʼe hoyokʼma, uni do acʼakʼ jaṅgakin sunumreye caḍoetaema.

²⁵ Mẽṛhẽtʼ ar pitạl reakʼ hurkạṛte uniyakʼ duạr do tol tahentaea. Ar tinạkʼ din jiwetʼe tahen unạkʼ din hoṛmore daṛe tahentaea.”

Israel cetanre ạsirbad

²⁶ Uni doe menkeda, “E Jisurun Isor leka do celege bạnukʼkoa. Amren gokʼṛoyicʼ hoyokʼ lạgitʼ uni do rimil reakʼ gạḍite, acʼakʼ mạhimawante rimilteye decʼ hijukʼkana.

²⁷ Okoe doe jug hilokʼren Isorkan unige amren asarae do; acʼakʼ jaejug reakʼ tite uni do ame sapʼ dohokama. Am samaṅren sanam bạiriko uni doe laga ńirkoa; are mena, ‘noko mohor meṭaokom.’

²⁸ Onate Israel do khạtirjomae tahena. Jakob reakʼ jharna do eskarge tahena; onḍe do ḍher phosol ar nãwã darkha rasa hoyokʼa, ar onare do serma reakʼ sisir dakʼe jorowakʼa.

²⁹ E Israel, bhạgangeam am do! Am do Probhu Isorren bańcao akan jạtren kanam, am leka do ar cele jạtrenkoge bạnukʼkoa. Unige amren gokʼṛoyicʼ ḍhal do, ar unige amakʼ gorbokʼ reakʼ tarwaṛe. Bạiriko do am samaṅre botorteko thar tharaokʼa, ar onkoakʼ usul jaega dom lebetʼ gańjaotakoa.”